Uyovwinrota nana che dje obo ro fori nẹ wọ riẹn kpahen

•  Ohwo wo si ovuẹ rhe

•  Obo wo si

•  Ọke wo vwo sio

Vwẹ uyovwinrota nana, wọ je cha mrẹ:

•  Odjekẹ ro shekpahen ovuẹ re siẹ rhe ohwohwo

•  Enọ ri shekpahen ovuẹ re siẹ rhe ohwohwo

 Buebun rẹ ighene no nẹ ovuẹ re siẹ rhe ohwohwo, ọyen idjerhe vuọvo ra sa vwọ ta ota kẹ ihwo. Ọ nẹrhẹ wọ sa ta ota kẹ ihwo rẹ wọ sẹro rẹ ukeri rẹ ifonu rayen, jokpanẹ ọsẹ vẹ oni wẹn dawobọ ji.

 “Oma vwerhen ọsẹ mẹ siẹrẹ mẹvwẹ vẹ oniọvo mẹ da ta ota kẹ emeshare-e, jokpanẹ kẹ itẹlifonu rọhẹ evunrẹ utuwevwin na yen avwanre vwo se ayen, ọ me je dia ọke rẹ ihwo efa da hẹ etiyin.”—Lenore.

 Obo ro fori nẹ wọ riẹn: Wọ da vwẹ ukeri rẹ ifonu wẹn vwọ kẹ kohwo kohwo, ọ sa so okpetu kẹ wẹ.

 “Wọ rha jomaotọ kpahen ihwo rẹ wọ vwẹ ukeri rẹ ifonu wẹn kẹ-ẹ, e se si evuẹ yẹrẹ vwẹ ifoto wọ guọnọre-e vwo rhe we.”—Scott.

 “Ọmọshare de si ovuẹ rhe ọmọtẹ yẹrẹ ọmọtẹ de si ovuẹ rhe ọmọshare kọke kọke, ọnana sa nẹrhẹ wọ fobọ vwo ẹwẹn kpahen ohwo tiọyena.”—Steven.

 Baibol na da ta: “Ọvwiroro da mrẹ ukpokpogho rọ cha ko sioma rọye reyọ.” (Isẹ 22:3) Wọ da jomaotọ, wọ sa kẹnoma kẹ okpetu buebun.

 Obo re phiare: “Mẹvwẹ vẹ ọmọshare ọvo ugbeyan mamọ, ọkieje yen avwanre vwo siẹ ovuẹ rhe ohwohwo. Mi di roro nẹ igbeyan ghevweghe yen avwanre hepha. Mi mrẹ obo re chọre vwọ jovwo-o, bẹsiẹ ọ ke rhe vuẹ vwẹ nẹ ọyen vwo ẹguọnọ mẹ. Ke me rhe mrẹvughe nẹ ọ chọre mi vwo sikẹrẹ ọtiọyen, ji si ovuẹ rhe kirobo mi ruẹ jovwo na.”—Melinda.

 Roro: Die wo rorori nẹ ọ cha phia kẹ oyerinkugbe rẹ Melinda vẹ ọmọshare yena asaọkiephana?

 E jẹ a rhoma sio! Die yen Melinda re ru jovwo o vwo djephia nẹ ugbeyan ghevweghe yen ayen hepha?

 Ọ lọhọre e vwo si ovuẹ rhe ohwo, ọ je kẹ ohwo omavwerhovwẹn, ọtiọyen ọ je lọhọ ọ vwọ chọrọ ohwo ẹro nẹ, e se vwo ẹruọ rẹ obo re siri chọ.

 Obo ro fori nẹ wọ riẹn: E se vwo ẹruọ rẹ ovuẹ wo si rhe ohwo.

 “Wọ cha sa riẹn iroro vẹ upho rẹ ohwo vwọ ta ota siẹrẹ ọ da vwẹ ifonu vwo si ovuẹ rhe we-e, ọ da tobọ dianẹ ọ vwẹ ihoho rẹ ehwẹ yẹrẹ oviẹ vwọba. A sa reyọ ota wẹn phiyọ idjerhe ọfa.”—Briana.

 “Mi vughe emetẹ evo ri miovwon odẹ rayen, a da rhe riẹn ayen phiyọ ihwo re frẹfrẹ fikirẹ oborẹ ayen si rhe emeshare womarẹ ifonu.”​—Laura.

 Baibol na da ta: “Iroro rẹ ọvwata nabọ roro ota te rọ ke kpahọn.” (Isẹ 15:28) Die yen ọyena yono avwanre? Nabọ se ovuẹ wo siri tavwen wọ kẹ “sẹndi” rọyen!

 Wọ sa vwẹ aghwanre vwọ vwẹ irhi ri che sun we vwo mu, ọke wọ da vwẹ ifonu vwo siẹ ovuẹ.

