O krire rẹ ihwo re vwẹrote eranvwe vwo vwo oniso rẹ ẹgba rẹ barnacles sa vwọ tanmu ikuta, inuerhuru, kugbe orhoma rẹ ikuna. Ihwo evo tare nẹ igọmu ri barnacle gan vrẹ e rẹ ihworakpọ ruẹ. Ẹkẹvuọvo, o ghwe kri re vwo ẹruọ rẹ obo re nẹrhẹ ekuakua nana re se barnacle re dia evun rẹ abadi na, sa vwọ tanmuẹ asan kokoroko-o.

 Roro: Ehiahiẹ djerephia nẹ barnacle da rho te asan rọ da sa rhẹrhẹ, ọ me yanran ra fuẹrẹn ekuakua sansan, jọ guọnọ asan rọ sa tanmu. Ọ da ghwa mrẹ asan tiọyen, ugboma rọyen mi siobọnu oka rẹ ame ivẹ. Ọrẹsosuọ rọ pha kerẹ evwri na, hẹriẹ ame vwo nẹ orhoma rẹ asan rọ cha tanmu na, ji muegbe rẹ asan na rere ọ sa vwọ vwẹ ame rivẹ ro vwo oka rẹ protein ọvo re se phosphoprotein vwo ghworo.

 Ame ivẹ na mi rhi ku kugbe vwọ dia oka rẹ igọmu rọ pha kokoroko rẹ eghwọghwọ sa ria-a. Barnacle ghene guọnọ igọmu tiọna rọ sa yọnrọn orọnvwọn krekri, kidie ayen da tanmu asan nu, kẹ ayen ghwa dia etiyin vwẹ ẹdẹ rẹ akpeyeren rayen eje.

 Ona rẹ barnacle vwo ruẹ igọmu rayen gbe ohwo unu mamọ, vwọ vrẹ oborẹ egbaerianriẹn vwẹro roro. Ọvo usun rẹ ihwo re fuẹrẹn ona nana da ta: “Ọnana odjephia rẹ aghwanre ra mrẹ ọkpọ rọye-en, re se vwo ruiruo vwẹ asan rẹ ame kuru.” Ehiahiẹ nana cha nẹrhẹ egbaerianriẹn se ru igọmu re se vwo ruiruo vwẹ obotọ rẹ ame, kugbe igọmu rẹ ame ivẹ ra sa vwọba rhuẹrẹ ẹlẹtronisi, ji sivwin ihwo re guọnọ omaẹbẹrẹ.

 Die wo rorori? Igọmu ri Barnacle na mamarhe? Gbanẹ a marọ?