Ubi ri Dandelion hẹ usun rẹ emama re ma riẹn rhan. Ọke rẹ odju de dju okankọn nana, buebun rẹ ibi ehanhanvwe rọyen na ki djuẹ nene odju na ji ruẹ kerẹ iparashutu itete. Dede nẹ o djuẹ sherẹ kẹ otọ na-a, evo rọyen se nene odju na te uroko ọvo yẹrẹ sheri vrẹ ọtiọyen. Die yen sa nẹrhẹ ayen djuẹ sherẹ te ọtiọyen? Egbaerianriẹn mrẹvughe nẹ ayen djuẹ sherẹ kidie vwẹ ọke rẹ odju de mu ayen, ayen phieghe cha phieghe kpo kerẹ iparashutu-u.

 Roro: Ubi ọvuọvo hẹ obotọ rẹ ugbẹn ro vwo ẹto elọlọhọ re se pappus vwẹ enu rẹ ugbẹn na. Kidie nẹ pappus na pha kerẹ iparashutu, ọnana kọ nẹrhẹ ubi na dajẹ odju na krẹ.

 Ẹkẹvuọvo, o vwo orọnvwọn ọfa rẹ ẹto elọlọhọ ri pappus na ruẹ, vwọ nẹrhẹ ubi na dajẹ odju. Ọke rẹ odju da ro ẹto na, ko hirhephiyọ odju ro kiẹn riariẹ vwẹ enu ri pappus na. Odju ro kiẹn riariẹ na mi mu pappus na kpenu, ọtiọyena, ọ gbe nẹrhẹ o fobọ she te otọ-ọ.

 Kọyen a sa tanẹ ẹto elọlọhọ ra nabọ rhuẹrẹphiyọ ra riẹn phiyọ pappus na, ruẹ kerẹ iparashutu rẹ odju sa wan, ẹkẹvuọvo, ayen phieghe cha phieghe kpo-o. Vwọba, ẹkẹn 90 rẹ 100 ri pappus na ofefe, ọtiọyena, kọ pha frai.

 Egbaerianriẹn guọnọ idjerhe rẹ ayen sa vwọ vwẹrokere oborẹ ubi ri dandelion na rhan wan. Ayen sa reyọ ona obo rọ rhan wan vwo ru erọnvwọn ehanhanvwe re sa rhan [tiny drones], re sẹro ẹgba. A sa reyọ erọnvwọn ehanhanvwe tiọyena vwo ru erọnvwọn buebun, kerẹ a vwọ reyọ vwọ fuẹrẹn ivwiri ri miovwo odju na.

 Die wo rorori? Ona oborẹ ubi ri dandelion rhan wan na mamarhe? Gbanẹ a marọ?