“Ọkievo me sa sẹro rẹ ẹrẹnvwe mẹ, ẹkẹvuọvo vwẹ ọke efa mi se ruẹ ọtiọye-en!”—James.

 “Ọke rẹ ophu de mu vwe, mi roro eta mẹ tavwen me ke ta aye-en, ẹwẹn mẹ de rhe totọ ke me ta eta buẹn nọ. Kọyen ọkieje me vwọ ta chọ.”—Marie.

 Baibol na da ta: “Ẹrẹnvwe na vwenẹ erhanre o ruẹ,” kugbe “umwerhanre rọ nẹrhẹ ekrun irhe rode torhẹ!” (Jems 3:5, 6) Ọkieje yen eta wẹn vwo phi we phiyọ okpetu? O da dia ọtiọyen, uyovwinrota nana cha chọn wẹ uko.

•  Diesorọ me vwọ ta chọ?

•  Re vwo sun ẹrẹnvwe rẹ ohwo

•  Oborẹ edje wẹn tare

 Jẹgba. Baibol na da ta: “Avwanre sheri vwẹ oma rẹ emu buebu. Ohwo ro rhe she vwẹ oma rẹ ota-a, yẹ ohwo yena omamọ rẹ ohwo.” (Jems 3:2) Kidie nẹ avwanre gbare-e, avwanre sa kprowọ je ta chọ.

 “Fikirẹ jẹgba, ọyen emu rẹ ẹkpa siẹrẹ me da tanẹ mi se sun iroro vẹ ẹrẹnvwe mẹ ọkieje.”—Anna.

 A vwọ ta ota buẹn nọ. Baibol na da ta: “Ohwo da dia ọgbota, riẹn nẹ oruchọ karobọ-ọ.” (Isẹ 10:19) Ihwo re dia egbota, ri nyo te ayen ke kpaha-an, fobọ gbe ihwo efa kuẹ vẹ eta rayen.

 “Ọ dia ohwo rọ ma ta ota buẹn yen me vwo aghwanre-e. Jesu yen ohwo ro me vwo aghwanre rọ dia akpọ na dẹvure, dedena o ji vwo ọkievo rọ vwọ fotovwin.”—Julia.

 Eta rẹ ehwẹjẹ. Baibol na da ta: “Ohwo ọvo herọ rẹ eta rọye epha kpatakpata kerẹ adjara ro duvwẹ ohwo.” (Isẹ 12:18) Ọvo usun rẹ eta ri duvwun ohwo kerẹ adjara yehẹ eta ra vwọ vwẹ ohwo jehwẹ, yẹrẹ ọjẹfia. Ihwo re vwẹ ihwo efa vwọ jehwẹ sa ta, “Eha yen me hepha!” Ẹkẹvuọvo, ophọphọvwe cha sa dia eha diodi-i. Baibol na vuẹ avwanre nẹ a kẹnoma kẹ “ọphọphọvwe . . . vẹ ọnko.”—Ẹfesọs 4:31.

 “Me nẹrhẹ ihwo phiyọ ehwẹ mamọ, ureumu nana nẹrhẹ me vwẹ ihwo jehwẹ, o ji phi vwe phiyọ okpetu kọke kọke.”—Oksana.

 Ọ lọhọre re vwo sun ẹrẹnvwe rẹ ohwo-o, ẹkẹvuọvo Baibol na sa chọn avwanre uko. Kerẹ udje, roro kpahen ẹkpo nana.

 “Nene udu wẹn gbe ikun, . . . re wọ fọ gbiẹi.”—Une Rẹ Ejiro 4:4.

 Ọkiọvo ẹkpahọnphiyọ ro me yovwin kparobọ ọyen ra vwọ fọ gbiẹi. Eghene aye ọvo re se Laura da ta: “Ọ dia oborẹ oma ru vwe ọke rẹ ophu vwo mu vwe, yen o ji che ru vwe ọke rẹ ophu na de kpotọ nu-u. Ẹwen mẹ de totọ re, oma kọ vwerhen ovwẹ nẹ me ta obo re brare-e.” Siẹrẹ wọ da nyoma emerha, wọ rha cha ta eta ebrabra-a.

 “Orhọn rha davwẹ eta nẹ kirobo rẹ ẹrẹnvwe unu davwe emu?”—Job 12:11.

 Wọ sa kẹnoma kẹ okpetu buebun siẹrẹ wọ da reyọ enọ nana vwọ davwen obo rehẹ ẹwẹn wẹn ni, tavwen wọ ke ta ayen phia:

•   Ota na uyota? O dje erorokẹ phia? Ofori nẹ me ta?—Rom 14:19.

•   Mavọ oma che ru vwe siẹrẹ ohwo da vuẹ vwẹ oka rẹ ota tiọyen?—Matiu 7:12.

•   O che djephia nẹ mi muọghọ kẹ iroroẹjẹ rẹ ihwo efa?—Rom 12:10.

•   Ọnana yen ọke ro fori me vwọ ta?—Aghwoghwo 3:7.

 “Vwẹ oma evwokpotọ kere phihọ nẹ ihwo efa yovwi nọ ovwan.”—Filipae 2:3.

 Uchẹbro nana cha nẹrhẹ wọ sa vwẹ ẹro abavo wo ni ihwo efa, ọ je cha chọn wẹ uko vwọ sẹro ẹrẹnvwe wẹn ji roro eta wẹn tavwen wọ ke ta ayen. Ọ da tobọ dianẹ wọ ta ota ọbrabra nure tavwen wo ki notọso, omaevwokpotọ cha nẹrhẹ wo brokpakpa yovwunu! (Matiu 5:23, 24) Wo mi ji brorhiẹn wo vwo sun ẹrẹnvwe wẹn ọke ọfa.