A MARỌ?
Ona rẹ Uyẹn re se Fruit Fly Vwọ Rhan
Kohwo kohwo riẹnre nẹ ọ pha bẹnbẹn siẹrẹ a da davwẹngba e vwo hwe uyẹn, kidie ọ fobọ rhan mamọ.
Ẹgbaerianriẹn rhe mrẹvughe re nẹ uyẹn re se fruit fly na vwo ona ro vwo kuomarhẹriẹ siẹvuọvo kerẹ aropleni re vwo phi ofovwin re se Jet. Ohwo ọvo ro yono ẹbe kodo re se Michael Dickinson da ta: “Ayen tẹn ona rẹ obo ra rhan ghwe vwo nẹ ọke ukẹn na vwọ sa nu. Kọ ghwa họhọ ẹdia re de mu ọmọboba phiyọ aropleni re vwo phi ofovwin, ọ me ghwa riẹn obo ra gua.”
Ihwo ri ru ehiahiẹ hworo ona rẹ iyẹn na vwọ rhan phiyọ ividio, ayen de noso nẹ ayen teyan ibekpe rayen abọ 200 vwẹ ẹroẹbrẹ ọvo. Jẹ ayen da teyen ibekpe rayen obọ ọvo, o te ayen vwọ djẹ kẹ okpetu.
Kẹ, die yen ayen ruẹ siẹrẹ ayen de hirharoku imuoshọ? Ihwo ri ru ehiahiẹ mrẹvughe nẹ bẹsiẹ ohworakpọ ki brẹro obọ ọvo, jẹ iyẹn na rhan vabọ rẹ okpetu abọ 50 re. Dickinson tare nẹ, “Uyẹn na vwo ona rọ vwọ vwẹ ọmọke krẹn vwo roro asan rẹ okpetu nẹ cha, ọ me riẹn asan rẹ ofori nẹ ọ rhan ra.
Ihwo ri ru ehiahiẹ je sa rhe riẹn oborẹ uyẹn nana ro vwo afọnrhe ọhanhanvwe na se vwo ru ona nana-a.
Uyẹn re se Fruit fly na vwo ona ro se vwo kuomarhẹriẹ siẹvuọvo vwọ vabọ rẹ imuoshọ
Die wo rorori? Uyẹn re se fruit fly na mamarhe? Gbanẹ a marọ?