Pomelo ọyen oka rẹ utiẹn ọvwevwerhen rode ọvo rọ mọ vwẹ urhe. Utiẹn nana se she nẹ enu rẹ urhe rọyen ro gron vrẹ ichiyin 30, dedena, emu vuọvo ruo-o! Die yen nẹrhẹ utiẹn nana se chiri eshe ọgangan tiọyena?

 Roro: Ihwo ri ruẹ ehiahiẹ mrẹvughe nẹ obevun rẹ ohọroma ri Pomelo rọ pha fuanfon na pha kerẹ ahworhẹ ro vwo iphrophro vẹ ifi sansan ri churu mu ohwohwo. Ẹbẹre ọfuanfon na vwo kodo ro ẹbẹre rọ vwerhan vwẹ utiẹn na, jẹ iphrophro rọyen hẹrẹphiyọ, e me je vọn vẹ odju yẹrẹ ame. Siẹrẹ omamọ na de she nẹ enu te otọ, ame na me cha kerẹ ọchuyovwin. Ohọroma ri pomelo na siẹ koko kọ je gan, ọtiọyena, ko se chiri eshe na ukperẹ ọ vwọ bẹre.

 Egbaerianriẹn davwan ifomu rẹ utehru rẹ ayen ruru vwo nene ohọroma ri pomelo sẹ o se chiri eshe ọgangan. Ayen vwo imuẹro nẹ a je sa reyọ ona tiọyena vwọba ru erhu rẹ ihwo re djẹ imotosaikoro kuẹphiyọ kugbe imoto rọ sa sẹro rẹ ihwo vwo nẹ asidẹnti vẹ asan rẹ ihwo ri kpo ophephe na dia vwẹ ophephe na, rere ọ sa vwọ sẹro rayen vwọ vrabọ rẹ ibieragha ri she.

 Die wo rori? Ohọroma rẹ utiẹn re se pomelo ro se chiri eshe ọgangan mamarhe? Gbanẹ a marọ?