Ẹwẹn re vwo vrẹ nẹ uwevwin sa vwerhoma, je dia vẹ oshọ. Mavọ wọ sa vwọ riẹn sẹ wo muegbe wọ vwọ dia ọromobọ wẹn re?

•  Fuẹnrẹn oboresorọ

•  Roro kpahen igho wọ cha ghwọrọ

•  Oborẹ edje wẹn tare

 O vwo erọnvwọn buebun re sorọ wọ vwọ guọnọ vrẹ nẹ uwevwin—jẹ evo usun rayen ghwe shephiyọ-ọ. Kerẹ udje, eghene ọshare re se Mario da ta: “Me guọnọ vrẹ nẹ uwevwin rere me sa vwọ djẹ kẹ ewian vwẹ uwevwin.”

 Vwọrẹ uyota, egbomọphẹ wẹn cha rhoma havwenphiyọ siẹre wo de vrẹ nẹ uwevwin. Onya rọhẹ ẹgbukpe 18 da ta: “Wo de vrẹ nẹ uwevwin, wẹ ọvo yen cha vwẹrote asan wọ dia, muegbe rẹ emu wẹn, hwosa rẹ urhukpẹ vẹ efa—ọsẹ vẹ oni wẹn cha vwẹ ukẹcha kẹ wẹ-ẹ!”

 Ẹkpo na: Ofori nẹ wọ riẹn oboresorọ wọ vwọ guọnọ vrẹ nẹ uwevwin rere wọ vwọ riẹn sẹ wo muegbe re.

 Jesu tare: “Ono vwẹ usun rẹ ovwan, rọ guọnọ bọn ohẹrhẹ, ro de je tidia te otọ roro unu ro muru, so se vwo obo ro te vwo ruo gba?” (Luk 14:28) Mavọ wo se vwo “roro unu ro muru” re vwo vrẹ nẹ uwevwin? Gba vwẹ enọ rehẹ obotọ na vwọ fuẹnrẹn oma wẹn.

  WỌ RIẸN OBO RA NABỌ VWẸ IGHO VWO RUIRUO?

 Baibol na tare nẹ igho ọyen “ekpọfia.”—Aghwoghwo 7:12.

•  Ọ bẹn kẹ wẹ wo vwo koko igho?

•  Wo mu igho ghwọrọ?

•  Kọke kọke yen wo vwo momo igho?

 Ẹkpahọnphiyọ wẹn vwọ kẹ ọvo usun rẹ enọ yena da dia e, kọyen orhiẹn wo vwo vrẹ nẹ uwevwin na sa ghwa oja rhe ukperẹ omavwerhovwẹn!

 “Oniọvo mẹ ọkpako vrẹ nẹ uwevwin ọke rọ vwọ hẹ ẹgbukpe 19. Uvwre rẹ ẹgbukpe ọvo, ọ ghwọrọ igho ro vwori ejobi re, e mu imoto rọyen mie kidie ọ sa hwosa rẹ igho ro momori vwọ dẹ-ẹ, ibanki rọyen rhọnvwe kẹ igho-o kidie ayen vwẹrosuọ-ọ, ukuotọ rọyen, kẹ ọ rẹ nẹ ọ guọnọ rhivwin rhe uwevwin.”—Danielle.

 Obo wo se ru enẹna: Nọ ọsẹ vẹ oni wẹn kpahen uchunu rẹ igho ayen ghwọrọ kemeranvwe kemeranvwe. Erọnvwọn vọ yen ayen hwosa phiyọ, vẹ mavọ yen ayen rhuẹrẹ erọnvwọn phiyọ wan rere ayen sa vwọ hwosa rẹ erọnvwọn tiọyena. Mavọ yen ayen se vwo koko igho?

  WO SE SUN OMA WẸN?

 Baibol na tare: “Dohwo doghwa rọye gba cha ghwa.”—Galesha 6:5.

•  Wẹwẹ ohwo rọ kpare ẹdẹ?

