Vwẹ uyovwinrota nana

•  Oboresorọ e vwo ni ohwohwo ta ota

•  Obo ra sa vwo ton otaẹtakuẹgbe phiyọ

•  Oborẹ edje wẹn tare

 Ihwo evo tare nẹ ọ lọhọre e vwo ni ohwo opharo siẹrẹ a da ta ota-a, marho a da reyọ vwọ vwanvwe e vwo si evuẹ rhe ihwo.

 “Wo de nene ohwo ta ota jẹ wọ mrẹ ohwo na, ọ cha bẹn wo vwo wene yẹrẹ si oborẹ wọ tare reyọ kiribo rọ hepha wo de si ovuẹ rhe ohwo.”​—Anna.

 “Evuẹ esio hoho obo re ru phiyotọ, ẹkẹvuọvo, a vwọ ta ota kẹ ohwo ra mrẹ họhọ obo re ruẹ vwẹ obaro rẹ ihwo. Oborẹ mi roro siẹrẹ mẹ vẹ ihwo da ta ota yen, ‘Mi vwo jẹ ta chọ!’”​—Jean.

 Dedena, o vwo ẹdia rẹ wo che te vwẹ akpeyeren wo de che yono obo re nene ihwo efa ta ota. Kerẹ udje, ofori nẹ wo vwo ena nana wọ da guọnọ mu igbeyan kpokpọ, vwo iruo je sẹro rọyen, yẹrẹ ton oyan rẹ ọmọtẹ vẹ ọmọshare phiyọ siẹrẹ wo de muegbe re.

 Ẹkẹvuọvo, ofori nẹ oshọ mu we wọ da ta ota kẹ ihwo jẹ wo nẹ ayen opharo-o. Wo se yono obo re ruo​—wọ da tobọ dia ohwo rẹ oma vua.

 “Ọke evo avwanre ta chọ oma me vo avwanre. Wo rhẹro rọyen nẹ ọkieje yen eta wẹn cha vwọ gba-a.”​—Neal.

•   Nọ enọ. Roro kpahen uyovwinrota ro che je ihwo, rere wọ reyọ vwọ ton otaẹtakuẹgbe phiyọ. Kerẹ udje:

   “Mavọ yen oyan na wanre?”

   “Wẹbsaiti nana yovwiri mamọ. Wọ mrẹre jovwo re?”

   “Wo nyo kpahen . . . ?”

   Roro kpahen ẹdia ọvo rẹ ovwan ihwo ivẹ na da họhọ ohwohwo. Kerẹ udje, ovwan kpo isikuru vuọvo yẹrẹ wian vwẹ asan ọvo? Wọ sa reyọ oborẹ ovwan ihwo ivẹ na vwọ họhọ ohwohwo vwọ ton otaẹtakuẹgbe phiyọ.

   “Roro kpahen onọ ọvo ro je we mamọ, rẹ wọ je guọnọ riẹn ẹkpahọnphiyọ rọyen mie ihwo efa.”​—Maritza.

   Nomaso: Wọ nọ ohwo na enọ ibuebun re cha nẹrhẹ ofu dje-e. Wọ je nọ ohwo na enọ re cha nẹrhẹ oma vuọ-ọ. Enọ kerẹ “O ji te ọke wọ vwọ rọvwọn?” yẹrẹ “Diesorọ wo vwo ku ewun ri blu phiyọ ọkieje?” enọ tiọna sa nẹrhẹ ofu dje ohwo na. Enọ nana sa nẹrhẹ ohwo na roro nẹ wọ reyọ vwo guẹdjọ!

   Wọ je sa kẹnoma kẹ enọ ibuebun re cha nẹrhẹ ofu dje ohwo na siẹrẹ wọ da fọ kerhọ rẹ ẹkpahọnphiyọ ohwo na ukperẹ wo vwo brokpakpa kpahenphiyọ onọ ru wọ nọrọ. Karophiyọ nẹ otaẹtakuẹgbe yen ovwan hepha, ọ dia enọ vẹ ẹkpahọnphiyọ-ọ.

   Odjekẹ ri Baibọl: “Iroro rẹ ohwo pha kerẹ ame rọhẹ evunrẹ orhare okokodo, ẹkẹvuọvo ohwo ro vwo ẹruọ yen se vo phia.”​—Isẹ 20:​5, Good News Bible.

•   Dia ohwo rọ nabọ kerhọ. Rere wo se vwo ru yovwinphiyọ vwẹ otaẹtakuẹgbe rẹ ovwan, ofori nẹ wọ dia ohwo rọ nabọ kerhọ ukperẹ wọ vwọ dia ohwo rọ ta ota ọkieje.

   “Me davwẹngba mi vwo yono orọnvwọn kpokpọ kpahen ohwo me vẹ ọyen gba ta ota na. Me je davwẹngba vwọ karophiyọ oborẹ ohwo na vuẹ vwẹ rere me sa vwọ riẹn onọ re me cha nọ vwọ ton otaẹtakuẹgbe na phiyọ ọke ọfa.”​—Tamara.

   Nomaso: Wọ ro ẹnwan kpahen oborẹ wọ cha rhoma ta-a. Wọ da kerhọ fiotọ, wọ cha riẹn oborẹ wọ cha kpahen vwọ kẹ ohwo wẹ vẹ ọyen gba ta ota na.

   Odjekẹ ri Baibọl: “Fobọ nyo, ọ fobọ ta ota-a.”​—Jems 1:19.

•    Dje ọdavwẹ phia. Wọ cha riavwerhen rẹ otaẹtakuẹgbe na siẹrẹ wo de vwo ọdavwẹ rẹ ohwo wẹ vẹ ọyen gba ta ota na.

   “Wọ da nẹrhẹ ohwo rẹ ochekọ na riẹn nẹ wo ghini vwo ọdavwẹ rẹ oborẹ ọ ta na, ku wọ cha riavwerhen rẹ otaẹtakuẹgbe na​—ọ da tobọ dianẹ ọkievo otaẹtakuẹgbe na ghwa sasa kirobo ro fori nẹ ọ dia-a.”​—Marie.

   Nomaso: Kẹnoma kẹ enọ yẹrẹ eta re sa nẹrhẹ ofu dje ohwo. Eta kerẹ “Ewun wẹn na vwo erhuvwu mamọ. Bro yen wọ dẹrẹ?” sa nẹrhẹ ivun miovwo ihwo evo!

   Odjekẹ ri Baibọl: “Ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.”​—Filipae 2:4.

 Mavọ wo se vwo phioba phiyọ otaẹtakuẹgbe na? “Davwẹngba vwo phioba phiyọ otaẹtakuẹgbe na vwẹ idjerhe rẹ ovwan ihwo ivẹ na da sa ta ota ọke ọfa,” kirobo rẹ eghene ọshare re se Jordan tare. “Eta kerẹ, ‘Oma vwerhen ovwẹ nẹ mẹ vẹ owẹ sa ta ota kugbe’ yẹrẹ ‘A mrẹ ọke ọfa’ sa nẹrhẹ ovwan ihwo ivẹ na ta ota kugbe ọke ọfa ovwan da mrẹ.”