Gannet, eyen ephran ride re sa rhẹrhẹ vwẹ abadi, ayen ji divwẹn iroko 190 ro abadi na vwẹ unọke ọvo. Ọke ọphran nana da rhan teyen ame na, ẹgba rẹ ẹteyọn na sa vwẹ abọ 20 vwọ gan vrẹ ẹgba rẹ igraviti. Mavọ yen ọphran nana se vwo divwẹn ro ame vwẹ idjerhe ọtiọna abọ buebun jẹ ayen ghwẹ-ẹ?

 Roro: Tavwen ọphran nana ki divwẹn ro ame na, ọ riẹn ibekpe rọyen kpo obuko rẹ oma rọyen, e me họhọ edada. Vwọba ọyena, o ji vwo orọnvwọn ọvo ro rhurhu ẹro rọyen, o mi ru ohọre vẹ udu rọyen rere o phu kerẹ orọnvwọn re se airbag tavwen o ki divwẹn ro ame na.

 Ọke rẹ ọphran nana da ro evunrẹ abadi na, o mi ru unu, uyovwin vẹ ohọre rọyen kerẹ eghwo. Fikirẹ obo ro ruẹ ohọre rọyen kerẹ eghwo wan, ro de divwẹn ro ame na, ẹgba rẹ ame na rha teyen iriẹn rẹ ohọre ọvo-o, ukperẹ ọtiọyen, kọ hrabọ rua iriẹn rẹ ohọre rọyen eje. Ugege rọ ghwa vwọ ro ame na, ko ruẹ ẹro rọyen vwẹ idjerhe rọ da sa mrẹ obotọ ame na fiotọ.

 Asan vọ yen ọphran nana sa ro ame kodo te? Ẹgba rẹ ọphran nana vwọ ro ame na, se muo ruẹ evun rọyen joma te ichiyin 36, ọ je sa ruọ kodo nẹ ọtiọyen siẹrẹ ọ da teyen ibekpe je sara awọ rọyen re họhọ ọ rẹ ikpukpuyẹkẹ. Iyẹnrẹn djerephia nẹ a mrẹ ephran nana ri divwin ro ame vrẹ ichiyin 82 re. Siẹrẹ o de divwin ro ame na nu, ko phorẹ rhe enu rẹ ame na odedede, ọ me rhoma rhan.

 Nughe rẹ obo ri gannet divwẹn ro ame wan

 Ihwo ri ruẹ ehiahiẹ ru irọbọtu re họhọ gannet re sa chọn ayen uko vwọ guọnọ ji sivwin arhọ vwẹ evunrẹ ame. Ayen rhẹro rọyen jovwo nẹ irọbọtu na cha rhan divwin ro evunrẹ ame na je rhoma rhan rhivwin ọke ayen de te enu rẹ ame na. Ẹkẹvuọvo, ọke rẹ ayen vwọ davwen irọbọtu na, fikirẹ ẹgba rẹ irọbọtu na vwọ teyen ame na, ọ da nẹrhẹ ọvo vwẹ usun rayen guọghọ abọ buebun. Ọnana da nẹrhẹ ihwo ri ruẹ ehiahiẹ tanẹ irọbọtu rayen “yovwin te ọphran re se gannet ọke rẹ ayen de divwẹn ro ame-e.”

 Die wo rori? Ẹgba rẹ ọphran nana re se gannet se vwo divwẹn ro evunrẹ ame mamarhe? Gbanẹ a marọ?