•  Ọsẹ vẹ oni wẹn yen karophiyọ owẹ kpahen owian wẹn?

•  Wọ dia otafe vrẹ ọke rẹ ọsẹ vẹ oni wẹn bru kẹ wẹ?

 Ẹkpahọnphiyọ wẹn vwọ kẹ ọvo usun rẹ enọ yena da dia e, kọyen ọ cha bẹn kẹ wẹ mamọ wo se vwo sun oma wẹn ọke wẹ ọvo da dia.

 “Ọke owẹ ọvo da dia, o vwo erọnvwọn evo re vwerhen owẹ oma-a, ẹkẹvuọvo wo che ru ayen. Ohwo vuọvo cha vuẹ wẹ wo ki ru aye-en, kọyen ofori nẹ wo vwo owenvwe na, ji vwo uvi rẹ ọrhuẹrẹphiyotọ rẹ wo nene.”—Jessica.

 Obo wo se ru enẹna: Davwẹngba wọ reyọ emeranvwe ọvo vwọ wian owian buebun vwẹ uwevwin na. Kerẹ udje, ru uwevwin na fon, fọrhọn emwa wẹn, kpo eki ra dẹ erọnvwọn, kovwọnvwọn kovwọnvwọn, chere emu rẹ orua na cha re, rere wọ hworẹ imize na eje. Ọnana cha nẹrhẹ wọ riẹn oborẹ wo che hirharoku ọke rẹ owẹ ọvo da dia re.

 Ẹkpo na: Ọ guọnọ omaẹriẹnsun rere owẹ ọvo sa vwọ dia.

  OFU FOBỌ DJE WE?

 Baibol na tare: “Ovwan gbe siobọ nẹ imu nana; ophu, ẹghwọ, eghrẹ, ota omiomiovwi,”—Kọlose 3:8.

•  Ọ bẹn kẹ wẹ, wẹ vẹ ihwo efa vwo yenrẹn kuẹgbe?

•  Ọ bẹn wo vwo sun ophu wẹn?

•  Ọkieje wọ vwọ guọnọ nẹ e ru emu nene ọhọre wẹn?

 Ẹkpahọnphiyọ wẹn vwọ kẹ ọvo usun rẹ enọ yena da dia e, kọyen ọ cha bẹn wẹ vẹ ohwo vwọ dia uwevwin kugbe yẹrẹ orivẹ rẹ orọnvwe siẹrẹ wọ da rọvwọn vwẹ obaro na.

 “Ọke rẹ mẹvwẹ vẹ ohwo ọfa vwọ dia kugbe, yen me vwọ riẹn ovwiẹrẹ mẹ. Me mrẹvughe nẹ ọ dia ihwo eje yen che se chirakon rọyen ọke rẹ ivun de mu we miovwẹn fikirẹ ọnyẹ-ẹ. Ke me guọnọ idjerhe ro shephiyọ rẹ me vwọ kẹnoma kẹ onyẹ.”—Helena.

 Obo wo se ru enẹna: Davwen rere wẹ vẹ iniọvo wẹn kugbe ọsẹ vẹ oni wẹn vwọ riẹn yenrin kugbe. Vwọrẹ uyota, obo wo nene ihwo ri jẹgba yerin enẹna, yen che dje obo wo ji che nene ihwo efa ri jẹgba yerin vwẹ obaro na.

 Ẹkpo na: A vwọ dia ọromobọ dia idjerhe ra vwọ djẹ kẹ owia-an, ọyen owọẹjẹ rọ guọnọ egbemuo. Gba riẹnmie ihwo ri se phikparobọ vwẹ ẹdia yena re. Nọ ayen, die yen ayen rhe ru fẹnẹ jovwo yẹrẹ die yen ayen riẹnre enẹna, ro ofori nẹ ayen riẹn obuko jovwo? Ọyen obo ro fori nẹ wo ru kpahen koka koka rẹ orhiẹn rode rẹ wọ guọnọ bru!