Baibol na vwọso udi ẹda-a, takpe nẹ urhi rẹ ẹkuotọ na rhọnvwe kẹ wẹ. Ẹkẹvuọvo, ọ vwọso udi ra da vroma.—Une Rẹ Ejiro 104:15; 1 Kọrẹnt 6:10.

 Kẹ, wo de rhe hirharoku ọnyẹ wọ vwọ da udi dede nẹ ọsẹ vẹ oni wẹn yẹrẹ urhi rẹ ẹkuotọ wẹn rhọnvwe kẹ wẹ-ẹ vwo?

•  Roro kpahen obo ri se nẹ obuko rọyen rhe

•  Brorhiẹn phiyotọ

•  Oborẹ edje wẹn tare

 Ighene evo se roro nẹ udi ẹda yen akpẹriọ. Ẹkẹvuọvo, die yen sa phia siẹrẹ wọ da da nu?

•  Urhi se mu we. Vwẹ ẹkuotọ evo, wọ da da udi jẹ wo ji rhi te ikpe rẹ urhi na rhọnvwe kẹ-ẹ, e se ho we, mu we kpo aguare, reyọ draivin ilaisẹnsi wẹn mie we, kẹ wẹ owian jẹ a cha hwosa kẹ wẹ-ẹ, yẹrẹ mu we kpo ẹkanrọ.—Rom 13:3.

•  O se miovwon odẹ wẹn. Wọ da da udi vroma, wọ cha sa nabọ sun oma wẹ-ẹn. Udi na sa nẹrhẹ wọ ta eta yẹrẹ ru erọnvwọn rẹ wọ cha viẹ diekpọvwẹ kpahen obọ. (Isẹ 23:31-33) Ma rho ọke nana rẹ ifonu vẹ intanẹti vwo muẹ evuẹ kpakpata na, uruemu wẹn se miovwon odẹ wẹn krekri.

•  Wọ rha cha sa chochọ rẹ oma wẹ-ẹn. Udi ẹda vroma sa nẹrhẹ ọ lọlọ re vwo hwe we yẹrẹ gbe we ẹgua. Ọ je sa nẹrhẹ a fobọ riẹriẹ owẹ vwo ru obo re chọre yẹrẹ obo ro se phi arhọ wẹn phiyọ ẹdia imuoshọ.

•  Ọviẹn. Iyẹnrẹn djerephia nẹ ọ pha lọlọhọ rẹ ihwo re ton udi ẹda phiyọ vwẹ ọke eghene, vwọ dia eviẹn rọyen tobọ ọke rẹ ayen da ghwanre nu. A da da udi fikirẹ ofudjevwe yẹrẹ ẹdia rẹ ọruvwohwo, ọ cha bẹn re vwo jovwo.

•  Ughwu. Vwẹ ukpe ọvo rọ wanre vwẹ United States o kri nọ-ọ na, iyẹnrẹn djerephia nẹ kẹ ibrẹro kẹ ibrẹro 52 yen asidẹnti ọgangan vwọ phia fikirẹ udi ra da vroma. Iyẹnrẹn djerephia nẹ kukpe kukpe vwẹ uvwre rẹ ẹgbukpe iyorin, ihwo re vrẹ 1,500 ri ji te ẹgbukpe ujegbọvo-o ghwuru vwẹ asidẹnti imoto rẹ ihwo re da udi vroma so ro. Wọ rha tobọ da dede-e, arhọ wẹn je hẹ imuoshọ siẹrẹ wọ da ro imoto rẹ ohwo rọ da udi vroma djẹ.

 Wọ sa kẹnoma kẹ imuoshọ rẹ udi ra da vroma sua siẹrẹ wo de brorhiẹn rẹ obo wo che ru phiyotọ.

 Uchebro rẹ Baibol: “Ọvwiroro da mrẹ ukpokpogho rọ cha ko sioma rọye reyọ.” (Isẹ 22:3) Ọyen emu rẹ ẹkpa ra vwọ da udi tavwen a ke djẹ imoto yẹrẹ ru erọnvwọn efa re guọnọ iroro abavo.

 Orhiẹn-ebro: ‘Me cha ghwanre te edje rẹ ohwo rẹ urhi rhọnvwe kẹ tavwen me ke da udi, ẹdia na mi ji shephiyọ.’

 Uchebro rẹ Baibol: “Ovwan ọviẹn rẹ ohwo rẹ ovwan reyọ oma rẹ ovwan vwo mu ọghọ kẹ.” (Rom 6:16) Wọ da da udi kidie nẹ igbeyan wẹn da, kọyen wọ vwẹ uphẹn kẹ ihwo efa nẹ ayen sun we. Wọ da da udi fikirẹ ebẹnbẹn yẹrẹ ofudjevwe, wo che se vwo iwan wọ guọnọre wo se vwo yerin ghene ebẹnbẹ-ẹn.

 Orhiẹn-ebro: ‘Me cha sa da udi fikirẹ ọnyẹ rẹ otu-u.’

 Uchebro rẹ Baibol: “Wọ dia ọvo vwẹ usun rẹ ọgba-idi na-a.” (Isẹ 23:20) Erharhe igbeyan sa nẹrhẹ ọ dia bẹnbẹn wo vwo ru nene orhiẹn wo bruru na. Wẹ vẹ ihwo re da udi vroma da yan kugbe ọkieje, ọ cha nẹrhẹ wọ vwẹrokere ayen.

 Orhiẹn-ebro: ‘Me cha vwẹ ihwo re da udi vroma vwo ru igbeya-an.’