Oshọ rẹ wọ vwọ vwomakpahotọ kẹ Jihova ji bromaphiyame mu we? Ọ da dia ọtiọyen, uyovwinrota nana cha chọn wẹ uko vwo phi oshọ wẹn kparobọ.

Vwẹ uyovwinrota nana

•  Kẹ mi de ru umwemwu ọgangan ọke mi de bromaphiyame nu vwo?

•  Kẹ ọ da dianẹ me djoshọ rẹ oghwa ro che nene omaebrophiyame vwo?

•  Kẹ ọ da rha dianẹ mi no nẹ mi muwan rẹ ohwo rọ ga Jihova-a vwo?

•  Oborẹ edje wẹn tare

 Oboresorọ ọ vwọ dia ọdavwẹ: Ọ sa dianẹ wo vughe ohwo ro ru umwemwu ọgangan ra djẹ nẹ ukoko na. (1 Kọrẹnt 5:​11-13) Udu se bru we nẹ ọ je sa phia kẹ wẹ.

 “Mi vwo roro kpahen omaebrophiyame, oshọ nẹ mi che ru umwemwu ọke vwọ yanran mu vwe mamọ. Me riẹn oborẹ oma cha vo ọsẹ vẹ oni mẹ te siẹrẹ ọ da phia.”​—Rebekah.

 Ẹkpo ri Baibol: “Jẹn oruimwemwu jẹ imwemwu rọye vwo . . . jẹn o rhivwi bru Ọrovwohwo, rere o ni arodọvwẹ rọye, bru Ọrovwohwo, kidie evwoghovwo rhere buebu.”​—Aizaya 55:7.

 Roro kpahọn: Dede nẹ a djẹ ohwo ro ru umwemwu rọ rhọnvwe kurhẹriẹ-ẹ nẹ ukoko na, jẹ Jihova gbe arodọnvwẹ kẹ ihwo ri kuobọrhẹriẹ je vwomakpotọ rhiabọreyọ odjekẹ.​—Une rẹ Ejiro 103:​13, 14; 2 Kọrẹnt 7:11.

 Jẹ, uyota na kọna: Dede nẹ avwanre gbare-e, jẹ a sa sen ọdavwini womarẹ ukẹcha rẹ Ọghẹnẹ. (1 Kọrẹnt 10:13) Ono yen che brorhiẹn rẹ oborẹ wo che ru? Wẹ? Gbanẹ ohwo ọfa?

 “Oshọ mu vwe nẹ mi che ru umwemwu ọgangan mi de bromaphiyame nu, ẹkẹvuọvo me rhe mrẹvughe nẹ mi vwo siomauko vwọ kẹ omaebrophiyame yen cha ma bra. Me mrẹvughe nẹ, ọ dia obo ri yovwirin me vwọ vwẹ uphẹn kẹ oshọ nẹ ọ da vwẹ obọ ji-i.”​—Karen.

 Obo ra ta na kọna: Wo de brorhiẹn wọ vwọ kẹnoma kẹ imwemwu egangan, wo se phikparobọ​—ọtiobo rẹ buebun rẹ idibo ri Jihova ji ruẹ.​—Filipae 2:12.

 Wọ guọnọ ukẹcha efa? Ni “Mavọ Me sa Vwọ Kẹnoma kẹ Ọdavwini?”

 Oboresorọ ọ vwọ dia ọdavwẹ: Kerẹ udje, wo se vughe ighene evo re yanjẹ orua vẹ igbeyan rayen vwo ji kpo awusheri rere ayen se vwo ru bunphiyọ vwẹ ẹga ri Jihova. Udu se bru we nẹ ihwo cha rhẹro rọyen nẹ wo ji che ru ọtiọyen.

 “Onenikristi ro bromaphiyame re, se muwan vwọ kẹ ewian buebun vwẹ ẹga ri Jihova, ẹkẹvuọvo ihwo evo ji rhi muegbe rẹ ayen vwọ vwomakpahotọ-ọ yẹrẹ ẹdia rayen je rhe vwẹ uphẹn kẹ ayen vwo ru ọtiọye-en.”​—Marie.

 Ẹkpo ri Baibol: “Ẹkẹvuọvo e jẹn dohwo diruo rọye davwini, ko mrẹ obo rọ vwọ yeyan kẹ Omobọ rọye ọvo ọ gbe dia ọrivẹ rọye-e.”​—Galesha 6:4.

