ENỌ RẸ IGHENE NỌ
Ọ Da Dianẹ Ugbeyan Mẹ Gbevweku Vwo?
Obo ro fori nẹ wọ riẹn
Obo wo se ru
Oborẹ edje wẹn tare
Obo ro fori nẹ wọ riẹn
O vwo igbeyan ri jẹ ebẹnbẹn evwo-o. Kidie nẹ avwanre gbare-e, ugbeyan wẹn rọ ma kẹre owẹ sa ta ota yẹrẹ ru obo re cha nẹrhẹ ivun miovwon uvwe. Wẹwẹ dede je gba-a. Vwọrẹ uyota, wọ sa karophiyọ ọke ọvo rẹ wo vwo gbe ohwo ọfa ku.—Jems 3:2.
Intanẹti sa nẹrhẹ ọ dia lọlọhọ e vwo gbeweku. Kerẹ udje, eghene ọvo re se David tare nẹ: “Ọke wọ da mrẹ ifoto rẹ igbeyan wẹn ri siomakoko vwẹ intanẹti, jẹ e durhie uwe-e, wo se roro kpahen oboresorọ e vwo jẹ owẹ edurhie. Ọyena sa nẹrhẹ wo roro nẹ a phiẹn wẹn, rọ da nẹrhẹ wo muomaphiyọ.”
Wọ sa rhuẹrẹ ebẹnbẹn na phiyọ.
Obo wo se ru
Fuẹrẹn oma wẹn. Baibol na da ta: “Wọ fobọ mu ophu-u kidie udu rẹ ẹkpa ọye ophu dia.”—Aghwoghwo 7:9.
“Ọkievo wọ cha mrẹ nẹ obo re nẹrhẹ ivun miovwo uwe na tobọ fiemu-u.”—Alyssa.
Obo re roro kpahen: Emu fobọ da wẹ? Wo se yono obo re yerẹn ghene echobọ rẹ ihwo efa?—Aghwoghwo 7:21, 22.
Roro kpahen erere rọhẹ evwoghovwo. Baibol na da ta: “ọrho rode [re vwo] kuaro afi kẹ oruchọ.”—Isẹ 19:11.
“Ọ da tobọ dianẹ obo re ruru na da wẹ, o yovwirin wọ vwọ reyọ vwo ghovwo ọphọphẹ, ọyena mudiaphiyọ nẹ wọ rha cha karophiyọ ohwo na obo ro ruru na-a, yẹrẹ ruo rere ohwo na rha rẹ wẹ kọke kọke wo de ghwie ota na rhe-e. Wo de vwo ghovwo nu, gba kpairoro vrẹn.”—Mallory.
Obo re roro kpahen: Obo re phiare na ghene bra dẹn? Wọ sa reyọ vwo ghovwo fikirẹ ufuoma?—Kọlose 3:13.
A vwọ ta ota kpahen ogbeku ejobi ọkieje họhọ ohwo ro rhie ẹchẹ phiyọ vwẹ ọke rẹ ekpahen rere odju dju ro uwevwin rọ da so ekpahen
Roro kpahen ohwo ro chekọ na. Baibol na da ta: “E jẹn ohwo guọnọ erhuvwu rẹ oma rọye ọvo-o, ẹkẹvuọvo ovwan je guọnọ erhuvwu rẹ ihwo efa.”—Filipae 2:4.
“Siẹrẹ wẹ vẹ ugbeyan wẹn de vwo uvi rẹ ẹguọnọ vẹ ọghọ kẹ ohwohwo, kọyen wo vwo uvi rẹ iroro rọ sorọ wọ vwọ fobọ rhuẹrẹ ebẹnbẹn phiyọ, kidie wọ vwẹ erọnvwọn vwo ze re, rere ugbeyan na sa vwọ gan. Wọ ghwọrọ ọke vẹ ẹgba phiyọ re, wọ guọnọre nẹ obo wọ wian kẹ na va wẹ abọ-ọ.”—Nicole.
Obo re roro kpahen: Wọ sa mrẹ ẹkpo evo re gbare vwẹ ẹro rẹ ugbeyan wẹn vwo ni ota na?—Filipae 2:3.
Otọ rọyen: Wọ vwọ riẹn obo wo se vwo yerin ghene ogbeku rẹ igbeyan wẹn enẹna, cha chọn wẹn uko wo de te omiragua. Ofori nẹ wo yono uruemu yena asaọkiephana!
Wọ je sa Fuẹrẹn
Ẹkpahọnphiyọ rẹ Enọ rẹ Baibol Na
Die Yen Baibol na ta Kpahen Ugbeyan Emuo?
Omamọ rẹ igbeyan toroba uruemu rẹ ohwohwo vwọrẹ erhuvwu je nẹrhẹ a dia omamọ rẹ ihwo. Vwẹ aghwanre sane igbeyan wẹn!
Enọ rẹ Ighene Nọ
Diesorọ mi Vwo Yovwunu?
Erọnvwọn erha ri se mu we vwo yovwunu nẹ ‘wọ ghwọ-ọ,’ ọ da tobọ dianẹ wo rorori nẹ o vwo omamọ iroro rọ sorọ wo vwo ru obo wo ruru na.
Ikatunu re Siẹ Phiyọ Ophapha
Mavọ Yen E se Vwo Vughe Uvi Ugbeyan?
Erharhe igbeyan vọn asan eje, ẹkẹvuọvo mavọ wo se vwo vughe omamọ ugbeyan?
