ENỌ RẸ IGHENE NỌ
Kọ da Rha Dianẹ Isikuru Ẹra Tun Vwe Oma Vwo?
Iyono rẹ isikuru re djoma. Ọnyẹ rẹ edjedje. Edavwini re pha gangan re je ghwọrọ ohwo oma, vẹ iruo rẹ isikuru re pha buebun. Wọ da ta nẹ isikuru ẹra tun we oma, o vwo oboresorọ wọ vwọ ta ọtiọyen. a Eghene rẹ ọmọtẹ re se Rachel b da ta:
“Ukperẹ mi vwo kpo isikuru, o yovwin mi de kpo ibishi, nene igbeyan mẹ ghwọrọ ọke kugbe, yẹrẹ tobọ vwẹ ukẹcha kẹ ọsẹ yẹrẹ oni mẹ vwo ru uwevwin na fon!”
Ọ da dianẹ obo re phia kẹ Rachel na yen je phia kẹ wẹ, kọyen ikpe wọ cha ghwọrọ vwẹ isikuru cha họhọ ikpe ra ghwọrọ vwẹ ogba rẹ elọkpa, ku wo che vwo odirin rhi te ọke wo vwo wontọ nẹ isikuru. O vwo oborẹ wọ sa vwọ rhuẹrẹ ẹdia nana phiyọ?
Wọ riẹnre? Wọ da vwẹ omamọ ẹro vwo nẹ isikuru, ọ cha vwẹ ukẹcha kẹ wẹ vwọ rhuẹrẹ ebẹnbẹn na phiyọ, ji vwo omavwerhovwẹn. Vwẹ idjerhe nana, isikuru kọ cha rhe dia obo re pha ghanghanre rọ cha nẹrhẹ wo vwo ena ro fori nẹ wo vwo kerẹ omiragua.
Wọ sa vwọ vwẹ omamọ ẹro vwo nẹ isikuru, davwẹngba vwọ tẹnrovi erọnvwọn nana:
Ẹbe eyono. Wo vwo yono phiyọ ye, jẹ ona rẹ oborẹ wọ cha rhuẹrẹ ebẹnbẹn rehẹ obaro na ji ghwe yovwẹn phiyọ, wo rhe che mu ẹwẹn kpahen ihwo efa vwọ kẹ ukẹchaa. Nọ oma wẹn, ‘O vwo erere me cha mrẹ vwo nẹ ọbe eyono rhe ọ da tobọ dianẹ o vwo erọnvwọn evo ri tun vwe oma kpahen isikuru?’
Odjekẹ ri Baibol: “Yọnrọn omamọ rẹ aghwanre vẹ ọhọ.”—Isẹ 3:21.
Vwọ kẹ evuẹ efa, ni uyovwinrota na “Ọ da Dianẹ Mi She Ọdavwini Vwẹ Isikuru Vwo?”
Uruemu wẹn. Irueru rẹ isikuru cha vwẹ ukẹcha kẹ wẹ vwọ riẹn idjerhe ro fori nẹ wọ reyọ ọke vwo ruiruo wan, vwo vwo omaẹriẹnsuon, je dia ọgbowian—enana iruemu ro fori nẹ wo vwo kerẹ omiragua. Nọ oma wẹn: ‘Mavọ yen irueru rẹ isikuru vwọ cha vwẹ uko vwo vwo omaẹriẹnsuon je dia ọgbowian? Die mi se ru vwo ru yovwinphiyọ vwẹ ẹdia nana?’
Odjekẹ ri Baibol: “Vwẹ evun rẹ owian ejobi erere herọ.”—Isẹ 14:23.
Vwọ kẹ evuẹ efa, ni uyovwinrota na “Mavọ Me Sa Vwọ Reyọ Ọke Mẹ Ruiruo Vwẹ Idjerhe Abavo?”
Oyerinkugbe wẹn vẹ ihwo efa. Oyerinkugbe wẹn vẹ emọ rẹ iklasi wẹn sa vwẹ ukẹcha kẹ wẹ vwo vwo erorokẹ ji muọghọ kẹ ihwo efa. Eghene ọshare ọvo re se Joshua da ta: “Re vwo yono obo re nene ihwo ta ota wan pha ghanghanre kirobo rẹ history vẹ science hepha. Ọnana ona wo che vwo ruiruo vwẹ akpeyeren wẹn eje.” Nọ oma wẹn, ‘Die yen isikuru yono uvwe kpahen oyerinkugbe mẹ vẹ ihwo efa—tobọ te ihwo ri vwo ẹkuruemu yẹrẹ ri kpo ẹga re fẹnẹ ọ mẹ?’
Odjekẹ ri Baibol: “Ovwan davwẹngba rere ovwan vẹ ihwo ejobi vwo yerinkugbe vwọrẹ ufuoma.”—Hibru 12:14.
Vwọ kẹ evuẹ efa, ni uyovwinrota na “Mavọ Mi se Vwo ru Otaẹtakuẹgbe Mẹ Yovwinphiyọ?”
Obaro na. Isikuru sa vwẹ ukẹcha kẹ wẹ vwo vughe oborẹ wọ riẹn ruẹ ji bru ẹkẹn kẹ oma vwo nene oborẹ wọ riẹn ruẹ na. Eghene rẹ aye ọvo re se Brooke da ta: “A sa tobọ yono uwe ona rẹ iruo ọvo, kirobo rọ phia kẹ vwẹ, rere ọke rẹ wo de wontọ nẹ isikuru nu, jẹ wo muwan rẹ iruo tiọyena re.” Nọ oma wẹn: ‘Mavọ yen me sa vwọ vwẹrote oma mẹ siẹrẹ mi de wontọ nẹ isikuru nu? Mavọ yen o se vwo muvwẹro nẹ oborẹ me guọnọre vwẹ iruo na yen mi yonori?’
Odjekẹ ri Baibol: “Riẹn asan rẹ wọ ra.”—Isẹ 4:26, Contemporary English Version.
