“E se rẹ Baibol na sa họhọ oghwa siẹrẹ wọ rha riẹn idjerhe ro me yovwin rẹ wo vwo se-e,” erinyin eghene ọmọshare re se Will tare.

 Wọ guọnọ riẹn obo wọ sa vwọ riavwerhen rẹ isese rẹ Baibol wẹn? Uyovwinrota nana cha chọn wẹ uko.

•  Phi arhọ phiyọ isese rẹ Baibol na

•  Ru ehiahiẹ!

•  Oborẹ edje wẹn tare

 Mu ẹwẹn phiyọ oborẹ wo se. Wọ sa reyọ ena nana vwo ruiruo:

1.   Sane ẹkpo rẹ Baibol rẹ wọ guọnọ yono na. Wọ sa sane irueru ọvo yẹrẹ ẹkpo ọvo rẹ Ikuegbe rẹ akpeyeren rẹ Jesu, yẹrẹ wọ je sa sane ikuegbe ọvo vwo nẹ isese rẹ Baibol re vwo ru eha rudje rehẹ jw.org/urh.

2.   Se ikuegbe na. Wo se se komobọ yẹrẹ wẹ vẹ orua yẹrẹ igbeyan wẹn se se phia. Ohwo ọvo sa reyọ ẹdia rẹ ogbikuegbe, ihwo ri chekọ me rha reyọ ẹdia rẹ ihwo sansan re ta eta vwẹ ikuegbe na.

3.   Davwen ọvo yẹrẹ ivẹ isun rẹ ena nana:

   •   Si ihoho vwo djisẹ rẹ ikuegbe na. Si ihoho sansan ri djisẹ oborẹ irueru phia kpahen ohwohwo wan phiyotọ. Si emeta kẹre uhoho ọvuọvo ri djisẹ rẹ obo re phia vwẹ evun rọyen.

   •   Si ekpeti. Kerẹ udje, wo vwo se kpahen ohwo ọvo rọ fuevun ye, davwẹngba wo vwo churu uruemu rọyen si ebruphiyọ ri te re obọ.

   •   Hirhe ikuegbe na kpo iniusi. Niyẹnrẹn rẹ ikuegbe na vwo nẹ ẹbẹre sansan rhe, “riẹnmie” ihwo sansan rehẹ ikuegbe na kugbe ihwo ri rhiẹromrẹ obo re phiare vwẹ ikuegbe na.

   •   Ọ da dianẹ ohwo ọvo vwẹ ikuegbe na bru orhiẹn rọ chọre, vwẹ ẹwẹn roro emu ọfa rọ rha sa phia kẹ. Kerẹ udje, roro kpahen Pita rọ sen Jesu. (Mak 14:66-72) Die ọfa yen Pita rhe se ru jovwo vwẹ ẹdia yena?

   •   Wo de no nẹ wo ji se ru vrẹ ọtiọyen, gbe si eha rẹ udje romobọ wẹn rẹ wo mu kpahen ikuegbe rẹ Baibol na. Reyọ uyono re se yono norhe vwọba ikuegbe na.—Rom 15:4.

 Wọ da nabọ fuẹnrẹn ikuegbe na, wọ cha hiẹ mrẹ efe ri siomanu. Vwọrẹ uyota, ọke evo, ota ọvo yẹrẹ ivẹ vwẹ ikuegbe rẹ Baibol sa chọn wẹn uko vwọ riẹn erọnvwọn buebun.

 Kerẹ udje, Reyọ Matiu 28:7 vwọ vwanvwe Mak 16:7.

•    Diesorọ Mak vwọ reyọ ota na “kugbe Pita” vwọba iyẹnrẹn rẹ ọke rẹ Jesu vwọ vwomaphia kẹ idibo na?

•  Noso: Mak rhiẹromrẹ irueru na-a; o muẹro nẹ Pita yen gbikun rẹ obo re phiare kẹ.

•  Efe ro siomanu vwọ: Diesorọ a sa vwọ tanẹ ẹwẹn rẹ Pita totọ ro vwo nyo nẹ Jesu ghene guọnọ rhoma mrẹ? (Mak 14:66-72) Idjerhe vọ yen Jesu komobọ vwo djephia kẹ Pita nẹ ọyen ghini uvi rẹ ugbeyan? Idjerhe vọ yen wọ sa vwọ vwẹrokere Jesu vwọ dia uvi rẹ ugbeyan kẹ ihwo efa?

 Wo de phi arhọ phiyọ isese rẹ Baibol na ji ru ehiahiẹ, ko wọ riavwerhen rẹ isese rẹ Baibol wẹn kpobarophiyọ!