•  Diesorọ wọ vwọ vwẹ ọke wẹn ruiruo vwẹ idjerhe abavo?

•  Obo wo se ru

•  Oborẹ edje wẹn tare

•   Ọke họhọ igho. Wọ da ghwọrọ kufia, wọ rha cha mrẹ vwo ruiruo ọke wọ da guọnọ-ọ. Ukperẹ ọtiọyen, wọ da nabọ rhuẹrẹ ọke wẹn phiyọ, kẹ wọ cha mrẹ ọke vwo ru erọnvwọn efa re vwerhoma!

   Uyono rẹ Baibol: “Erhi rẹ ọvwiẹrẹ ro ẹwan, yo vwo emuọvo-o, yẹ erhi rẹ ọgba mrẹ ria buebu.”—Isẹ 13:4.

   Ẹkpo na: Wọ da vwẹ ọke wẹn ruiruo vwẹ idjerhe abavo, ọ cha nẹrhẹ wo vwo ọke buebun.

•   Ọke re vwo ruiruo vwẹ idjerhe abavo, ọyen uyono rọ cha vwẹ ukẹcha kẹ wẹ ọke wọ da ghwanre re. Ọ cha chọn wẹ uko vwọ sẹro iruo wẹn. Gbanẹ wọ da choeki, wọ cha rhọnvwe nẹ ohwo rọ fobọ te iruo-o wian kẹ wẹ?

   Uyono rẹ Baibol: “Ohwo rọ dia ọvwata vwe emu otete, ọye je dia ọvwata vwẹ emu rode.”—Luk 16:10.

   Ẹkpo na: Oborẹ ohwo reyọ ọke rọyen vwo ruiruo wan dje oka rẹ ohwo rọ hepha.

 Vwọrẹ uyota, ọ lọhọre a vwọ vwẹ ọke ruiruo vwẹ idjerhe abavo-o. Jẹ a fuẹnrẹn ebẹnbẹn evo.

 Ebẹnbẹn #1: Igbeyan

 “Siẹrẹ igbeyan mẹ de se vwe nẹ mi nene ayen kpo ada, vwẹ ọke buebun, mi nene ayen, ọ da tobọ dianẹ mi vwo ọke-e. Kẹ mi roro, ‘ẹhẹn, mi se brokpakpa ru ewian na ọke mi de rhivwin rhe.’ Ọ dia ọkieje yen iroro mẹ na vwọ wia-an, erọnvwọn she chọ mamọ ọke buebun.”—Cynthia.

 Ebẹnbẹn #2: Erọnvwọn ri mu ẹwẹn ohwo reyọ

 “TV họhọ ijini re vwo rien uwevwin. Ughe evo si urhuru te asan rọ da bẹn e vwo siobọ nẹ ayen.”—Ivy.

 “Me sa ghwọrọ inọke buebun vwọ nyẹ itablẹti mẹ. Ọ da vwẹ kidie, emu vuọvo rọ sa da vwẹ obọ jẹ yen siẹrẹ ibatri rẹ itablẹti mẹ de re.”—Marie.

 Ebẹnbẹn #3: A vwọ kpare ẹdẹ

 “Me kpare iruo ra kẹ vwẹ vwẹ isukuru vẹ ewian efa ri fori nẹ mi ru kpẹ ọke ọfa. Kẹ me ghwọrọ ọke mẹ vwo ruẹ erọnvwọn ri fiemu-u tavwen mi ki che ru iruo ra kẹ vwẹ vwẹ isukuru, ọnana ghwa dia omamọ rẹ idjerhe ra vwọ reyọ ọke vwo ruiruo-o.”—Beth.

1.   Si ewian wọ cha wian phiyotọ. Enana sa dia ewian wo ruẹ vwẹ uwevwin vẹ e ra kẹ wẹ vwẹ isukuru. Si uchọke wo che vwo ruiruo vuọvo vwẹ udughwrẹn na.

    Uyono rẹ Baibol: “Vughe obo ri yovwiri.”—Filipae 1:10.

2.   Si erọnvwọn wọ guọnọ ru ọke wo de vwo uphẹn. Enana sa dia erọnvwọn kerẹ e vwo ni TV vẹ a vwọ vwẹ sosha nẹtwọku vwo ruiruo. Wo mi ji si uchọke wọ ghwọre vwẹ erọnvwọn na vuọvo vwẹ udughwrẹn na phiyotọ.

    Uyono rẹ Baibol: “Vwẹ aghwanre . . . yeri, we kuẹ ọke fia-a.”—Kọlose 4:5.

3.   Vwo ọrhuẹrẹphiyotọ. Rhoma re ni ẹkpo ivẹ wo si ri na. Wọ rhuẹrẹ ọke phiyọ vwọ kẹ ewian re ma ghanre? Ofori nẹ wọ si ọke wọ cha ghwọrọ phiyọ akpọẹriọ kpotọ?

    Odjekẹ: Si obo wo che ru kẹdẹ kẹdẹ phiyotọ, wọ jokaphiyọ o rẹ wo ru nu re.

    Uyono rẹ Baibol: “Iroro rẹ ohwo rọ vwẹ ẹro te otọ je yovwo-o.”—Isẹ 21:5.

4.   Yan mu ọrhuẹrẹphiyotọ wẹn. Vwọrẹ uyota, wọ sa sen edurhie rẹ akpọẹriọ evo enẹna rere wo se vwo ru erọnvwọn re ma ghanre. Ukuotọ rọyen, wọ cha mrẹ nẹ wo vwo ọke buebun, wọ je cha riavwerhe rẹ ọke wẹn.

    Uyono rẹ Baibol: “We jẹ oma rhọ oruru rẹ ovwa-an.”—Rom 12:11.

5.   Jiri oma wẹn—ẹkẹvuọvo wo jẹ ọ phẹrẹ nọ-ọ. “Ọkiọvo mi se ru erọnvwọn ivẹ vwẹ obo mi si phiyotọ nẹ mi che ru kẹdẹ kẹdẹ, mi de ruo nu, ki mi roro, ‘Ẹhẹn, me sa vwẹ ibrẹro 15 vwo ni TV rere mi rhivwin kpo ovwian mẹ.’ Ẹkẹvuọvo, ibrẹro 15 mi kpo 30, ibrẹro 30 mi kpo unọke ọvo, mi rhi vwo ni, me ghwọrọ inọke ivẹ vwo ni TV re!” Ọtiọyen eghene aye re se Tara tare.

    Die yen e se ru? Ni akpọẹriọ kerẹ erere rẹ ohwo mrẹ siẹrẹ o de ru owian rọyen eje nu, ọ dia ẹbẹrẹ ọvo rẹ owian rẹ ohwo-o.

    Uyono rẹ Baibol: “Emu ọfa rha herọ ro yovwi ko ohwo-o jokpa nẹ . . . rere ọ mrẹ avwerhe rẹ owian rọye.”—Aghwoghwo 2:24.