Aye rọyen da rhe mrẹ obo ro ruẹ vwẹ odjahọn. Ọ da rẹ gangan ji ve kẹ nẹ ọyen cha dobọ rọyen ji, o de ghini ru ọtiọyen vwẹ uvwre rẹ ọke evo. Ọ da rhoma rhivwin kpo uruemu rẹ awanre na.

 Wẹ evunrẹ ẹdia tiọyena? Ọ da dia ọtiọyen, ofori nẹ wọ riẹn oborẹ uruemu ru wo vwo nẹ ihoho rẹ ihwo re banphiyọ na djobọte ọrivẹ orọnvwe wẹn wan kugbe obo ru wọ sa vwọ dobọ rọyen ji karekare. a

Vwẹ uyovwinrota nana

•  Obo ro fori nẹ wọ riẹn

•  Obo wo se ru

•  Ọ da dianẹ ọshare wẹn nẹ ihoho rẹ ihwo re banphiyọ

 Ihoho rẹ ihwo re banphiyọ sa hra orọnvwe. Ophu che mu ọrivẹ rẹ orọnvwe wẹn je nẹrhẹ o jẹ ẹro ẹvwọso owẹ. b

 Obo re djunute vwẹ obotọ na sa phia kẹ aye rẹ ọshare rọyen nẹ ihoho rẹ ihwo re banphiyọ:

•   Re vwo no nẹ e ku ohwo phiyoto. Aye ọvo re se Sarah da ta: “Kọ ghwa họhọ nẹ ọshare mẹ gbe igberadja abọ buebun.”

•   Jẹ uwan emuo. Aye ọvo tare nẹ uruemu rẹ ọshare rọyen vwo nẹ ihoho rẹ ihwo re banphiyọ na nẹrhẹ “oma vo ọyen.”

•   Re vwo vwo ẹwẹn ivivẹ kpahan ohwo. Aye ọvo re se Helen da ta: “Mi vwo ẹwẹn ivivẹ kpahan ọshare mẹ vwẹ kemu kemu ro ruẹ.”

•   Ẹnwan. Aye ọvo re se Catherine da ta: “Ẹnwan rẹ oborẹ ọshare mẹ ruẹ na de rhi mu vwe rọ.”

 Obo re roro kpahen: Baibol na vuẹ ọshare nẹ o vwo ẹguọnọ rẹ aye rọyen. (Ẹfesọs 5:25) Ọ da nẹrhẹ aye rọyen rioja rẹ obo re djunute vwẹ obenu na, kẹ a sa tanẹ o dje ẹguọnọ ke?

 Ọlọhọre re vwo siobọnẹ uruemu re vwo nẹ ihoho rẹ ihwo re banphiyọ-ọ. Aye ọvo re se Stacey da ta: “Ọshare mẹ dobọ rẹ ephopho rẹ isigati vẹ imarijuana ji, kugbe ẹreyọ rẹ ihuvwun egangan, ẹkẹvuọvo ọ sa vwọ dobọ rẹ eno rẹ ihoho rẹ ihwo re banphiyọ ji, je bẹn kẹ.”

 Wọ dahẹ ẹdia yena, iroroẹjẹ rehẹ obotọ na sa chọn wẹ uko vwọ dobọ rẹ uruemu yena ji karekare.

•   Vwẹruọ rẹ oboresorọ rẹ eno rẹ ihoho rẹ ihwo re banphiyọ vwọ chọn. Eno rẹ ihoho rẹ ihwo re banphiyọ, ọyen uruemu re vwo titẹ ojevwe romobọ, rọ nẹrhẹ ẹguọnọ, ẹro ẹvwọsuọ kugbe evunẹfuọn, re dia obo re pha ghanghare re sa nẹrhẹ orua vwo omavwerhovwẹn shekpotọ. Ọyen jẹ uruemu ri jẹ ọghọemuo vwọ kẹ Jihova Ọghẹnẹ, rọ dia ohwo rọ Ma orọnvwe.

   Odjekẹ ri Baibol: “E jẹ orọnvwe vwo ọghọ.”​—Hibru 13:4.

