Wo no nẹ wọ guọnọ sherua ọga rẹ omaẹghwọrọ sua? Ọ da dia ọtiọyen, uyovwinrota nana sa chọn wẹn uko!

• Oboresorọ ọ vwọ phia

• Oboresorọ ọ vwọ ghanre

• Obo wo se ru

• Oborẹ edje wẹn tare

• A vwọ wian gan nọ. Eghene ọvo re se Julie da ta: “Vwẹ kẹdia kẹdia rẹ akpeyeren yen a vwọ vuẹ avwanre nẹ e ru yovwin phiyọ, a vwọ tua erọnvwọn ride, rere avwanre sa vwọ mrẹ obo ri me yovwin. Ọ ghwa lọhọ e vwo nene okeke rẹ ọkieje tiọna na muabọ-ọ!”

• Ekuakua ri sherhe. Erọnvwọn kerẹ ifonu, itablẹti vẹ efa nẹrhẹ a mrẹ avwanre vwẹ “ọnlain” ọkieje, ọnana sa nẹrhẹ oma ghwọrọ avwanre te ẹdia ro de fi ọga.

• A vwọ gha ovwerhẹn. Eghene ọmọtẹ ọvo re se Miranda tare nẹ, “fikirẹ isikuru, owian vẹ akpọẹriọ, ighene buebun nonẹna rha fobọ sherhẹ-ẹn, jẹ ayen fobọ vrẹn vwẹ irhiọke.” Ọnana nẹrhẹ oma ghwọrọ ayen, ọ me so ọga.

Baibol na jiri uruemu ra vwọ dia ọgbowian. (Isẹ 6:​6-8; Rom 12:11) Ẹkẹvuọvo, o jiri uruemu ra vwọ wian gan nọ te ẹdia re de gbobọnyẹ erọnvwọn efa, ji te omakpokpọ rẹ ohwo-o.

“Me vwọ wian te ẹdia ọvo, ke me rhe karophiyọ nẹ me je re emu vwẹ ọsoso rẹ ẹdẹ yena-a kidie mi muomaphiyọ owian sansan rẹ mi ruẹ. Me da rhe mrẹ nẹ ofori me vwọ reyọ kowian kowian ra vwọ kẹ vwẹ-ẹ, marho ọ da dianẹ o che djobọte omakpokpọ mẹ.”​—Ashley.

O vwo oboresorọ rẹ Baibol na vwọ tanẹ: “Eranko ọkpokpọ yovwi nọ okpohrokpo ro ghwuru.” (Aghwoghwo 9:4) Ra vwọ wian gan nọ nẹrhẹ e roro nẹ e vwo ẹgba rẹ okpohrokpo. Jẹ a vwọ wian oma ghwọrọ djobọte omakpokpọ rẹ ohwo.

• Tanẹ ẹjo. Baibol na da ta: “Omaevwokpotọ ọ vẹ aghwanre gba yan.” (Isẹ 11:2) Ihwo re vwomakpotọ riẹn asan rẹ ẹgba rayen teri, erinyin na, ayen rhe rhiabọreyọ owian re vrẹ ẹgba raye-en.

  “Ohwo rọ riẹn obo ra tanẹ ẹjo kẹ owia-an se she ro ọga ro nẹ omaẹghwọrọ rẹ ọkieje cha. Ọyena dia omaevwokpotọ-ọ. Kidie o vwo obo rọ wanre-e, o che she ro ọga fikirẹ omaẹghwọrọ rẹ ọkieje.”​—Jordan.

• Nabọ rovwonma. Baibol na da ta: “Oyovwi kẹ obọ ọvo rọ vọnre vẹ ufuoma nọ abọ ivẹ rọ vọnre vẹ owian vẹ odju re nene họnra.” (Aghwoghwo 4:6) E se ovwerhẹn nẹ “emu rẹ afọrhen na,” jẹ buebun rẹ ighene sa vwerhẹn te inọke ẹrenren fiẹ ihwe vwẹ ason ọvo kirobo ro fori-i.

  “Siẹrẹ owian da vọn vwẹ obọ, me rha rhọnvwan vwerhẹ-ẹn. Jẹ ọkievo, ọmọke re me cha vwọ vwerhẹn na yen obo re me ghwa guọnọ rere me sa vwọ nabọ wian, je dia sasasa vwẹ ẹdẹ rọ vwọ kpahọn.”​—Brooklyn.

• Vwo ọrhuẹrẹphiyotọ. Baibol na da ta: “Iroro rẹ ohwo rọ vwẹ ẹro te otọ je yovwo-o.” (Isẹ 21:5) Wo vwo yono obo ra rhuẹrẹ ọke vẹ iruo wẹn phiyọ, cha chọn wẹn uko vwẹ akpeyeren wẹn ejobi.

  “Wọ sa kẹnoma kẹ erọnvwọn re sa nẹrhẹ oma ghwọrọ owẹ siẹrẹ wo de vwo ọrhuẹrẹphiyotọ. Wo de ni ọrhuẹrẹphiyotọ tiọyena na, kẹ wọ sa riẹn asan ru wo de se ru ewene rere oma vwo jẹ owẹ ẹghwọrọ.”​—Vanessa.