Remora, ọyen oka erin rọ sa tanmuẹ oma erin vẹ eranvwe efa kokoroko, ọ je lọhọ kẹ ro vwo siomanẹ ayen, o ji bru ora phiyọ ayen oma ọke ro de sioma rọyen nẹ aye-en. Ona rẹ erin nana sa vwọ tanmuẹ asan rhanriẹn urhurusivwe rẹ ihwo ri ruẹ ehiahiẹ.

 Roro: Erin nana tanmuẹ oma rẹ erin re se ray, shark, ogbehi rẹ ame, whale kugbe eranvwe efa vwevunrẹ abadi, o toro oka rẹ ohọroma ro rhe erin na yẹrẹ eranvwe na-a. Remora ria erọnvwọn re dia oma erin vẹ eranvwe rọ tanmu kugbe emu rẹ eranvwe yẹrẹ erin na re chekọ​​—vwẹ ọke vuọvo na, eranvwe rẹ ayen tanmu na, muẹ ayen vwọ yan je chochọn rẹ ayen vwo nabọ rẹ eranvwe yẹrẹ erin efa re guọnọ ria ayen. Ihwo ri ruẹ ehiahiẹ yono kpahen enu rẹ uyovwin rẹ erin re se remora na, ayen sa vwọ mrẹ obo rọ sa vwọ tanmuẹ asan sansan kokoroko.

 Remora re rhẹrhẹ nene shark

 Enu rẹ uyovwin ri remora rọ tanmuẹ asan na pha ghorie ghorie, ọ je pha pẹpẹghẹ. Okọkọ rẹ enu uyovwin rọyen ro vwo ọkpan je dia lọlọhọ kerẹ ẹbẹre ugbunu na, me ka tanmu obo rọ guọnọ tanmuẹ na kokoroko. Uherevie rẹ enu uyovwin rẹ erin rọ tanmuẹ asan na, vwo abọ itete ri sherhẹn ji vrẹn mudia, re rhuẹrẹ oma okpokpahọn je tẹnrẹn urhiẹ. Abọ itete rẹ erin nana vwo inwe itutuno re pha ghọnghọn. Ọke rẹ abọ erin na de vrẹn mudia, inwe na ke shabọ muẹ ohọroma rẹ erin rọ guọnọ tanmuẹ na. Okọkọ rẹ uyovwin rọyen rọ tanmuẹ asan vwọba inwe re shabọ mu ohọroma rẹ erin na, me nẹrhẹ ọ nabọ tanmu erin ro muo na kokoroko. Ọtiọyena, o toro oborẹ erin ro muro na rhẹrhẹ kpata te yẹrẹ gẹrẹ oma te-e, remora na she-e.

 Egbaerianriẹn ru orọnvwọn rọ họhọ enu rẹ uyovwin ri remora rọ tanmuẹ asan, kidie ona rẹ obo rọ vwọ tanmuẹ asan na je ayen. Oborẹ ayen ruru rọ họhọ enu rẹ uyovwin ri remora na je sa tanmuẹ erọnvwọn sansan. Ayen vwọ guọnọ siono asan rẹ ayen vwerọ tanmu, ọ rhọnvwe no-o, tobọ te ọke ra vwọ vwẹ orọnvwọn rọ vwẹ ọhwọhwọ ujorin evo vwọ họhọ vrẹ vwo sio!

 A sa reyọ erọnvwọn rẹ egbaerianriẹn ruru rọ họhọ enu rẹ uyovwin ri remora na vwo ruiruo vwẹ idjerhe sansan. Kerẹ udje, a sa reyọ vwọ jokaphiyọ erin yẹrẹ eranvwe rehẹ evunrẹ abadi, je reyọ vwo ru ehiahiẹ kpahen erọnvwọn re dia evunrẹ abadi, e ji se ru ayen phiyọ irhukpẹ yẹrẹ erọnvwọn efa ra cha vwọ tanmu ichivwo rẹ agbada rehẹ obotọ rẹ ame yẹrẹ okuna.

 Die wo rori? Enu rẹ uyovwin ri remora rọ tanmuẹ asan mamarhe? Gbanẹ a marọ?