Ihwo buebun dia kuẹgbe jẹ ayen je rọvwọọn. Ihwo evo ruẹ ọtiọyen kidie ayen roro nẹ ọ cha cha ayen uko vwọ riẹn sẹ ayen fo vwọ kẹ ohwohwo je nẹrhẹ orọnvwe rayen vwo omavwerhovwẹn. Ọyen emu aghwanre a vwọ dia kugbe jẹ a je rọvwọọn?

Vwẹ uyovwinrota nana

•  Die yen Baibol na tare?

•  A vwọ dia kuẹgbe muegbe rẹ ohwo kẹ orọnvwe?

•  A vwọ dia kuẹgbe cha nẹrhẹ wọ sẹro rẹ igho?

•  A vwọ dia kuẹgbe cha nẹrhẹ wo jẹ rọvwọn chọ?

•  O vwo owọẹjẹ oyoyovwin ra sa jẹ?

•   Baibol na vwọso e vwo gbe ọfanrhiẹn. Kerẹ udje, ọ tare nẹ: “Kẹnoma kẹ ọfanrhiẹn.” (1 Tẹsalonaika 4:3; 1 Kọrẹnt 6:18) Ọnana churobọ si ehware vwẹ uvwre rẹ ihwo ivẹ re dia kuẹgbe jẹ ayen je rọvwọọn, ọ da tobọ dianẹ ayen vwo ẹwẹn rẹ ayen vwọ rọvwọn obọ. a Iwan ri Baibol na sẹro rẹ aye vẹ ọshare vwo nẹ evun ri kpregede vẹ erọnvwọn ebrabra efa re vwomaphia kidie nẹ a dia kuẹgbe jẹ a je rọvwọọn.

•   Obọ rẹ Ọghẹnẹ yen ọrhuẹrẹphiyotọ rẹ orọnvwe nurhe. Ọke rọ vwọ reyọ vwo mu, ọ da ta: “Kọyensorọ ọshare vwọ yanjẹ ọsẹ vẹ oni rọyen vwo, ko churu mu aye rọyen, kẹ ayen dia ugboma ọvo.” (Jẹnẹsis 2:24) Siẹrẹ ọshare vẹ aye da yanmu ive rẹ orọnvwe rayen, ọ cha nẹrhẹ omavwerhovwẹn dia evunrẹ orọnvwe na.

 Ihwo evo tare nẹ e. Ayen roro nẹ ayen cha riẹn erọnvwọn eghanghanre buebun siẹrẹ ayen da wiankuẹgbe vwevunrẹ uwevwin, je fuẹrẹn uruemu rẹ ohwohwo. Ẹkẹvuọvo, orọnvwọn ọghanghanre ọvo rọ sa nẹrhẹ omavwerhovwẹn dia evunrẹ orọnvwe yen ihwo ivẹ na da yanmu ive rẹ orọnvwe rayen.

 Mavọ yen aye vẹ ọshare se vwo tinkamu ohwohwo ọke erọnvwọn da gan vẹ ọke rẹ erọnvwọn de yovwin? Ayen che se ru ọtiọyen siẹrẹ ayen de ni oyerinkugbe na kerẹ obo re se phioba phiyọ ọke ro je ayeen. Ukperẹ ọtiọyen, oyerinkugbe na cha ganphiyọ siẹrẹ ihwo ivẹ na da wian gangan vwọ rhuẹrẹ ebẹnbẹn phiyọ je fuevun kẹ ohwohwo.

 Obo ra ta na kọna: Ukperẹ ihwo re dia kuẹgbe jẹ ayen je rọvwọọn vwo muegbe vwọ kẹ orọnvwe, jẹ ayen muegbe rẹ oma rayen vwọ kẹ ohẹriẹ.

 Odjekẹ ri Baibol: “Kemu kemu rẹ ohwo kọn ọyen o ji che vun.”​—Galesha 6:7.

 Ihwo evo tare nẹ e. Ehiahiẹ ri Pew Research Center re ruru vwẹ United States djerephia nẹ vwẹ usun rẹ imiragua ihwe re dia kuẹgbe jẹ ayen je rọvwọọn, omarẹ ẹne vwọ yen ru ọtiọyen kidie ayen roro nẹ ọ cha cha uko vwọ sẹro rẹ igho. Jẹ ọke vwọ yanran na, buebun rayen da ta nẹ ebẹnbẹn rẹ igho ọyen emuọvo kiriguo rọ nẹrhẹ ayen ji rhi muegbe vwọ kẹ orọnvwee.

