Okrire egbaerianriẹn vwọ guọnọ riẹn vwọ kpahen erọnre rọ họhọ gelatin yẹrẹ hydrogel, ro nẹ oma erin re se hagfish na cha. Diesorọ ayen vwọ guọnọ riẹn kpahọn? E dje erọnre ri nẹ oma erin na cha na phiyọ ọvo vwẹ usun rẹ “erọnvwọn rọ ma lọhọ kparobọ ro siẹ.”

 Roro: Erin re se Hagfish na dia obotọ rẹ abadi, ọ họhọ erin re se urhiẹ. Ọke rẹ eranvwe re rho nọ da guọnọ riọ, ko miẹ erọnre nẹ oma rọyen cha. Erọnre nana vwo iprotini re nẹrhẹ o kpurhẹ, kugbe uriorin rẹ iprotini buebun efa re họhọ oruru. Iprotini nana eje de ku kugbe, kọyen nẹrhẹ ame rọ riariẹ hagfish na kpurhẹ kerẹ gelatin. Erọnre na me tanmu avwre rẹ erin ro rhi hwe na, ọnana me nẹrhẹ o geren hagfish na kufia, je djẹ kpakpata.

 Erọnre ri hagfish na vwo erọnvwọn ri gbe ohwo unu mamọ. Ọvuọvo rẹ oruru rẹ iprotini na vwẹ ọhwọhwọ ujorin vwọ hanvwe vrẹ ogẹto rẹ ohworakpọ, ọ da rha vwẹ ọhwọhwọ ihwe vwọ gan vrẹ nylon. Erin na de miẹ iprotini sansan na ro evunrẹ ame na, kọ cha họhọ orọnvwọn ra vwọ rhẹ emu re se three-dimensional sieve. Orọnvwọn nana ro hirhephiyọ na, sa yọnrọn ame rọ vwẹ ọhwọhwọ 26,000 vwọ họhọ vrẹ ọnyẹ rẹ oma rọyen. Ra vwọ ta uyota, erọnre na amiame, emerha kọyen nuro!

 Egbaerianriẹn ji se rhi ru oka rẹ erọnre ri hagfish na vwori-i. Ohwo ọvo ro ruẹ ehiahiẹ da ta: “Orọnvwọn nana bẹn ẹriẹn mamọ.” Ẹkẹvuọvo, egbaerianriẹn davwan sẹ ayen sa reyọ iprotini rọhẹ evunrẹ bacteria vwo ru orọnvwọn rọ họherọ. Obo ri rhe ayen vwẹ ẹwẹn, ọyen ayen vwo ru orọnvwọn rọ pha phapharhe, rọ fobọ bẹrẹ-ẹ, ro siẹ, o mi ji gbon kufia. A sa reyọ oruru rẹ iprotini rẹ ihworakpọ ruru na vwo ru emwa re vwo ko iwun kugbe ekuakua rẹ idọktọ vwo ruiruo. A vwọ ta uyota, erọnvwọn ra sa reyọ oruru rẹ iprotini nana vwo ru pha buebun.

 Die wo rori? Erọnre ri hagfish rọ bẹn ẹriẹn na mamarhe? Gbanẹ a marọ?