 Roro kpahọn: Ukperẹ wọ vwọ vwẹ oma vwanvwe ihwo efa, tẹnrovi eta rehẹ Mak 12:30: “Wọ me vwẹ udu wẹn ejobi guọnọ Ọrovwohwo Ọghẹnẹ.”

 Noso nẹ udu wẹn ejobi yen wọ cha vwọ ga Jihova​—ọ dia ọ rẹ ohwo ọfa-a. Wo de ghini vwo ẹguọnọ ri Jihova, wọ cha guọnọ idjerhe wọ vwọ vwẹ ẹga kẹ ọtiobo rẹ ẹgba wẹn muru.

 “Dede nẹ omaebrophiyame ọyen obo re ghanre mamọ, jẹ ọ dia ọyen ọ vwọ dia oghwa ọhọhọhọ-ọ. Wo de kuomagbe emamọ rẹ ihwo, ayen cha vwẹ ukẹcha kẹ wẹ ọke wọ da guọnọ ukẹcha. Wo vwo rhiabọreyọ eghwa ra vwọ kẹ wẹ ọke vwọ yanran na, ọ cha nẹrhẹ aghọghọ wẹn bunphiyọ. Wọ da kẹnoma kẹ omaebrophiyame, jẹ wọ vwẹ ukẹcha kẹ oma wẹ-ẹn.”​—Julia.

 Obo ra ta na kọna: Ru ọdavwaro ru wo vwo kpahen ẹguọnọ rẹ Jihova dje kẹ wẹ ganphiyọ. Ọyena che mu we vwo ru asan rẹ ẹgba wẹn teri vwẹ ẹga rọyen.​—1 Jọn 4:19.

 Wọ guọnọ ukẹcha efa? Ni “How Responsible Am I?”

 Oboresorọ ọ vwọ dia ọdavwẹ: Jihova yen Osun rẹ akpọ vẹ odjuvwu; a da vwanvwọn, ihworakpọ te emu vuọvo vwẹ obaro rọye-en! Wo se roro sẹ Jihova tobọ riẹn sẹ wẹ herọ yerẹn.

 “Kidie nẹ ọsẹ vẹ oni mẹ Iseri ri Jihova, udu ko bru vwe nẹ me de ‘riuku’ rẹ oyerinkugbe vẹ Jihova mie ayen, udu ji bru vwe nẹ Jihova ji rhi si vwe komobọ kẹrẹ oma rọye-en.”​—Natalie.

 Ẹkpo ri Baibol: “Ohwo ọvuọvo se bru uvwe rhe-e jọkpa nẹ Ọsẹ na ro ji vwe na siro.”​—Jọn 6:44.

 Roro kpahọn: Wo vwo roro kpahen omaebrophiyame se djephia nẹ Jihova guọnọ si we kẹrẹ oma kerẹ ugbeyan rọyen. Wọ guọnọ rhiabọreyọ edurhie na?

 Karophiyọ nẹ, Jihova yen phi iwan na phiyotọ kẹ ihwo ro che se te oma, ọ dia owẹ yẹrẹ ohwo ọfa-a. Ota rọyen kẹ wẹ imuẹro nẹ wo de “si kẹrẹ Ọghẹnẹ, . . . [ko] si kẹre owẹ.”​—Jems 4:8.

 “Wọ sa vwọ riẹn Jihova ji sikẹrẹ nure na, ọyena odjephia nẹ o vwo ẹguọnọ wẹn. Eriyina, ẹwẹn wẹn da vuẹ wẹ nẹ wo muwan rẹ ohwo rọ ga Jihova-a, gba karophiyọ oma wẹn nẹ ọ rhọnvwephiyọ iroro tiọyena-a. Ọkieje yen ota ri Jihova vwọ gba.”​—Selina.

 Obo ra ta na kọna: Wọ da yanmu iwan ri Baibol ra guọnọre e ki se bromaphiyame, kọyen wo muwan rẹ ohwo rọ sa ga Jihova. Karophiyọ nẹ Jihova yen fo ohwo ra ga.​—Ẹvwọphia 4:11.

 Wọ guọnọ ukẹcha efa? Ni “Diesorọ Me Vwọ Nẹrhovwo?”