Die wo rorori?

•   Imuoshọ herọ siẹrẹ e de vwobọ vwẹ uruemu rẹ orhan re vwo nẹ isio yẹrẹ ephapha rẹ ephaẹbọ vwo duotọ rẹ akpeyenren?

•   Ikuegbe rẹ orhan ghwa hẹ ikuegbe rẹ osian ghevweghe—rọ vuẹ avwanre kpahen ofovwin rọhẹ uvwre rẹ erhuvwu kugbe umiovwo —gbanẹ ọ vrẹ ọtiọyen?

 Uyovwinrota nana cha vuẹ avwanre oboresorọ uruemu orhan vwo je ihwo vẹ oboresorọ o vwo fo re vwo nomaso.

•  Diesorọ o vwo je ihwo?

•  Diesorọ e vwo nomaso?

•  Oborẹ wo se ru

•  Oborẹ edje wẹn tare

 Ihwo ri ruẹ ifimu, igemu kugbe ẹbe, tẹroviẹ iyovwinreta sansan ri shekpahen orhan, uruemu orhan kọyen a ma mrẹ vwẹ erọnvwọn ra vwọ dia otọ asaọkiephana. Fikirẹ ọnana, orhan ẹvwarọn kerẹ, re vwo nẹ isio vwo duotọ rẹ akpeyenren ko je ighene buebun, ọtiọyen je hẹ ifimu re de se ebara rẹ ihwo da yẹrẹ irivwin ri vrẹn nushi ra re uvwon rẹ ihwo. Diesorọ? Oboresorọ kọna:

•   Ayen guọnọ riẹn: Ayen guọnọ riẹn se orho erivwin ghene herọ

•   Ọdavwẹ: Ayen guọno riẹn oborẹ obaro na hepha

•   Obọechuro: Ayen guọnọ davwan se ayen se nene ihwo rayen ri ghwure ta ota kugbe

 Iroro yena ghwa chọ komobọ-ọ. Kerẹ udje, ihwo roro kpahẹn oborẹ obaro na cha dia kugbe ihwo rẹ orua rayen rẹ ayen vwo ẹguọnọ kpahen ri ghwure. Ẹkẹvuọvo imuoshọ je herọ ro fori nẹ a mrẹvughe.

 Baibol na vwẹ orhọ-esio ọgangan vwọ phia kpahen kemu kemu ro churobọ si uruemu orhan. Kẹrẹ udje, o tare nẹ:

 “We ja mrẹ ohwo ọvo vwẹ uherevie rẹ ovwan. . . rọ mraro, eyẹ ọbuepha eyẹ ohwo rọ mrorẹ eyẹ ọbo rọ ghwa ihwo ria, eyẹ ohwo ro ruẹ inehweri, eyẹ ohwo ro nene irivwi ta ota eyẹ ọrieda, eyẹ ohwo ro hrẹn. Kidie ohwo ro ru imu nana yo gbe ẹgua rẹ Ọrovwohwo.”—Urhi Rivẹ 18:10-12.

 Diesorọ ri Baibol na vwọ sen uruemu rẹ orhan?

•   Uruemu orhan nẹrhẹ a vẹ emekashi ri dẹbono ruẹ kuẹgbe. Baibol na yonori nẹ emekashi evo gbe vwọso Ọghẹnẹ ayen da rhe dia ivwighrẹn rẹ Ọghẹnẹ. (Jẹnẹsis 6:2; Jude 6) Emekashi rẹ idebono na, phiẹn ihwo womarẹ orhan ẹvwarọn, ẹphaẹbọ kugbe rẹ vwo nẹ isio vwo duotọ rẹ akpeyenren. E de vwobọ vwẹ iruemu nana ọ cha nẹrhẹ avwanre dia ivwighrẹn rẹ Ọghẹnẹ.

•   Uruemu orhan titẹ ofian, nẹ ihwo evo sa mrẹ obaro na. Ẹkẹvuọvo, Ọghẹnẹ ọvo yen se “dje oba na nẹ ẹtuọhọ rọye rhe nẹ awanre rhe imu ri ji” ru gba-a.—Aizaya 46:10; Jems 4:13, 14.

•   Uruemu orhan titẹ uyono rẹ ofian, nẹ ihworakpọ se nene ihwo ri ghwuru ta ota. Ẹkẹvuọvo, Baibol na tare nẹ: “ihwo ri ghwuru riẹn emu ọvuọvo-o. . . Kidie ushi wọ cha ra na, o vwo iruo-o eyẹ iroro-o eyẹ erianriẹ-ẹn eyẹ aghwanre-e.”—Aghwoghwo 9:5, 10.

 Fikirẹ enana, Iseri ri Jihova ke kẹnoma kẹ iruemu eje ri churobọ si uruemu rẹ orhan. Ayen je kẹnoma kẹ akpọẹriọ ro titẹ uruemu orhan kerẹ ifimu re de se ebara rẹ ihwo da yẹrẹ irivwin ri vrẹn nushi ra re uvwon rẹ ihwo. Eghene aye ọvo re se Maria da ta: “ọ da dianẹ omoka rẹ uruemu rẹ orhan yehẹ ifimu na dede, kọyen ofori mi vwo no-o” a

•   Brorhiẹn wọ vwọ sẹro rẹ ‘omamọ ẹwẹn obrorhiẹn’ vwẹ obaro ri Jihova womarẹ wọ cha vwọ kẹnoma kẹ kemu kemu ro churobọ si orhan.—Iruo Rẹ Iyinkọn Na 24:16.

•   Guọghọ kemu kemu ro churobọ si uruemu rẹ orhan. Se Iruo Rẹ Iyinkọn Na 19:19, 20, wo mi vwo oniso rẹ omamọ rẹ udje rẹ Inenikristi rẹ ẹgbukpe ujorin rẹsosuọ phi phiyọ otọ.

 Karophiyọ: Wọ da kẹnoma kẹ ifimu, ẹbe kugbe igemu ri titẹ uruemu rẹ orhan, jẹ wo djephia nẹ ẹbẹre ri Jihova yen wọ kare. Ọyena cha nẹrhẹ oma vwerhen Jihova!—Isẹ 27:11.