Dọlfin ruẹ oka rẹ edo sansan, ayen je nabọ kerhọ rẹ edo rẹ ayen nyo rhivwin. Ọnana chọn ayen uko vwo suẹn oyan rayen, ji vwo ẹruọ rẹ oborẹ asan rẹ ayen dia na hepha. Egberiariẹn ghwọrọ ọke vwọ fuẹrẹn Sona yẹrẹ oborẹ dọlfin rẹ uwen rọyen họhọ ọgọ na (re se Tursiops truncatus) vwo nyo edo, rere ayen se vwo ru ekuakua sansan re se vwo ruiruo vwẹ obotọ rẹ urhie, ra je mrẹ ọkpọ rọyen dẹvo-o.

 Roro: Sonar yẹrẹ ẹgba rẹ ẹmienyo rẹ dọlfin na nẹrhẹ ayen sa guọnọ iyerin ri siomanẹ vwẹ ekpẹn rehẹ obotọ rẹ abadi, ọ je nẹrhẹ ayen sa riẹn ofẹnẹ rọhẹ uvwre rẹ iyerin vẹ ikuta. Kirobo rẹ Keith Brown rọ dia ogbu-ẹbe vwẹ Yunivẹsity rẹ Heriot-Watt rọhẹ Edinburgh vwẹ Scotland djere, dọlfin na sa “dia omarẹ ichiyin 33 de vughe idrọmu rọ vọnre vẹ ame rẹ urhie, ame rẹ abadi, ipẹtro, yẹrẹ ọka rẹ ame efa re fẹnẹre.” Egberianriẹn guọnọ ru erọnvwọn rẹ ẹgba rayen sikẹrẹ ọ rẹ sonar rẹ dọlfin na.

 Otu ri ruẹ ehiahiẹ nabọ frẹkotọ fuẹrẹn ẹgba rẹ ẹmienyo rẹ dọlfin na, ayen da je davwẹngba vwo ru erọnvwọn re hoherọ. Ukuotọ rọyen, ayen de ru ẹlẹtronik ra ghwẹ ifi rọyen vẹ erọnvwọn efa vọn evunrẹ idrọmu rẹ ugrongron rọyen te omarẹ ichiyin 3. E churu ẹlẹtronik na si irọbọtu rọ sa djẹ vwẹ obotọ rẹ ame. Irọbọtu na họhọ ibọmbu re se tọpẹdo. E ruro rere a sa reyọ vwọ fuẹrẹn obotọ rẹ abadi, guọnọ ifi rẹ ẹlẹtriki vẹ ipaipi re sinu, yẹrẹ dia ogboko da fuẹrẹn oborẹ ayen hepha. Ihwo ri ruro niro nẹ a sa reyọ vwo ruiruo vwẹ ikọmpini ri ruẹ ipẹtro vẹ igasi. Irọbọtu nana rọ họhọ sonar rẹ dọlfin na se phiba uche evuẹ rẹ sonar re herọ jovwo na se koko, ọ me je chọn egberianriẹn uko vwo mu ekuakua ra vwọ wian vwẹ obotọ rẹ ame phiyọ asan ri fo ayen. Vwọba, ọ je cha nẹrhẹ a riẹn asan ri shechọ, kerẹ asan re bẹre vwẹ awọ rẹ utehru rẹ ikọmpini ri ruẹ ipẹtro vwo vi vwẹ uherevie rẹ abadi. Ọ je cha tobọ nẹrhẹ e se vwo oniso rẹ asan ri dinri vwẹ ipaipi.

 Die wo rorori? Sonar yẹrẹ ẹgba rẹ ẹmienyo rẹ dọlfin na mamarhe? Gbanẹ a marọ?