Ihwo ri ruẹ ehiahiẹ tare nẹ eranko sa reyọ uwen rọyen vwọ riẹn ikpe rẹ eranko ọfa, ọ je sa reyọ vwọ riẹn sẹ eranko na ọ rẹ aye yẹrẹ ọ rẹ ọshare, ọ me je riẹn sẹ o muomaphiyọ yẹrẹ oma vwerhọn. E se yono eranko, ọ me riẹn asan re mu ibọmbu vẹ ihuvwun egangan phiyọ. Kirobo rẹ ihworakpọ sa vwẹ ẹro vwọ mrẹ ekuakua sansan ye, eriyin eranko je vwẹ uwen rayen vwọ riẹn obo re riariẹ ayen phiyọ. Kọyen uwen họhọ “ẹro” vwọ kẹ eranko.

 Roro: Uwen rẹ eranko nyo ọnrhe vrẹ ọ rẹ ihworakpọ shesheri. Isikuru re se U.S. National Institute of Standards and Technology tare nẹ eranko “se nyo ọnrhe rẹ erọnvwọn re hanvwere mamọ. Kọ ghwa họhọ nẹ e ku ẹkẹn ọvo rẹ ẹkẹn ẹnẹ rẹ oyibu rọhẹ ukujẹrẹ ra vwọ da iti phiyọ ame rẹ iswimipuru ra vwọ heha rẹ olympic, ohwo ọvo da davwen je riẹn nẹ oyibu hẹ ame na.”

 Die yen nẹrhẹ eranko nyo ọnrhe vrẹ ohworakpọ?

•   Ọkieje yen uwen rẹ eranko vwọ kpọrhọ, ọnana nẹrhẹ o se nyo ọnrhe sansan.

•   Unu ivẹ yen uwen rẹ eranko vwori—ọ vwẹ ọvo wẹn, ọ me rha vwẹ o ro chekọ na vwo nyo ọnrhe. Eranko de se ọnrhe reyọ, odju mi mu ọnrhe na kpo ẹbẹre rẹ uwen rọyen, ro vwo vughe oka rẹ ọnrhe ro seri.

•   Asan rẹ ẹgba rẹ eranko vwo nyo ọnrhe hepha vwẹ afọnrhe na rho te square centimeters 130 yẹrẹ tobọ vrẹ ọtiọyen dede, jẹ ọ rẹ ohworakpọ ghwa 5 ọvo.

•   Erọnvwọn re chọn eranko uko vwo vughe ọnrhe, vwẹ ẹkẹn 50 vwo bun vrẹ ọ rẹ ihworakpọ.

 Enana ejobi yen nẹrhẹ eranko sa fẹnẹ ekuakua sansan ri kuomakugbe vwẹ ọnrhe ọvuọvo. Kerẹ udje, ihwo evo ri ruẹ ehiahiẹ tare nẹ ohworakpọ se nyo ọnrhe rẹ emu re chere, ẹkẹvuọvo eranko sa vwẹ uwen rọyen vwọ riẹn erọnvwọn sansan re vwo chere emu na.

 Ihwo ri ru ehiahiẹ kpahen ọga rẹ ikansa vwẹ Pine Street Foundation tare nẹ uwen vẹ afọnrhe rẹ eranko re wian kuẹgbe vwo nyo ọnrhe na, ọyen “ọvo usun rẹ imashini ri me vwo ẹgba kparobọ vwẹ akpọ na, re se vwo vughe ọnrhe.” Egbaerianriẹn ruẹ “imashini sansan” asaọkiephana ra sa vwọ riẹn asan re mu ibọmbu, ihuvwun egangan, kugbe erọnvwọn efa tiọyen phiyọ, eriyin ji te asan rẹ ikansa vẹ ega efa hepha.

 Die wo rorori? Uwen rẹ eranko mamarhe? Gbanẹ a marọ?