•  Oborẹ ofori nẹ wọ riẹn

•  Obo wo se ru

•  Oborẹ edje wẹn tare

 A sa vwẹroso owẹ siẹrẹ wọ da dia ohwo rẹ uyota. Wọ vwọ yan nene irhi rẹ ọsẹ vẹ oni wẹn họhọ a vwọ hwosa ra re re. Wọ re osa rẹ ẹmienyo rẹ ọsẹ vẹ oni wẹn, siẹrẹ wọ da sa ‘hwosa’ wọ rere, ke se momo ‘igho’ (yẹrẹ egbomọphẹ) ọfa kẹ wẹ. Vwọ fẹnẹ ọyena, a rha sa vwẹroso owẹ-ẹ, wo jẹ o gbe we unu siẹrẹ ọsẹ vẹ oni wẹn de si obọ rẹ ‘egbomọphẹ’ wẹn kpotọ-ọ.

 Ọ reyọ ọke a ke sa vwẹroso ohwo. Ofori nẹ wo dje uvi rẹ uruemu phia tavwen ọsẹ vẹ oni wẹn ke kẹ wẹ egbomọphẹ kpobarophiyọ.

 IKUEGBE RẸ OBO RE PHIARE: “Kerẹ eghene (rọhẹ uvwre rẹ ẹgbukpe 13 fi 19), Me riẹn oborẹ ọsẹ vẹ oni mẹ guọnọre nẹ mi ru, ki mi me ruẹ kerẹsiẹ a da mrẹ nẹ oborẹ ayen guọnọre yen mi ruẹ, ẹkẹvuọvo, obo rehẹ ẹwẹn mẹ yen mi ruẹ vwẹ odjahọn. Ọyena da nẹrhẹ ọ bẹn kẹ ọsẹ vẹ oni mẹ rẹ ayen vwọ vwẹroso ovwẹ. Ọke evo vwọ wan nu, me da rhe riẹn nẹ idjerhe vuọvo yen a sa vwọ mrẹ egbomọphẹ, jẹ ọ dia e vwo gun efia-an. Ofori nẹ wọ dia ohwo rẹ uyota rere a sa vwẹroso owẹ.”—Craig.

 Dia ohwo rẹ uyota—ọ rha tobọ shephiyọ kẹ wẹ-ẹ. Avwanre eje yen ruẹ chọ, ẹkẹvuọvo, e vwo gun efian (yẹrẹ e vwo jẹ ẹkpo na eje ẹta rere e vwo jẹ uyota na ẹriẹn) cha nẹrhẹ ọ bẹn ọsẹ vẹ oni wẹn vwọ vwẹroso owẹ. Ukperẹ ọtiọyen, wọ da ta uyota ọkieje, ọsẹ vẹ oni wẹn ke cha mrẹ nẹ wọ nabọ ghwanre tedje wọ vwọ rhọnvwe oruchọ wẹn. Oka rẹ ohwo ọtiọyen yen a sa vwẹrosua.

 “Ọ dia e vwo ru chọ yen nẹrhẹ e jẹ ẹroẹvwoso ohwo-o, ẹkẹvuọvo wọ da davwen wo vwo rhurhu echobọ wẹn, a rha cha vwẹroso owẹ-ẹ.”​—Anna.

 Baibol na tare: “Avwanre . . . guọnọ ruẹ emu rẹ ọghọ vwi kemu kemu ejobi.”—Hibru 13:18.

•   Obo re roro kpahen: Ọsẹ vẹ oni wẹn da nọ wẹ asan rẹ wọ ra vẹ oborẹ wo re ru, wọ vuẹ ayen uyota na? Yẹrẹ ayen da nọ wẹ asan rẹ wo nẹ cha vẹ obo wo ruru vwẹ asan na, wọ djahan ẹkpo evo ri fori nẹ ayen riẹn?

 Muomaphiyọghọ. Muọghọ kẹ irhi rẹ uwevwin na eje. Fobọ wian ewian ra ghare te we. Yan mu ọke rẹ ọrhuẹrẹphiyotọ ejobi. Wọ kẹnoma kẹ iruo ra vwọ kẹ wẹ vwẹ isikuru-u. Yan mu ọke ra guọnọ nẹ wọ dia otafe te.

 “Ọsẹ vẹ oni wẹn da rhọnvwe nẹ wọ vẹ igbeyan wẹn kpo ada, ẹkẹvuọvo ayen da vuẹ wẹ nẹ wo rhinvwin rhe vwẹ ugọjọ 9:00 rẹ ovwọnvwọn, wọ da dia te ugọjọ 10:30, wọ vwẹro roro nẹ ọkiọfa, ayen cha rhọnvwe kẹ wẹ nẹ wẹ vẹ igbeyan wẹn kpo ada-a!”—Ryan.

 Baibol na tare: “Dohwo doghwa rọye gba cha ghwa.”—Galesha 6:5.

•   Obo re roro kpahen: A riẹn wẹ phiyọ ohwo rọ yan muẹ ọke, rọ wian owian rọyen re vwẹ ọke re bru kẹ, kugbe ohwo ro muọghọ kẹ irhi, tobọ te irhi ri je we-e?

 Chirakon. Siẹrẹ ọsẹ vẹ oni wẹn rha sa vwẹroso owẹ ọfa-a, ọ cha reyọ ọke ayen ke sa rhoma vwẹroso owẹ. Muegbe wọ vwọ hẹrhẹ.

 “Ofu dje vwe ọke rẹ ọsẹ vẹ oni mẹ vwọ sen nẹ ayen cha rhọnvwen nẹ mi ru erọnvwọn evo-o, dede nẹ me ghwanre tedje na re. Me rhe riẹn re nẹ a vwọ ghwanre vwẹ ikpe vẹ a vwọ ghwanra tedje dia ọvo-o. Me da vuẹ ọsẹ vẹ oni mẹ nẹ ayen kẹ vwẹ uphẹn mi vwo djephia nẹ ayen sa vwẹroso ovwẹ. Dede nẹ ọ reyọ ọke, jẹ ọ wianre. Me da rhe riẹn nẹ ọ dia ikpe yen nẹrhẹ a vwẹroso ohwo-o; ẹkẹvuọvo, uruemu.”—Rachel.

 Baibol na tare: “Wa davwe oma rẹ ovwan ni.”—2 Kọrẹnt 13:5.

•   Obo re roro kpahen: Rere ọsẹ vẹ oni wẹn sa vwẹroso wẹ (yẹrẹ rhoma vwẹroso owẹ), die yen erọnvwọn evo wo se ru ‘vwo dje oka rẹ ohwo wọ hepha’?

 ODJEKẸ: Bru ẹkẹn kẹ oma, ọ sa dia a vwọ yan mu ọke, wian owian rẹ ohwo re, nene urhi re vwo mu yẹrẹ orọnvwọn ọfa. Vuẹ ọsẹ vẹ oni wẹn kpahen orhiẹn wo bruru, rere wọ nọ ayen oborẹ ayen guọnọre nẹ wo ru ayen sa vwọ vwẹroso owẹ. Gba wian gan wo vwo nene uchebro rẹ Baibol nana: “Ku oma rẹ ovwan rẹ awanre na kugbe uruemu rẹ ovwan rẹ awanre na” kufia. (Ẹfesọs 4:22) Ọke vwọ yanra na ọsẹ vẹ oni wẹn cha mrẹ ẹyan obaro wẹn!