“Me davwẹngba mi vwo se Baibol na, ẹkẹvuọvo mi se se-e kidie mi no nẹ ọ rho nọ.”—Briana, 15.

 Oka rẹ iroro yena ji rhe we? Uyovwinrota nana sa vwẹ ukẹcha kẹ wẹ!

•  Diesorọ mi vwo se Baibol na?

•  Mavọ yen mi che se Baibol na wan?

•  Oborẹ edje wẹn tare

 E vwo se Baibol na họhọ oghwa kẹ wẹ? Ọ da dia ọtiọyen, a riẹn oboresorọ. Wo se ni Baibol na kerẹ ọbe rẹ aruẹbe rọyen bun vrẹ uriorin ọvo, ra vwẹ ibieta itete vwo si, ro ji vwo ihoho vuọvo-o. Baibol na họhọ TV vẹ ividio re vwerhoma eno-o!

 Ẹkẹvuọvo jẹ e no vwẹ idjerhe nana: Wọ da mrẹ ekpeti rẹ efe rode rẹ awanre, wo che vwo ẹwẹn wọ vwọ riẹn obo rehẹ evun rọyen?

 Baibol na ekpeti rọ vọnre vẹ efe. Efe rẹ aghwanre buebun hẹ evun rọyen re sa vwẹ ukẹcha kẹ wẹ vwo

•   Bru omamọ rẹ orhiẹn

•   Nene ọsẹ vẹ oni wẹn ru kugbe

•   Vwo igbeyan ri me yovwin

•   Yenrin ghene ofudjevwe

 Mavọ yen ọbe rẹ awanre tiọyena je sa vwọ nabọ wian nonẹna? Kidie “Ọghẹnẹ mu ihwo vwo si” Baibol na ejobi. (2 Timoti 3:16) Ọnana mudiaphiyọ nẹ obọ rẹ ohwo ro me vwo aghwanre yen ichebro rẹ Baibol na ejobi nurhe.

 Idjerhe ọvo yen wo vwo se Baibol na vwo nẹ ọtonphiyọ re te oba. Ọnana cha nẹrhẹ wọ riẹn ovuẹ rọhẹ Baibol na. O vwo idjerhe sansan re se vwo se Baibol na. Roro kpahen idje ivẹ:

•    Wo se se ẹbe 66 rẹ Baibol na vwo nene obo rẹ ayen vwọ kpahen ohwohwo wan, kọyen vwo nẹ Jẹnẹsis re te Ẹvwọphia.

•    Wo se se Baibol na vwo nene oborẹ erọnvwọn re phiare churobọ si ohwohwo wan.

 Noso: Erọnvwọn kiriguo re phiare vwẹ akpeyeren rẹ Jesu ọke rọ vwọ hẹ akpọ na hẹ Appendix A7 rẹ New World Translation.

 Idjerhe ọfa wo se vwo se Baibol na yen wọ vwọ sane ikuegbe ri shekpahen ebẹnbẹn rẹ wo hirharokuẹ. Kerẹ udje:

•   Wọ guọnọ vwo igbeyan ra sa vwẹroso? Se ikuegbe rẹ Jonatan vẹ Devid. (1 Samuẹl, iyovwin 18-20) Rere wọ reyọ ẹbe re se si eta phiyọ, “How to Find Loyal Friends” vwo yono vwo nẹ ikuegbe na.

•   Wọ guọnọ kpuriẹn phiyọ ẹgbaẹdavwọn wẹn wọ vwọ sen ọdavwini? Se ikuegbe rẹ oborẹ Josẹf sen ọdavwini. (Jẹnẹsis, uyovwin 39) Gba reyọ ẹbe re se si eta phiyọ, “How to Resist Temptation . . . Joseph​—Part 1” and “Falsely Accused! Joseph​—Part 2” vwo yono vwo nẹ ikuegbe na.

•   Wọ guọnọ yono kpahen oborẹ ẹrhovwo sa vwọ vwẹ ukẹcha kẹ wẹ? Se ikuegbe rẹ Nehemaya. (Nehemaya, uyovwin 2) Gba reyọ ẹbe re se si eta phiyọ, “God Answered His Prayer” vwo yono vwo nẹ ikuegbe na.

 Noso: Ọke wo de se Baibol na, jẹ o muwẹro nẹ asan eje fọre riẹi, rere wo se vwo mu ẹwẹn phiyọ obo wo se na.

 Idjerhe rerha wo se vwo se Baibol na yen wọ vwọ sane ikuegbe yẹrẹ une ọvo, se, rere wo roro kpahen obo wọ sa vwọ reyọ vwo ruiruo. Wo de se nu, nọ oma wẹn enọ nana:

•    Diesorọ Jihova vwọ nẹrhẹ e si ikuegbe nana phiyọ Baibol na?

•    Die yen o djephia kpahen uruemu rẹ Jihova yẹrẹ obo ro ru erọnvwọn wan?

•    Mavọ me sa vwọ reyọ ikuegbe nana vwo ruiruo vwẹ akpeyeren mẹ?

 Noso: Reyọ ividio, imapu vẹ erọnvwọn efa rehẹ study edition rẹ New World Translation re sa nẹrhẹ wọ riavwerhen rẹ isese rẹ Baibol wẹn vwo ruiruo.