Omaẹfuọn pha ghanghanre vwọ kẹ isakpa rere ayen sa vwọ rhan, yeren asan, ji riẹn erọnvwọn re riariẹ ayen phiyọ. Kirẹ udje, idjo rẹ isakpa de gbe, ọ cha bẹn o vwo nẹ asan kpo asan, mu erọnvwọn, ji se ọrhen. Alexander Hackmann ro yono kpahen eranvwe da ta “wọ cha sa mrẹ isakpa ro gbe oma-a, ayen tẹn ona rẹ oborẹ ayen sa vwọ kẹnoma kẹ inuhu ọ da tobọ dianẹ ayen hẹ asan ro gberi.”

 Roro: Hackmann vẹ ẹko rọyen yono kpahen oborẹ isakpa re se Camponotus rufifemur vwo ru idjo rọyen fuan. Ayen mrẹ vughe nẹ isakpa reyọ awọ rayen vwo si inuhu nẹ idjo rayen, siẹrẹ ayen de gunu awọ na ọ me rhe họhọ ahwa, ayen mi vwo idjo na rien wanvrẹn. Ẹto rẹ awọ rọyen re pha chohri chohri na yen si inuhu ride nẹ idjo na. Ẹto rẹ awọ rọyen re pha hwahwa lọlọhọ na mi rhe si inuhu re hanvwere no. E re ma lọhọ na mi rhe si inuhu re pha hahavwe kerẹ ẹto rẹ ohworakpọ nẹ idjo na.

 Ni oborẹ isakpa re se carpenter ant vwo ruẹ idjo rọyen fuan

 Hackmann vẹ ẹko rọyen mrẹvughe nẹ a sa vwẹ ona rẹ isakpa vwo ru idjo rọyen fuan na vwo ruiruo vwẹ ikọmpini. Kerẹ udje, a sa reyọ ona tiọyena vwo ru ekuakua rẹ ẹlẹtroniki tutuno re pha ghanghanre fon siẹrẹ e de ru ayen, kidie emerha rẹ inuhu dede sa guọghọ ẹkuakua tiọyena.

 Die Wo Rorori: Ẹgba rẹ isakpa re se carpenter ant vwo ruẹ idjo rọyen fuan na mama rhe? Gbanẹ a maro?