A riẹn ologbo phiyọ eranvwe rọ fuan oma. Ayen ghwọrọ ọke buebun vwo ruẹ oma rayen fuan ọke rẹ ayen da rhọnvwọn nẹ ovwerhẹn nu. Ayen sa nabọ ruẹ oma rayen fuan fikirẹ ẹrẹnvwe rayen ra mare vwẹ idjerhe igbevwunu.

 Roro: Ẹrẹnvwe rẹ ologbo vwo papillae ri te 290, papillae na họhọ inwe itutuno re gẹrẹ oma kpo obuko ri dino gan kerẹ ififabọ rẹ ohworakpọ. Papillae vuọvo vwo amasan ro kodori vwẹ ayen emerha, ro se mu enya nẹ unu rọyen cha. Ọtiọyena, ologbo na da rare oma rọyen, enya rẹ papillae na muru, kọ sa wan ẹto rọyen te ohọroma rọyen.

 Ẹrẹnvwe rẹ ologbo sa ghwẹ enya ro te 48 milliliter phiyọ ohọroma vẹ ẹto rọyen kẹdẹ kẹdẹ. Enya na vwo oka rẹ ame rọ sa guọghọ erọnvwọn re sua ọga vẹ inuhu. Vwọba, enya na da ya nẹ oma rẹ ologbo na, kọ nẹrhẹ oma rọyen djiro​—ọnana ghanre mamọ kidie ilogbo ghwe vwo asan buebun rẹ ọdja wan nẹ oma raye-en.

 Siẹrẹ papillae de te ẹto rọ tan kugbe, ko kiẹn kodo ro evunrẹ ẹto na, ọnana me nẹrhẹ asan rọ tan kugbe na rhan. Unu ri papillae rọ pha piọpiọpiọ na, ji se ghworo ohọroma rẹ ologbo na ọke ro de ruẹ oma rọyen fuan. Ihwo ri ruẹ ehiahiẹ vwẹrokere obo ri papillae ruẹ vwẹ ẹrẹnvwe rẹ ologbo, ọke rẹ ayen vwo ruẹ ibrọshi rẹ ayen davwen ni. Vwọ fẹnẹ ibrọshi efa, ibrọshi nana guọnọ ẹgba obuebun a ke sa reyọ vwọ fẹto re tan kugbe-e, ọ je bẹn erie-en. Ihwo ri ruẹ ehiahiẹ vwẹ imuẹro nẹ ayen sa vwẹrokere ẹrẹnvwe rẹ ologbo vwo ru erọnvwọn iyoyovwin, re sa chọn ayen uko vwo rien erọnvwọn re vọnre vẹ ẹto re je pha fagha fagha. Ayen ji vwẹ imuẹro nẹ ona nana je sa wian siẹrẹ a da guọnọ reyọ ori yẹrẹ uhuvwun vwo ghworo oma rọ vọnre vẹ ẹto.

 Die wo rori? Ẹrẹnvwe rẹ ologbo na mamarhe? Gbanẹ a marọ?