Cuvier beaked whale se divwin ame kokodo te ichiyin 9,816, rọ dia asan rẹ ẹgba rẹ ame ro gere ohwo kpenu da gan te omarẹ 30,300 kilopascals. Eranvwe nana sa dia otọ rẹ ame ọke grongron. Iyẹnrẹn djerephia nẹ ọvo dia otọ rẹ ame inọke 3 kugbe ibrẹro 42 tavwen ọ ke rhe enu rẹ ame rhe wẹn odju reyọ. Mavọ yen eranvwe nana sa vwọ dia ọke grongron tiọyen vẹ omodju rọ wẹn reyọ na, vwẹ asan rẹ ẹgba rẹ ame ro muẹ ohwo kpenu na da gan te ọtiọyen?

 Kerẹ eranvwe efa re dia evunrẹ ame, ibiedada ri whale nana sa nuẹ, ọnana me nẹrhẹ odju rọhẹ evunrẹ irhue na no, o mi rhi sikoko. Ihwo ri ruẹ ehiahiẹ rhe mrẹvughe nẹ ọke rẹ eranvwe re dia evunrẹ ame da wẹn ememerha, ayen rha reyọ oxygen buebun vwo ruiruo-o, ọbara rọ djẹ vwo kpo afọnrhe, ubiudu kugbe iriẹn rẹ oma na ko buẹnphiyọ.

 Vwọba, eranvwe re dia evunrẹ ame sa vwẹ ugboma rayen na vwọ sẹro rẹ oxygen womarẹ iprotini ọvo re se myoglobin. Myoglobin na siobọnẹ uche rẹ oxygen rẹ ayen guọnọre ọke rẹ ayen de divwẹn ame kokodo. Uche rẹ myoglobin rọhẹ evunrẹ eranvwe re dia urhie, bun vrẹ e ra mrẹ vwẹ oma rẹ ihworakpọ vẹ eranvwe otọ shesheri.

 Dedena, ọshare ọvo ro ruẹ ehiahiẹ da ta kpahen Cuvier beaked whale nẹ: “Oborẹ ayen divwẹn ame kodo te gbe ohwo unu. Vwo nene oborẹ oma rẹ eranvwe wian wan, whale nana divwẹn ame kokodo je dia otọ rẹ ame ọke grongron vwọ vrẹ oborẹ avwanre rhẹro rọyen.” Egbaerianriẹn guọnọ riẹn kpobarophiyọ kpahen oborẹ whale nana divwẹn ame wan, kidie ọ sa vwẹ ukẹcha vwọ kẹ idọktọ vwọ nabọ tẹn ona rẹ omaesivwon kerẹ obo re se vwo sivwin irhue ri sikoko.

 Die wo rori? Ona rẹ oborẹ Cuvier beaked whale se vwo divwẹn ame kokodo, ọ me je dia evun rọyen ọke grongron na mamarhe? Gbanẹ a marọ?