Esẹ vẹ ini evo ri ruiruo, muẹ emọ rayen ri ji te edje rẹ emọ ri kpo isikuru-u kpo asan ra da vwẹrote imitete​—⁠asan na dia kerẹ iklasi re de yono ọbe. Ofori nẹ wo mu ọmọ wẹn kpo asan ra da vwẹrote imitete?

•  Enọ ro fori nẹ wọ nọ

•  Obo wo se ru

 Oyerinkugbe mẹ vẹ ọmọ mẹ che dogho siẹrẹ mi de muo kpo asan ra da vwẹrote imitete? O se dogho. Ọke rẹ ọmọ da ghwanra cha obọ, afọnrhe rọyen se yono erọnvwọn phẹphẹre vwẹ idjerhe ro de djobọte oyerinkugbe rọyen vẹ ọ rẹ ihwo efa. Davwẹngba mamọ vwo nene ọmọ wẹn ghwọrọ ọke kugbe vwẹ ọke nana rọ je vwọ ghwanra cha na.​—⁠Urhi Rivẹ 6:​6, 7.

•    O fori nẹ emiọvwọn roro kpahen oborẹ ayen vẹ emọ rayen se vwo vwo omamọ oyerinkugbe ọ da dianẹ ayen vwo vwẹ ẹwẹn ayen vwo mu emọ rayen kpo asan ra da vwẹrote imitete.

 Siẹrẹ ọmọ wẹn de kpo asan ra da vwẹrote imitete re, ọmọ wẹn ji che nyẹme wẹn? Ọ sa nẹrhẹ o jẹ ẹme wẹn enyo. Ọbe ọvo re se Hold On to Your Kids tare nẹ, “emọ ri ji te edje rẹ emọ ri kpo isikuru-u de nene edjedje rayen ghwọrọ ọke kuẹgbe ọkieje, iruemu rẹ edjedje rayen na ko che phoriẹn mu ayen.”

•    O fori nẹ emiọvwọn re guọnọ mu emọ rayen kpo asan ra da vwẹrote imitete nabọ roro sẹ etiyin na che miovwin oyerinkugbe rayen.

 Wo de mu ọmọ wẹn kpo asan ra da vwẹrote imitete, ọnana cha nẹrhẹ ẹbe eyono lọhọ vwọ kẹ ọ da rhe ton isikuru ẹra phiyọ re? Itu evo cha tanẹ e. Efa da rha tanẹ umukẹcha yen ọ vwọ kẹ ọmọ na vwẹ ẹbe eyono. O toro ọ rọ gbare vwẹ usun ivẹ na-a. Idọktọ ọvo ro yono kpahen uruemu rẹ imitete re se Penelope Leach de si: “Wo roro nẹ oborẹ emọ yono vwẹ isikuru yen che me fierere kẹ aye-en. Wo ji roro nẹ wọ vwọ fobọ phi emọ wẹn phiyọ isikuru yen me yovwi-in. Wo de roro ọtiọyen, kọyen wọ vwẹ ẹro okueku vwo nẹ oborẹ wo yono ọmọ wẹn rhanvwẹ ọke wo vwo vwiẹ rhe.”

•    O fori nẹ emiọvwọn re guọnọ mu emọ rayen kpo asan ra da vwẹrote imitete nabọ roro sẹ ọyen obo re ghanre yẹrẹ sẹ o che fierere e vwo mu omọ na yanran.

 Wẹ yẹrẹ ọrivẹ rẹ orọnvwe wẹn sa dobọ rẹ iruo ji rere ohwo ọvo sa vwọ dia uwevwin vwẹrote ọmọ na? Vwẹ ẹdia evo, ihwo ivẹ re rọvwọnre na sa wian ayen se vwo vwo igho vẹ ekuakua buebun vwọ vwẹrote orua na. Wọ vwẹ erere na vwọ vwanvwe imuoshọ na re?

•    O fori nẹ emiọvwọn re guọnọ mu emọ rayen kpo asan ra da vwẹrote imitete nabọ roro sẹ ayen se yeren akpọ ri kekpe rere ohwo ọvo sa vwọ dia uwevwin vwọ vwẹrote emọ na.

