Die yen wo che ru vwẹ ẹdia nana?

1.  

    Wo che yovwunu kẹ, ọ da tobọ dianẹ oborẹ wo ruru na te obo ra ghwọku uwe kaphe-en?

2.  

    Wo che yovwunu kẹ, ọ da tobọ dianẹ wo vwo imuẹro nẹ oborẹ wọ tare na uyota?

3.  

    Wo che yovwunu kẹ ọsẹ wẹn, ọ da tobọ dianẹ wo rori nẹ ọyen ru we chọ?

 Ẹkpahọnphiyọ vwọ kẹ enọ erha na yen e. Ẹkẹvuọvo, diesorọ wọ vwọ tanẹ “wọ ghwọ-ọ,” ọ da tobọ dianẹ wo rori nẹ o vwo omamọ rẹ iroro rọ sorọ wo vwo ru oborẹ wo ruru na?

•  Diesorọ wo vwo yovwunu?

•  Oborẹ wọ sa vwọ tanẹ “wọ ghwọ-ọ”

•  Oborẹ edje wẹn tare

•   Unueyovwo djephia nẹ e tedje. Wọ da rhọnvwephiyọ oborẹ wo ru chọ yẹrẹ ta chọ, ju wo djephia nẹ wo vwo iruemu eghanghanre re cha chọn wẹ uko vwẹ ọke wo de te omiragua re.

   “Omaevwokpotọ vẹ odirin cha chọn avwanre uko vwo yovwunu je kerhọ rẹ oborẹ ohwo ọchekọ na vwori rọ cha ta.”​—Rachel.

•   Re vwo yovwunu nẹrhẹ a sa rhuẹrẹ kugbe. Ihwo re tanẹ “wọ ghwọ-ọ” djephia nẹ a vwọ sẹro rẹ ufuoma yen ma ghanre kẹ ayen ukperẹ ayen vwo si isiesi nẹ ọrayen yen gbare, ohwo ro chekọ na kọyen ru chọ.

   “Ọ da tobọ dianẹ wo niro nẹ ọ dia owẹ yen ru chọ-ọ, no nẹ obo re ma ghanre yen a vwọ guọnọ ufuoma. Ra vwọ ta nẹ ‘wọ ghwọ-ọ’ che si emu vuọvo nu we oma-a, ukperẹ ọtiọyen, ọ cha sẹro rẹ oyerinkugbe rọhẹ uvwre rẹ ovwan.”​—Miriam.

•   Unueyovwo nẹrhẹ ẹwẹn wẹn totọ. Ẹwẹn rẹ abe ro kpokpo ohwo siẹrẹ a da womarẹ eta yẹrẹ uruemu vwo gbe ohwo ku pha kerẹsiẹ a da mrẹ nẹ e muẹ oghwa ọhọhọhọ. Ẹkẹvuọvo, ọke ru wo de yovwunu, kọ cha họhọ nẹ e mu oghwa yena nẹ uwe oma. a

   “O vwo ọke me da ta eta ri gbaegbae vwọ kẹ ọsẹ yẹrẹ oni mẹ. Dede nẹ ọ da vwẹ mamọ, jẹ, me mrẹ bẹnbẹn mi vwo yovwunu kẹ ayen. Ẹkẹvuọvo, vwẹ ọke mi de yovwunu, ẹwẹn mẹ kọ nabọ totọ kidie ọ nẹrhẹ ufuoma dia orua na.”​—Nia.

 E vwo yovwunu guọnọ ẹgbaẹdavwọn? E! Dena rọ dia eghene aye ro yovwunu abọ buebun kẹ oni rọyen kidie nẹ ọ gbaudu kẹ da ta: “Ra vwọ tanẹ ‘wọ ghwọ-ọ’ dia obo re lọhọre-e. Ọ pha kerẹsiẹ a da mrẹ nẹ emuọvo dion upho mẹ, eta vuọvo rhe se no cha-a!”

•   Ọ da dia obo wo se ru, bru ohwo na ra wo yovwunu kẹ. Wo de bro ra re yovwunu kẹ, ọ cha nẹrhẹ ọ mrẹvughe nẹ obo re phiare na da wẹ mamọ. Ẹkẹvuọvo, wọ da womarẹ ovuẹ wo si rhe vwo yovwunu, ọ sa nẹrhẹ ohwo na roro nẹ unueyovwo na nẹ ẹwẹn wẹn rhe-e, tobọ vwẹ ọke wo de phi uhoho rẹ ohwo ro mu oma phiyọ ba.

   Iroroẹjẹ: Wo rhe se bro ra re yovwunu kẹ-ẹ, gbe se vwẹ ifonu yẹrẹ si ovuẹ vwẹ ikadi vwo rhe. Kona kona wo vwo ruiruo, nabọ frẹkotọ roro eta wẹn tavwen wọ ke ta ayen.

   Odjekẹ ri Baibol: “Iroro rẹ ọvwata nabọ roro ota te rọ ke kpahọ.”​—Isẹ 15:28.

•   Fobọ yovwunu. Wọ rha fobọ yovwunu-u, ọ cha nẹrhẹ ebẹnbẹn na rhoma rho phiyọ, ovwan ihwo ivẹ na rha cha riẹn yerin kugbe-e.

   Iroroẹjẹ: Bru ẹkẹn kẹ oma​—kerẹ udje, ‘Mi che yovwunu kẹ nonẹ.’ Brorhiẹn rẹ ọke wo che vwo ruo; wo ji nenesi rọyen.

   Odjekẹ ri Baibol: “Wọ vẹ ọvweghrẹ wẹn fobọ rhuẹrẹ kugbe.”​—Matiu 5:25.

•   Yovwunu nẹ otọ ẹwẹn rhe. Ra vwọ tanẹ “ọ da vwẹ nẹ obo me tarẹ na nẹrhẹ oma ru we ọtiọyen” dia unueyovwo-o! Aye ọvo re se Janelle da ta: “Ohwo ru wo ruchọ na che muọghọ kẹ wẹ siẹrẹ ọ da mrẹ nẹ wọ rhọnvwe oruchọ wẹn.”

   Iroroẹjẹ: Wo guomariase vwẹ ọke wo de yovwunu-u. Wo jẹ unueyovwo wẹn dia kerẹsiẹ a da mrẹ nẹ wọ tanẹ, “Mi che yovwunu kẹ obo mi ruru siẹrẹ wo de yovwunu kẹ obo wo ruru.”

   Odjekẹ ri Baibol: “E gbe jẹn avwanre nene idjerhe rẹ ufuoma.”​—Rom 14:19.