Ọvọ usun rẹ erọnvwọn nana yen wọ sa vwẹ ẹwẹn obrorhiẹn wẹn vwo dje?

•   ikọmpasi

•   ughegbe

•   ugbeyan

•   oguẹdjọ

 Wọ sa reyọ vwo dje erọnvwọn ẹne na ejobi. Uyovwinrota nana che dje oboresorọ.

•  Die yen ẹwẹn obrorhiẹn?

•  Diesorọ wo vwo yono ẹwẹn obrorhiẹn wẹn?

•  Mavọ wo se vwo yono ẹwẹn obrorhiẹn wẹn?

•  Oborẹ edje wẹn tare

 Ẹwẹn obrorhiẹn wẹn ọyen ẹgba rẹ wo se vwo vughe obo ri yovwirin vẹ obo re brare. Baibol na tare nẹ ọ họhọ “urhi re si phiyọ ubiudu rẹ ihworakpọ.” (Rom 2:15, Contemporary English Version) Omamọ rẹ ẹwẹn obrorhiẹn chọn wẹ uko vwọ fuẹrẹn obo wọ guọnọ ruẹ yẹrẹ oborẹ wo ru nure.

•   Ẹwẹn obrorhiẹn wẹn họhọ ikọmpasi. O sun we vwẹ idjerhe ro shephiyọ rere wọ sa vwọ kẹnoma kẹ okpetu.

•   Ẹwẹn obrorhiẹn wẹn họhọ ughegbe. O dje uruemu wẹn vẹ oka rẹ ohwo rẹ wọ hepha vwẹ obevun phia.

•   Ẹwẹn obrorhiẹn wẹn họhọ omamọ rẹ ugbeyan. Ọ sa kẹ wẹ uvi rẹ uchebro je chọn wẹ uko vwo yeren omamọ akpọ siẹrẹ wọ da kerhọ rọyen.

•   Ẹwẹn obrorhiẹn wẹn họhọ oguẹdjọ. O brẹ hwe we siẹrẹ wo de ru obo re brare.

 Ẹkpo na: Ẹwẹn obrorhiẹn wẹn ọyen omamọ rẹ orọnvwọn rọ sa chọn wẹ uko vwo (1) bru omamọ rẹ orhiẹn, je (2) rhuẹrẹ echobọ wẹn phiyọ.

 Baibol na tare nẹ, “jẹ evun wẹn fon.” (1 Pita 3:16) Ọ cha bẹn wo vwo ru ọtiọyen ọ da dianẹ wo ji yono ẹwẹn obrorhiẹn wẹ-ẹn.

 “Mi guẹn efian kẹ ọsẹ vẹ oni mẹ kpahen asan re me hepha, ayen cha riẹn kpahọ-ọn. Ẹsosuọ, ẹwẹn obrorhiẹn mẹ ke kpokpo uvwe, ẹkẹvuọvo mi vwo dje eruo eruo re, o rhe fi emuọvo kẹ vwẹ-ẹ.”—Jennifer.

 Ọke vwọ yan obaro, ẹwẹn obrorhiẹn ri Jennifer de muo vwọ vuẹ ọsẹ vẹ oni rọyen kpahen obo ro ruẹ na, ọ da je dobọ rọyen ji.

 Obo re roro kpahen: Ọke vọ yen o vwo fo nẹ ẹwẹn obrorhiẹn ri Jennifer ke vwo kpokpo?

 “Ọ pha bẹnbẹn re vwo yerin akpọ rẹ aro ivẹ. Ẹwẹn obrorhiẹn wẹn da rhọnvwe kẹ wẹ nẹ wo brorhiẹn ọvo rọ chọre, kọ dia lọlọhọ wo vwo brorhiẹn ọfa rọ chọre.”—Matthew.

 Ihwo evo tobọ davwerhọ rẹ ẹwẹn obrorhiẹn raye-en. Baibol na tare nẹ udu rayen “ghwodirhe” re. (Ẹfesọs 4:19) Good News Translation tare nẹ “Ayen rhe vwo omavovwẹ-ẹ.”

 Obo re roro kpahen: Akpọ rẹ ihwo rẹ ẹwẹn obrorhiẹn rayen kpokpo fikirẹ oruchọ raye-en yen ghini me yovwin? Ebẹnbẹn vọ yen ayen cha sa kẹnoma kẹ-ẹ?

 Ẹkpo na: Wo se vwo vwo omamọ rẹ ẹwẹn obrorhiẹn, ofori nẹ wo yono ẹgba iroro wẹn rere wo “se vwo vughe emu esiri vẹ ọbrabra.”—Hibru 5:14.