 Wọ da vwẹ erere na vwọ vwanvwe imuoshọ na re, kẹ wo se brorhiẹn sẹ wọ guọnọ mu ọmọ wẹn kpo asan ra da vwẹrote imitete yẹrẹ wo che muo ra-a. Wo de roro kpahọn nu, ru wọ da rhe mrẹvughe nẹ orhien wo vwo mu ọmọ wẹn yaran yen yovwin vwọ kẹ orua wẹn vwo?

 Baibol na tare nẹ “ohwo ro vwo iroro obọ rọ ra ọye o nẹ.” (Isẹ 14:15) Vẹ uchebro yena vwẹ ẹwẹn, gba nabọ roro mu tavwen wo ki brorhien rẹ asan ra da vwẹrote imitete ru wo che mu ọmọ wẹn ra.

 Roro kpahen iroroẹjẹ ru wọ sa jẹ

•    Emiọvwọn evo sa jẹ ojẹ ayen vwo mu emọ rayen kpo asan ra da vwẹrote imitete vwẹ uwevwin rẹ ohwo ọfa. Vwẹ oka rẹ asan tiọyena, eyọnrọmọ na vẹ emọ rehẹ etiyin buẹ-ẹn.

•    Emiọvwọn efa vwo ihwo rẹ orua yẹrẹ ọyọnrọmọ ri nene ayen vwẹrote emọ rayen vwẹ uwevwin rayen.

 Iroroẹjẹ na eje vwo erere vẹ imuoshọ. O che yovwin siẹrẹ wọ da nọ mie emiọvwọn efa ri ji mu emọ rayen kpo asan ra da vwẹrote imitete jovwo re. Baibol na da ta: “Aghwanre vẹ ihwo re reyọ uchebro gba dia.”​—⁠Isẹ 13:⁠10.

 Ọ da dianẹ asan ra da vwẹrote imitete yen wọ jẹre, gbe . . .

 Roro kpahen asan na

•    Asan na vwo ilaisẹnsi yẹrẹ ọ yan nene urhi rẹ igọmẹti kpahen obo ro fori nẹ a rhuẹrẹ asan tiọyen wan? Oka rẹ ilaisẹnsi vọ yen o vwori, a ta omamọ ota kpahọn, yẹrẹ o vwo omamọ rẹ odẹ?

•    Asan na fonro? o ji fuoma?

•    Irueru vọ yen e ruẹ vwẹ etiyin? a

 Roro kpahen eyọnrọmọ na

•    Oka rẹ uyono vọ yen ayen vwori? Ọnana churobọ si oborẹ a yọnrọn imitete wan, ukẹcha ra ka vwọphia siẹrẹ ohwo da wonma, kugbe re vwo rhophie ohwo ro ghwẹ (CPR).

•    Wọ sa guọnọ otọ rẹ ihwo re cha vwẹrote ọmọ wẹn sẹ ayen gbevwọso urhi ke mu ayen phiyọ uwodi jovwo re?

•    E muẹ wene eyọnrọmọ na nọke ra ruọke? E de dje ayen ewewene kọke kọke, kọyen ọmọ wẹn cha rha riẹnriẹn oma rọyen vẹ eyọnrọmọ kpokpọ nọke ra ruọke.

•    Bro emọ yen ọyọnrọmọ ọvuọvo vwẹrote ẹsiẹvo? Ọ da dianẹ emọ rẹ ọyọnrọmọ ọvuọvo cha vwẹrote bunrun, kọyen a cha sa vwẹrote ọmọ wẹn kirobo ro fori-i. Vwọrẹ uyota, ikpe rẹ ọmọ wẹn vẹ oborẹ ẹgba rọyen muru yen e che ni vwọ riẹn uchọke ra vẹ ọyen cha ghwọrọ kugbe.

•    Eyọnrọmọ na vwo owenvwe rẹ ayen vwo rhievun ta ota kẹ wẹ kpahen ọdavwẹ wẹn yẹrẹ ọ rẹ ayen?