Ọke evo, egọghẹnẹ evo roro sẹ e vwo yeren akpọ nene iwan ri Baibol na fo obo ra ghwọrọ ọke vẹ ẹgba phiyọ. (Une rẹ Ejiro 73:​2, 3) Ayen se tobọ ru erọnvwọn re vwọso urhi ri Jihova, ayen me davwẹngba vwọ phiẹn egọghẹnẹ efa womarẹ orharhe uruemu rayen rẹ ayen siẹnẹ.

 A rhuẹrẹ uyovwirota nana rọ vwọ vwẹ ukẹcha kẹ ihwo ri yeren oka rẹ akpọ tiọyena, re guọnọ dobọ rọyen ji.

Vwẹ aruọbe nana

•  Die yen akpọ aro ivẹ?

•  E vwo yeren akpọ aro ivẹ mudiaphiyọ nẹ mẹvwẹ orharhe ohwo?

•  Mavọ yen me sa vwọ kẹnoma kẹ akpọ aro ivẹ?

•  Oborẹ edje wẹn tare

 E vwo yeren akpọ aro ivẹ mudiaphiyọ nẹ ọke wọ dahẹ ohri igbeyan wẹn ri nyupho ri Jihova-a, ku wo ruẹ obo wọ riẹnre nẹ e chọre; ẹkẹvuọvo, wọ dahẹ ohri rẹ ihwo ri fuevun vwẹ ukoko na, kẹ wo ruẹ kerẹsiẹ ra da mrẹ nẹ wọ guọnọ Jihova ga. Kọ ghwa họhọ nẹ wo siẹ emuọvo nẹ vwẹ akpọ aro ivẹ rẹ wo yerẹn na.

 “Wo de yeren akpọ aro ivẹ, jẹ wo siẹ emuọvo nẹ vwẹ ọvuọvo rayen, ọtiọyena, e che se vughe ohwo wọ ghene hepha-a. Marho, wo de yeren oka rẹ akpọ tiọyena, kọyen owẹ dia ohwo rẹ uyota-a.”​—Erin.

 Wọ riẹnre jovwo? Akpọ aro ivẹ ji churobọ si uruemu re vwobọ vwọ vwẹ odjahọn, ra riẹnre nẹ Jihova vwo utuoma kpahen.

 “Me vwọ hẹ ẹgbukpe 14, me da ton eno rẹ ughe rẹ ihoho rẹ ihwo re banphiyọ vwẹ intanẹti. Me dahẹ uvwre rẹ ihwo, ki mi ruẹ kerẹsiẹ a da mrẹ nẹ mi vwo utuoma kpahen ihoho tiọyena, jẹ vwẹ ubiudu mẹ, me riẹnre nẹ mi vwo utuoma kpahan aye-en.”​—Nolan.

 Odjekẹ ri Baibol: “Ohwo vuọvo cha sa dia ọviẹn vwọ kẹ inini ivẹ-ẹ; kidie o che vwo utuoma kpahen ọvo, o mi rhe vwo ẹguọnọ rẹ ọ ro chekọ, yẹrẹ o che churu mu ọvo, ọ me rha jẹ ọ ro chekọ fia.”​—Matiu 6:24.

 Ọ ghwa dia ọkieje-e. Vwọrẹ uyota, ihwo evo brorhiẹn nẹ ayen guọnọ yeren akpọ vwo nene iwan ri Baibol na-a. Ẹkẹvuọvo, ọtiọyen yen ọ je hepha kẹ wẹ? Gbanẹ o vwo oboresorọ wo vwo yerẹn akpọ aro ivẹ, kerẹ:

•   Wọ guọnọ fẹnẹ ihwo ru wẹ vẹ ayen gba hẹ edjedje-e.

•   Wẹ vẹ emọ rẹ iklasi wẹn ruẹ kuẹgbe vwọ vrẹ ihwo rehẹ ukoko na.

•   Wo no nẹ ẹgba rẹ wo vwo nene iji rẹ Ọghẹnẹ eje rhe we-e.