 Obo ro fori nẹ wọ riẹn: Wo rhe nomaso ọke wo de siẹ ovuẹ-ẹ, ọ sa nẹrhẹ e ni we kerẹ ohwo ro yinvwaro, ọ me nẹrhẹ ihwo kẹnoma kẹ wẹ ukperẹ ayen vwo sikẹre owẹ.

 “Ọ pha lọlọhọ rẹ irhi re vwo mu komobọ nẹ i sun ohwo ọke ra da vwẹ ifonu vwo si ovuẹ, vwọ chọrọ ohwo ẹro. Ọke evo rẹ mẹvwẹ vẹ ihwo da ta ota yẹrẹ riemu, je me vwẹ ifonu vwo siẹ evuẹ rhe ohwo ọfa.”—Allison.

 “Ọyen emu rẹ imuoshọ a vwọ vwẹ ifonu si ovuẹ ọke ra da djẹ imoto. Wo rhe gbẹrophiyotọ wọ da djẹ imoto-o, wo se vwo asidẹnti.”—Anne.

 Baibol na da ta: “Kidie vwọ kẹ kemu kemu o vwo ẹghẹre, . . . ọke ra vwọ fọ, vẹ ọke ra vwọ ta ota.” (Aghwoghwo 3:1, 7) Kirobo rẹ ota yena shekpahen otaẹtakuẹgbe, eriyin o ji shekpahen a vwọ vwẹ ifonu siẹ ovuẹ rhe ohwohwo!

Ohwo wo siẹ ovuẹ rhe

•  ;-)Kerhọ kẹ iji rẹ ọsẹ vẹ oni wẹn.​—Kọlose 3:20.

•  ;-)Sane ihwo rẹ wọ vwẹ ukeri rẹ ifonu wẹn kẹ. Siẹrẹ wọ da vwẹ aghwanre vwọ djahen evuẹ romobọ wẹn kẹ ihwo evo, ọyena cha vwẹ ukẹcha kẹ wẹ ọke rẹ wo de te omiragua.

•  ;-)Wo jẹ a riẹn wẹn phiyọ ohwo rọ frẹfrẹ fikirẹ evuẹ wọ vwẹ ifonu siẹ rhe ihwo-o. Kidie udu wẹn da rhe ruọ sheri re, ọ cha so ebẹnbẹn rẹ iroro vẹ ofudjevwe kẹ wẹ.

 “Oma mẹ vwerhen ọsẹ vẹ oni mẹ fikirẹ oborẹ me vwẹ ifonu mẹ vwo ruiruo wan, ayen vwẹroso owẹ nẹ me riẹn ihwo rẹ me cha vwẹ ukeri rẹ ifonu mẹ kẹ.”​—Briana.

Obo wo si

•  ;-)Tavwen wo ki si, nọ oma wẹn, ‘Ofori me vwọ vwẹ ifonu si ovuẹ nana?’ Ọkiọvo o che yovwin a vwọ vwẹ ifonu se ohwo na yẹrẹ hẹrhẹ ọke a vẹ ọyen cha vwọ mrẹ ohwohwo.

•  ;-)Obo wọ cha sa vwẹ unu wẹn ta-a, wo sio-o. “O rhe fo obo ra ta phia-a, kọyen o ji fo obo ra vwẹ ifonu si-i,” eriyin Sarah rọhẹ ẹgbukpe 23 tare.

 “Ohwo da vwẹ erharhe rẹ ifoto rhe we womarẹ ifonu, wọ me vuẹ ọsẹ vẹ oni wẹn. Ayen cha vwẹ ukẹcha kẹ wẹ, je vwẹroso wẹ.”—Sirvan.

Ọke wo vwo sio

•  ;-)Brorhiẹn rẹ ọke wọ cha vwọ vwẹ ifonu ruiruo vẹ ọke wo vwo fuon. “Me vwẹ ifonu kẹroma ọke me da riemu yẹrẹ se ẹbe-e,” eriyin ọmọtẹ re se Olivia tare. “Mi fuon ọke me da hẹ uyono rere mi vwo jẹ ifonu na eno.”

•  ;-)Guọnọ erhuvwu rẹ ihwo efa. (Filipae 2:4) Wọ vwẹ ifonu siẹ ovuẹ rhe ihwo efa ọke wẹ vẹ ohwo de gbiku-un.

 “Me vwẹ urhi mu kẹ oma mẹ nẹ me cha vwẹ ifonu si ovuẹ rhe ihwo efa ọke me vẹ igbeyan mẹ da ta ota-a, jokpanẹ ọ da dia obo ro fori nẹ e ru. Me je vwẹ inọba mẹ vwọ kẹ ihwo mi vugheri-i.”—Janelly.