Ẹgba ro nẹ ọnre na cha lo muẹ iriẹn rẹ erhi tavwen ọ ke sa rhan. Ẹkẹvuọvo ẹdẹ rẹ uvo ra rhọvwọ-ọn, erhi re se cabbage white butterfly na fobọ rhan vrẹ erhi ri chekọ. Die yen nẹrhẹ ọ dia ọtiọyen?

 Roro: Erhi buebun ghan ibekpe rayen phiyọ yẹrẹ rhurho vwẹ uvo tavwen ayen ke rhan. Ẹkẹvuọvo, ibekpe rẹ erhi re se cabbage white butterfly na pha kerẹ V siẹrẹ ọ da rhan mu orọnvwọn. Ehiahiẹ djerephia nẹ ọ da guọnọ nẹ omamọ rẹ uvo lo muo, kọ ghan ibekpe phiyọ kerẹ V. Obo rọ ghan ibekpe rọyen wan nẹrhẹ ẹgba ro nẹ ọnre na cha ro evunrẹ iriẹn rọ nẹrhẹ ọ sa rhan rọhẹ udu rọyen re se thorax.

 Ihwo ri ruẹ ehiahiẹ ri nẹ University of Exeter, England rhe, fuẹrẹn erhi re se cabbage white butterfly na sẹ ayen se ru ophapha rọ pha kerẹ V rọ sa sẹro rẹ ẹlẹtriki womarẹ ẹgba rẹ ọnre na (solar panel). Ayen vwọ davwọn ni, ayen da mrẹvughe nẹ uche ẹgba rọ vwọ phia vwẹ ẹkẹn 50 rẹ ujorin vwo bun vrẹ ọ rọ herọ jovwo.

 Ayen je mrẹvughe nẹ ibekpe rẹ erhi na ji lo kerẹ ughegbe. Ayen vwọ vwẹrokere ibekpe rẹ erhi na ro lo kerẹ ughegbe na, rọ je họhọ V na, ọ da nẹrhẹ ayen ru solar panel ro yovwin vrẹ e re ruru jovwo. Oborẹ ayen hiẹ mrẹ na da nẹrhẹ ohwo ọvo usun rẹ ihwo ri ruẹ ehiahiẹ na, re se Richard ffrench-Constant ro yono ẹbe kodo tanẹ erhi na ọyen “ọwena ro koko ẹgba ro nẹ ọnre na cha.”

 Die wo rorori? Ibekpe rẹ erhi re se cabbage white butterfly rọ họhọ V siẹrẹ ọ da rhan mu orọnvwọn na mamarhe? Gbanẹ a marọ?