•  Wo guẹn obo ru wo ruru na nyẹ ohwo ọfa-a. Wọ tanẹ, ‘Kẹ ọ dianẹ aye mẹ nabọ dje ẹguọnọ kẹ vwẹ jovwo, mi rhe ni ihoho rẹ ihwo re banphiyọ-ọ.’ Ọ chọnre wọ vwọ hanrhe aye wẹn fikirẹ obo ru wo ruru na, ọ je sa nẹrhẹ wọ guọnọ asan wo gun phiyọ ru wọ vwọ rhoma ni ughe na siẹrẹ o de ghwe ru obo ri miovwon uwe ivun.

   Odjekẹ ri Baibol: “Urhurusivwe romobọ yen siẹ ohwo je riẹriẹ rua ọdavwini.”​—Jems 1:14.

•   Rhievun ta ota kẹ ọrivẹ rẹ orọnvwe wẹn. Ọshare ọvo re se Kevin da ta: “Kẹdẹ yen me nọ aye mẹ enọ nana. Me tẹnroviẹ ighe ri je fo, gbanẹ me kẹnoma kẹ ayen? Ọna ri mi ruẹ na kọ nẹrhẹ o rhe roro nẹ me djahan evun kẹ-ẹ.”

   Odjekẹ ri Baibol: “Avwanre guọnọ dia ihwo rẹ uyota vwẹ erọnvwọn eje.”​—Hibru 13:18.

•   Nomaso. Wọ sa rhoma shufi rẹ obo wọ kẹnoma kẹ na, ọ da tobọ dianẹ wọ dobọ rọyen ji vwẹ ikpe buebun re. Kevin ra ta ota kpahen siẹvure da ta: “Me dobọ rẹ eno rẹ ihoho rẹ ihwo re banphiyọ ji vwẹ ọsoso ẹgbukpe ihwe je vuẹ oma mẹ nẹ mi phi ebẹnbẹn mẹ na kparobọ re. Ẹkẹvuọvo, orharhe rẹ uruemu na jehẹ etiyin. Ọ pha kerẹ eranvwe rọ djoma ro rhuẹn phiyọ akọkọ rọ hẹrhẹ ọke rọ vwọ wan vwẹ oma.”

   Odjekẹ ri Baibol: “E jẹ ohwo ro rorori nẹ ọyen mudia nomaso rere o vwo je she.”​—1 Kọrẹnt 10:12.

•   Oke rẹ odavwini na da rhe, wo mi brevun kpo iroro. Dede nẹ wọ cha sa dobọ rẹ iroro echọchọ ji ri vwo jẹ ẹ kọ cha-a, jẹ wo se brorhiẹn rẹ wo vwo muoma phiyọ yẹrẹ kẹnoma kẹ. Urhurusivwe ọchọchọ na cha wanvrẹ, ọ sa tobọ vwẹre phiyọ siẹrẹ wo de yono oborẹ a kpọ iroro wẹn kpo asan ọfa yẹrẹ roro kpahan erọnvwọn efa.

   Odjekẹ ri Baibol: “E jẹ ovwan ohwo ọvuọvo riẹn obo ro sun oma rọyen wan vwẹ ofuanfon kugbe ọghọ, ọ dia ọ rẹ urhurusivwe rẹ ehware re je suo-on.”​—1 Tẹsalonaika 4:​4, 5.

•   Kẹnoma kẹ ẹdia re sa rhanriẹ orharhe rẹ urhurusivwe na. Ọbe na Willpower’s Not Enough tare nẹ, “wọ da hẹ ẹdia rọ sa rhanriẹ orharhe rẹ urhurusivwe, kọyen wọ sa ugbuna, i mi pẹtro kọyen ọ guọnọre . . . ro vwo fru erhanre.”

   Odjekẹ ri Baibol: “Wo jẹ orukuruku sun vwe-e.”​—Une rẹ Ejiro 119:133.

•   Wo jẹ ofu dje we-e. Ọ sa reyọ ọke grogro, tobọ ikpe buebun dede tavwen rẹ ọrivẹ orọnvwe wẹn ke sa rhoma vwẹroso owẹ. Ẹkẹvuọvo obo re rhiẹromrẹ djerephia nẹ wo se ruo.

   Odjekẹ ri Baibol: “Ẹguọnọ vwo edirin.”​—1 Kọrẹnt 13:4.