Ọke vwọ yanran na, emọ wẹn che hirharoku obo re sa so ofudjevwe kẹ ayen. Mavọ yen wọ sa vwọ chọn ayen uko vwo phi erọnvwọn tiọyena kparobọ?

•  Obo ro fori nẹ wọ riẹn

•  Obo wo se ru

 Ofudjevwe ọyen ẹbẹre ọvo rẹ akpeyeren. Baibol na tare nẹ avwanre eje “sheri.” (Jems 3:2) Emọ ji she vwẹ ẹbẹre evo. Jẹ, o vwo erhuvwu ọvo rẹ eshe tiọyena sa ghwa rhe—ọ sa chọn emọ uko vwo vwo akoechiro. E vwiẹ emọ vwiẹ okẹ nana-a, ẹkẹvuọvo ayen se yono oma phiyọ. Oni ọvo re se Laura da ta: “Mẹ vẹ ọshare mẹ mrẹvughe nẹ ofori emọ vwo yono oborẹ ayen se vwo yerin ghene ofudjevwe, ukperẹ e vwo kuẹrofia kẹ obo re dje ayen ofu, rere ayen riẹn oborẹ ayen se vwo chirakon siẹrẹ oborẹ ayen rhẹro rọye-en da phia.”

 Emọ buebun se yerẹn ghene ofudjevwe-e. Emọ evo se yerẹn ghene ofudjevwe-e, kidie esẹ vẹ ini rayen vwẹ ayen vwọ mẹ. Kerẹ udje, ọmọ de she ọdavwini, esẹ vẹ ini evo me hanrhe oyono rọyen. Esẹ vẹ ini evo ka ẹbẹre rẹ emọ rayen siẹrẹ emọ na de vwo ota vẹ igbeyan rayen.

 Kẹ, mavọ yen emọ sa vwọ rhọnvwe oruchọ rayen ji kuobọ rhẹriẹ siẹrẹ esẹ vẹ ini da vwẹ ayen vwọ mẹ?

•   Yono emọ wẹn oborẹ uruemu rayen sa ghwa rhe.

   Baibol na da ta: “Okankọn kẹ okankọn rẹ ohwo kọnre, ọye o ji che vun.”—Galesha 6:7.

   Kemu kemu re ruẹ vwo obo ri che nẹ obuko rọyen rhe. Eriyin oruchọ ji vwo osa. Ofori nẹ emọ riẹn nẹ uruemu rayen sa so ota, ayen ji che mu oghwa rẹ oborẹ ayen ruru. Ọtiọyena, wo bru ẹbe rhuru emọ wẹn yẹrẹ hanrhe ihwo efa siẹrẹ emọ wẹn de ru chọ-ọ. Ukperẹ ọtiọyen, vwo nene edje rayen, wọ me jẹ emerha rẹ oghwa rẹ oruchọ rayen na sare te ayen. Jẹ ọmọ na riẹn nẹ oruchọ rọyen yen so ebẹnbẹn na..

•   Chọn emọ wẹn uko vwo yerin ghene ofudjevwe.

   Odjekẹ ri Baibol: “Ọvwata she asiẹ eghwrẹ ọ me rhoma vrẹn.”—Isẹ 24:16.

   Ọ da ohwo mamọ siẹrẹ e de rhiẹromrẹ obo re sua ofudjevwe, ẹkẹvuọvo ọ dia ọyen oba rẹ akpeyere-en. Chọn emọ wẹn uko vwọ tẹnrovi oborẹ ayen sa vwọ rhuẹrẹ ebẹnbẹn rayen phiyọ ukperẹ ayen vwọ tẹnrovi oruchọ yẹrẹ obo ri dje ayen ofu. Kerẹ udje, ọmọ wẹn de she ọdavwini vwẹ isikuru, chọn uko vwo muomaphiyọ ẹbe ese vrẹ obo ri jovwo rere o se vwo ru yovwinphiyọ ọke ọfa. (Isẹ 20:4) Siẹrẹ ọmọtẹ wẹn vẹ ugbeyan rọyen de vwo ota, chọn uko vwọ riẹn obo rọ sa vwọ reyọ ọhọ romobọ rọyen vwọ rhuẹrẹ ota na, o toro ohwo ro ru chọ-ọ.—Rom 12:18; 2 Timoti 2:24.

•   Yono emọ wẹn oborẹ ayen se vwo vwo ẹro abavo.

   Odjekẹ ri Baibol: “Me rẹ ohwo ọvuọvo vwẹ ohri rẹ ọvwan nẹ e jẹn ohwo ọvo rhe roro oma rọye rhuarho nọ obo rọ epha jovwo-o.”—Rom 12:3.

   Wọ da vuẹ ọmọ wẹn nẹ ọyen “ma tẹn ona” rẹ orọnvwọn ọvo vwọ vrẹ emọ ichekọ na eje, ọyena che se fierere kẹ-ẹ. Vwọrẹ uyota, ọ dia ọkieje yen emọ ri tobọ ruẹ yovwẹn vwẹ isikuru che vwo ru yovwin vrẹ ihwo efa-a. Ọ je dia ọkieje yen emọ ri tẹn ona rẹ oka rẹ ehẹha evo che vwo phi kparobọ-ọ. Emọ ri vwo ẹro abavo vwo nẹ oma rayen yen me chirakon.

   Baibol na tare nẹ ebẹnbẹn se ru ohwo gan ji nẹrhẹ e vwo odirin. (Jems 1:2-4) Wọ sa chọn emọ wẹn uko vwo vwo ẹro abavo, dede nẹ ebẹnbẹn vẹ echobọ sa nẹrhẹ ofu dje ohwo.

   Kirobo rọ reyọ ọke vẹ ẹgbaẹdavwọn a ke tẹn ona rẹ iruo ye, eriyin ọ je reyọ ọke vẹ ẹgbaẹdavwọn e ki se yono ọmọ akoechiro. Uyono yena cha hwarhiẹ erere bro rhe vwẹ ọke eghene. Ọbe ọvo re se Letting Go With Love and Confidence da ta: “Ighene ri vwo akoechiro brokpakpa brorhiẹn rẹ ẹkpa siẹrẹ ofu de dje aye-en. Ayen je nabọ ruẹ yovwẹn siẹrẹ ayen de hirharoku ebẹnbẹn re rhẹro rọye-en.” Vwọrẹ uyota, akoechiro ji che fierere kẹ ayen ọke rẹ ayen de te omiragua re.

 Uchebro: Phi omamọ rẹ udje phiyotọ. Karophiyọ nẹ uruemu ru wo djephia siẹrẹ ofu de dje we, cha chọn emọ wẹn uko vwọ riẹn oborẹ ayen che ru sierẹ ofu de ji dje ayen.