 Wo se vwo yono ẹwẹn obrorhiẹn wẹn, ofori nẹ wo vwo uwan rẹ wo yeren akpọ nene. Ihwo evo yeren akpọ nene iwan rẹ:

•   orua kugbe ẹkuruemu asan rẹ ayen nurhe

•   edjedje rayen

•   ihwo ri titiri

 Ẹkẹvuọvo iwan ri Baibol na yen me yovwin. Ọyena gbe avwanre unu-u, kidie Ọghẹnẹ rọ ma avwanre rọ je riẹn obo ri me yovwin kẹ avwanre yen “mu ihwo vwo si” Baibol na.—2 Timoti 3:16.

 Roro kpahen idje evo.

 UWAN NA: “Avwanre . . . guọnọ ruẹ emu rẹ ọghọ vwi kemu kemu ejobi.”—Hibru 13:18.

•   Die yen uwan yena se mu we vwo ru ọke wo de hirharoku ọdavwini wo vwo ru ẹspo vwẹ isikuru, gun efian kẹ ọsẹ vẹ oni wẹn, yẹrẹ chuji?

•   Ẹwẹn obrorhiẹn wẹn de mu we vwo ruẹ emu rẹ ọghọ yẹrẹ dia ohwo rẹ uyota vwẹ kemu kemu, erere vọ yen wo rorori nẹ wọ sa mrẹ enẹna vẹ ọke rọ cha vwẹ obaro?

 UWAN NA: “Si oma nẹ ọfanrhiẹ.”—1 Kọrẹnt 6:18.

•    Die yen uwan yena se mu we vwo ru ọke wo de hirharoku ọdavwini wo vwo ni ihoho rẹ ihwo re banphiyọ yẹrẹ bru ehware jẹ wọ je rhe rọvwọ-ọn?

•   Ẹwẹn obrorhiẹn wẹn de mu we vwọ kẹnoma kẹ ọfanrhiẹn, erere vọ yen wọ sa mrẹ enẹna vẹ ọke rọ cha vwẹ obaro?

 UWAN NA: “Ni arodọvwẹ kẹ ohwohwo, we siẹ ohwo aro-o, vwo ghovwo ohwohwo.”—Ẹfesọs 4:32.

•    Die yen uwan yena se mu we vwo ru ọke rẹ ẹghwọ da vwomaphia vwẹ uvwre wẹ vẹ oniọvo yẹrẹ ugbeyan wẹn?

•   Ẹwẹn obrorhiẹn wẹn de mu we vwo ghovwo ji dje erorokẹ phia, erere vọ yen wọ cha mrẹ enẹna vẹ ọke rọ cha vwẹ obaro?

 UWAN NA: Jihova vwo utuoma “kpahe ohwo ro gbe ozighi.”—Une Rẹ Ejiro 11:5.

•    Die yen ofori nẹ uwan yena mu we vwo ru kpahen ojẹ rẹ ifimu, TV, kugbe ividio gemu wẹn?

•   Ẹwẹn obrorhiẹn wẹn de mu we vwọ sen erọnvwọn ra vwọ diotọ ri titi ozighi, erere vọ yen wọ cha mrẹ enẹna vẹ ọke rọ cha vwẹ obaro?

 IKUEGBE RẸ OBO RE GHENE PHIA: “Mi vwo igbeyan ri te ividio gemu ri titi ozighi, mẹvwẹ komobọ ji te. Ọsẹ mẹ da vuẹ nẹ mi che se te oka rẹ igemu tiọyena-a. Ọtiọyena, ọke me da kọn bru igbeyan mẹ ra ọvo kọyen mi vwo te. Mi de rhivwin rhe uwevwin, me rha sa ta ota vuọvo-o. Ọsẹ mẹ me nọ vwẹ nẹ die yen ru we, me me kpahen kẹ nẹ emuọvo-o. Ẹkẹvuọvo, ẹdẹ ọvo mi vwo se Une Rẹ Ejiro 11:5 nu, ẹwẹn mẹ ko kpokpo uvwe kpahen oborẹ mi ruẹ na. Me da rhe mrẹvughe nẹ ofori nẹ me dobọ rẹ ividio gemu ri mi te na ji. Me ghene dobọ rọyen ji udje nana. Ugbeyan mẹ ọvo je vwẹrokere uvwe dobọ rẹ ete rẹ igemu tiọyena ji.”—Jeremy.

 Obo re roro kpahen: Ọke vọ yen ẹwẹn obrorhiẹn ri Jeremy vwọ ton owian phiyọ, kẹ ọke vọ yen Jeremy vwọ kerhọ rọyen? Die yen wo yono vwo nẹ ikuegbe ri Jeremy na?

 Ẹkpo na: Ẹwẹn obrorhiẹn wẹn dje oka rẹ ohwo ru wọ hepha vẹ obo re ma ghanre kẹ wẹ. Die yen ẹwẹn obrorhiẹn wẹn djephia kpahen owẹ?