Barnacles vẹ erọnvwọn efa re dia evunrẹ abadi re djẹ vwẹ oma rẹ ikuna nẹrhẹ ọ bẹn kẹ ihwo re gua ikuna na. Erọnvwọn tiọyena siẹ ikuna kpuko, je nẹrhẹ ọ ghwọrọ ame ravwọ dje, ọnana je nẹrhẹ ọ reyọ ọke grongron re vwo ruẹ ikuna na fuan kukpe kukpe. Egbaeriariẹn rhe mrẹ nẹ ekuakua ra mare sa vwẹ ukẹcha vwọ kayen.

 Roro: Uyono djerhephia nẹ Ohọrọ rẹ Iweli re se Pilot Whale ra je riẹn phiyọ Globicephala melas vwo ẹgba ro vwo ru oma rọyen fuan. Ohọroma rọyen vọnre vẹ erọnvwọn kerẹ eshẹ re se nanoridges, ọtiọyena barnacle rẹ itete dede cha sa tamuo-o. Evwri rọhẹ uvwre rẹ erọvwọn re pha kerẹ eshẹ vwẹ ohọroma rọyen yen họnran vwọ sua ekuakua re tamuẹ oma rọyen na. Iweli na vwo evwri kpokpọ siẹrẹ o de wene ohọroma rọyen.

 Egbaeriariẹn Jiroro ayen vwo ru ugboma rẹ ikuna họhọ ọ rẹ iweli. Jovwo, a vwẹ ọda ra vwẹ ikẹmikal ru vwo gbe ikuna fikirẹ erọnvwọn re tamuẹ ikuna rehẹ abadi na. Ẹkẹvuọvo, kidie nẹ ọda tiọyena suẹ imuoshọ kẹ erọnvwọn ri vwo arhọ rehẹ evunrẹ abadi na ka rhe da obọ rayen ji. Egbaeriariẹn na kirhi brorhiẹn nẹ ayen cha vwẹ itehru re rhuon kugbe vwo rhurhu ikuna na, rere ikẹmikal ri che nẹ iphrophro rehẹ itughru na rhe, vwo jẹ imuoshọ esuọ kẹ arhọ rehẹ abadi na. Ikẹmikal na mi dje koko siẹrẹ o de te ame na, o mi rhurhu ugboma rẹ okuna na eje. Ọke evo da wan re, ikẹmikal ro dje koko ji rhurhu okuna na, me rhe phoriẹn no vẹ ekuakua re tamuo eje ri siẹ okuna na kpuko jovwo na. Ikẹmikal kpokpọ ro che rhurhu ugboma rẹ okuna na mi rhe nẹ iphrophro rẹ itehru na rhe.

 Ehiahiẹ rayen djerephia nẹ ona nana sa nẹrhẹ uche erọnvwọn rehẹ evunrẹ abadi re tamuẹ ikuna rhi kpotọ. Onana cha nẹrhẹ oma vwerhen ikọmpini re vwẹ ikuna vwo mu eghwa, kidie ọ dia ọmọrhiẹ igho yen a ghwọrọ vwo ruẹ ikuna na fua-an.

 Die wo Rorori? Ohọrọ rẹ iweli re se pilot whale ro se ruẹ oma fuan na mama rhe? Gbanẹ a marọ?