 A vwọ dia kuẹgbe jẹ a je rọvwọọn sa so ebẹnbẹn efa, marho vwọ kẹ eya. Kerẹ udje, oyerinkugbe tiọyena de vwoba, eya yen me mu oghwa ra vwọ vwẹrote emọ na.

 Obo ra ta na kọna: Ebẹnbẹn ro no cha siẹrẹ ihwo ivẹ da dia kuẹgbe jẹ ayen je rọvwọọn rho nọ erere rẹ ayen sa mrẹ.

 Odjekẹ ri Baibol: “Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere.”​—Aizaya 48:17.

 Ihwo evo tare nẹ e. Ẹkẹvuọvo, ọbe na Fighting for Your Marriage tare nẹ, “vwọ kẹ ihwo re dia kuẹgbe jẹ ayen je rọvwọọn, ayen riẹnre jovwo nẹ e vwo phioba phiyọ oyerinkugbe rọhẹ uvwre rẹ ihwo ivẹ re dia kuẹgbe pha bẹnbẹẹn.” Diesorọ? Evo usun rayen cha rhe mrẹvughe nẹ ayen fo vwọ kẹ ohwohwoo. Ẹkẹvuọvo ayen cha dia kugbe kidie ayen ihwo ivẹ na vwo orọnvwọn ọvo rẹ ayen vwẹrote, yẹrẹ rhẹro ọmọ rẹ ayen che vwiẹ. Ihwo evo ri ruẹ ehiahiẹ niroso nẹ ihwo re dia kuẹgbe ru ọtiọyen kidie ọ rhe riẹnriẹn ayen oma re, ayen rhe che se ru ewene ro che fierere vwọ kẹ ayeen. Ọbe na Fighting for Your Marriage da je ta: “Ihwo evo ri fori nẹ ayen phioba phiyọ oyerinkugbe rayen jovwo rhoma rọvwọn kidie ayen mrẹvughe nẹ ayen vwọ dia kugbe yen cha ma lọhọ kẹ ayen.”

 Obo ra ta na kọna: A vwọ dia kugbe cha ohwo uko vwo bru omamọ rẹ orhiẹẹn, ukperẹ ọtiọyen, ọ cha nẹrhẹ ọ bẹn re vwo phioba phiyọ oyerinkugbe na.

 Odjekẹ ri Baibol: “Ọvwiroro da mrẹ ukpokpogho rọ cha ko sioma rọye reyọ; ẹkẹvuọvo ẹkpa da họrhọ ruọ, kọ re oja.”​—Isẹ 22:3.

 Wọ sa kẹnoma kẹ imuoshọ re vwomaphia siẹrẹ ihwo ivẹ re je rọvwọọn da dia kuẹgbe ji vwo omavwerhovwẹn vwevunrẹ orọnvwe. Vwẹ idjerhe vọ? Ọyen wo vwo nene odjekẹ ri Baibol kpahen orọnvwe. Nabọ vughe ohwo rẹ wọ guọnọ rọvwọn na bẹsiẹ ovwan ke dia kugbe kerẹ aye gbe ọshare. Wo de mu ẹsanọ rẹ ohwo rẹ wọ cha rọvwọn kpahen oborẹ ovwan ihwo ivẹ na vwo imuẹro kpahen, ghanre vrẹ urhurusivwe rẹ ehware.

 Baibol na vwo uchebro sansan re sa vwẹ ukẹcha kẹ wẹ vwo muegbe vwọ kẹ orọnvwe rẹ omavwerhovwẹn hepha. b Kerẹ udje, Baibol vwo odjekẹ sansan re sa vwẹ ukẹcha kẹ wẹ vwọ . . .

•   fuevun

•   dia omamọ rẹ ọrivẹ rẹ orọnvwe

•   riẹn sẹ ohwo na fo ohwo ru wọ rọvwọn ọke rẹ ovwan vwọ kọnphiyọ ohwohwo na

 Wo se vwo yono kpobarophiyọ kpahen iyovwirota nana, kpo ẹbẹre rẹ “Orọnvwe vẹ Orua” vwẹ jw.org/urh.

 Odjekẹ ri Baibol: “Isiesi Ọfuanfon na eje ẹwẹn rẹ Ọghẹnẹ yen e vwo sio, ọ vọnre vẹ erere vwọ kẹ uyono.”​—2 Timoti 3:16.