 “Mi niro nẹ oma vwerhen ighene evo ri yeren akpọ aro ivẹ ọke rẹ ayen da ohri rẹ ihwo ri yeren akpọ vwo nene iwan rẹ Ọghẹnẹ-ẹ kidie ayen guọnọre nẹ ihwo rhiabọreyọ ayen, o toro obo ro churobọ si-i.”​—David.

 Vwọrẹ uyota, o vwo iroro vuọvo usun rẹ enana rọ sa nẹrhẹ ohwo yeren akpọ akpọ aro ivẹ-ẹ. Dedena, ọnana dje oboresorọ omamọ rẹ ihwo vwọ tobọ she ufi na. Ọ da dianẹ ọnana phia kẹ wẹ jovwo re, die yen wo se ru?

1.  1. Roro kpahen oborẹ wo yeren akpọ wẹn wan enẹna. Nọ oma wẹn: ‘Ọnana yen ghene oka rẹ ohwo me guọnọ dia? Die yen se ni obuko rọyen rhe mi rhe wene-e?’

    Odjekẹ ri Baibol: “Ovwaghwanre . . . mrẹ ukpokpogho rọ cha . . . ; ẹkẹvuọvo ohwo oghenghẹn me kọn ruọ o mi ghwu phihọ.”​—Isẹ 27:12.

2.  2. Dia ohwo rẹ uyota. Wẹ vẹ ọsẹ, oni yẹrẹ ugbeyan wẹn ro tedje ro muọghọ kẹ irhi rẹ Jihova ta ota kugbe. Oma sa vwerhen ayen nẹ wo bru ayen rhe vwọ kẹ ukẹcha. Wo ji che brọghọ phiyọ ayen oma rẹ ayen da mrẹ nẹ wọ guọnọ ru obo ri shephiyọ!

    “Me vwọ vuẹ ihwo efa kpahen oruchọ mẹ ọyen orọnvwọn ọvo rọ ma bẹn kẹ vwẹ eruo, jẹ mi de ruo, ẹwẹn me kọ nabọ totọ.”​—Nolan.

    Odjekẹ ri Baibol: “Ohwo ro si ogbeku rọye nu che se yovwi-i, ẹkẹvuovo ohwo rọ rhọvwerọ ro de siobọ nẹ ayen cha mrẹ arodọvwẹ.”​—Isẹ 28:13.

3.  3. Rhiabọreyọ obo ri che nẹ obuko rọyen rhe. Karophiyọ, ọ da dianẹ wo siẹ orọnvwọn nẹ kẹ ọsẹ vẹ oni wẹn kugbe ukoko na, ju wo ruro ọ vwọ bẹn rẹ ayen vwọ vwẹroso owẹ. Ọtiọyena, ọsẹ vẹ oni wẹn yẹrẹ ekpako rẹ ukoko na se gbere ughwru kẹ wẹ. Rhiabọreyọ ughwru re che gberi kẹ wẹ na, wọ je dia ohwo rẹ “uyota vwẹ erọnvwọn eje” vwo nẹ ọke yena yanran.​—Hibru 13:18.

    Odjekẹ ri Baibol: “Kerhọn rẹ uchebro rere wọ reyọ uyono, rere wo vwo aghwanre hẹrhẹ ọke rọ cha.”​—Isẹ 19:20.

4.  4. Vwo imuẹro ọgangan nẹ Ọghẹnẹ vwo ẹguọnọ wẹn. Kidie nẹ Jihova vwo ẹguọnọ rẹ avwanre, o vwo oniso erọnvwọn eje rẹ avwanre ruẹ. Ọtiọyena, ọ riẹn je da siẹrẹ wo de yeren akpọ aro ivẹ. Jẹ, “kidie ọyen vwẹrote” we, o vwo owenvwe rọ vwọ vwẹ ukẹcha kẹ we vwọ kpọ idjerhe wẹn vi.​—1 Pita 5:7.

    Odjekẹ ri Baibol: “Kidie ẹro rẹ Ọrovwohwo djuẹ kpenẹ kpenẹ wan akpọ na ejobi, ro vwo dje ẹgba rọye kpahe ihwo rẹ udu rọye fon kpahọ.”​—2 Ikun Rivie 16:9.