UKẸCHA VWỌ KẸ ORUA
Siẹrẹ Iroro rẹ Ovwan Da Fẹnẹ
Ekuruemu rẹ ihwo ivẹ re rọvwọnre vẹ obo ri je ayen cha sa dia ọvo-o, ọnana sa dia egbabọse. Jẹ, egbabọse efa herọ re gan vrẹ eyena. Egbabọse kerẹ:
Uchọke ra vẹ ihwo rẹ orua cha ghwọrọ kugbe
Obo ra ghwọrọ igho wan
Orhiẹn-ebro sẹ ayen che vwiẹ
Die yen wo se ru siẹrẹ ẹro wẹ vẹ ọshare yẹrẹ aye wẹn vwo nẹ emu da fẹnẹ ohwohwo?
Obo ro fori nẹ wọ riẹn
Ihwo re rọvwọnre che se vwo iroro ọvuọvo ọkieje-e. Aye gbe ọshare ri vwo ẹguọnọ rẹ ohwohwo dede che se vwo iroro ọvuọvo ọkieje-e, tobọ vwẹ eta eghanghanre.
“Orua rẹ ihwo eje da ghwọrọ ọke kuẹgbe yen mi nu rhe. Avwanre nene esẹ vẹ ini ride, iniọvo rẹ ọsẹ vẹ i rẹ oni mẹ, kugbe emọ rayen ghwọrọ ọke kuẹgbe vwẹ oba rẹ udughwrẹn. Orua rẹ ọshare mẹ ghwe ruẹ ọtiọye-en. Ọtiọyena, ẹro rẹ avwanre vwo nẹ uchọke ro fori nẹ a vẹ ihwo rẹ orua ghwọrọ kugbe, yẹrẹ vwọ ta ota kugbe vẹ ihwo rẹ orua re dia asan ri sherabọ da fẹnẹ ohwohwo.”—Tamara.
“Mẹ vẹ aye mẹ vwo iroro re fẹnẹre kpahen obo ra ghwọrọ igho wan fikirẹ obo ra yọnrọn avwanre ghwanre wan. Avwanre phrọ aphro evo kpahen obo ra ghwọrọ igho wan vwẹ uvwre rẹ emeranvwe evo rẹ avwanre vwọ rọvwọn nu. Ọ reyọ ọke tavwen avwanre ke sa rhuẹrẹ ota na phiyọ.”—Tyler.
Ihwo ivẹ se nughe ọvuọvo, ayen mi vwo iroro re fẹnẹre. Eriyin ihwo ivẹ re rọvwọnre ji se vwo iroro re fẹnẹre kpahen erọnvwọn evo
O vwo ebẹnbẹn evo ra cha sa ghwa kpairoro vrẹ-ẹ. Kerẹ udje, die yen e che ru siẹrẹ ọgọ rayen ọvo de she ro ọga? Kọ da rha dianẹ ọvo tare nẹ ọyen guọnọ vwiẹ, jẹ ọrivẹ rọyen guọnọre-e vwo? a
“Mẹ vẹ aye mẹ ghwọrọ ọke grongron vwọ ta ota kpahen emọ evwiẹ jovwo re. Dedena, o ji roro kpahọn ọkieje, iroro rẹ avwanre ihwo ivẹ na fẹnẹre mamọ. Mi niro nẹ avwanre che se vwo iroro ọvuọvo-o.”—Alex.
Wo jẹ iroro rọ fẹnẹre yaghan orọnvwe wẹ-ẹn. Egberianriẹn evo tare nẹ wẹ vẹ aye yẹrẹ ọshare wẹn rhe se brorhiẹn rẹ ota ọghanghanre ro sheri-i, wo mi ru obo wo se ru eje rere obo wọ guọnọ na se vwo te we obọ—owenẹ ọ tobọ dia orọnvwe ẹfan dede. Ẹkẹvuọvo, wo mi noso nẹ siẹrẹ wo de ru ọtiọyen, kọyen ọdavwẹ wẹn yen ma ghanre kẹ wẹ vwọ vrẹ ive ru wo ve kẹ Jihova nẹ wẹ vẹ ọrivẹ wẹn cha dia kugbe bẹdẹ, o toro obo re phiare-e.
Obo wo se ru
Brorhiẹn wo vwo ru nene ive rẹ orọnvwe wẹn. Ovwan sa rhuẹrẹ ebẹnbẹn re vwomaphia phiyọ siẹrẹ ovwan de brorhiẹn rẹ ovwan vwo ru nene ivẹ rẹ orọvwọn rẹ ovwan.
Odjekẹ ri Baibol: “Obo rẹ Ọghẹnẹ tan kugbe nu, e jẹ ohwo hẹriẹ-ẹ.”—Matiu 19:6.
Nabọ roro kpahọn. Kerẹ udje, vwo oniso rẹ erọnvwọn evo ro fori nẹ e roro kpahen siẹrẹ ọvo usun rẹ ihwo ivẹ re rọvwọn ohwohwo da guọnọ vwiẹ jẹ ọrivẹ rọyen guọnọre-e:
Oborẹ oyerinkugbe rẹ ovwan gan te.
Orọnvwe ovwan ghwotọ tẹdia rẹ ovwan da sa vwẹrote ọmọ?
Oghwa rẹ emiọvwọn.
Vwọ vrẹ emuọre, iwun, kugbe asan ra dia, o ji vwo erọnvwọn efa ra guọnọre.
Igho.
Wọ sa wiowian, vwẹrote orua, ji mu eghwa efa?
Odjekẹ ri Baibol: “Ono vwẹ usun rẹ ovwan, rọ guọnọ bọn ohẹrhẹ, ro de je tidia te otọ roro unu ro muru?”—Luk 14:28.
Roro kpahen erọnvwọn eje rẹ ota ro sheri na churobọ si. Eta evo re so aphro vwẹ uvwre rẹ ovwan na, ovwan sa rhuẹrẹ ayen phiyọ. Kerẹ udje, ọ da dianẹ emọ evwiẹ yen ebẹnbẹn na, ọ rọ guọnọ vwiẹ na-a sa nọ oma rọyen:
‘Me vwọ tanẹ me guọnọ vwiẹ na-a, ko mudiaphiyọ nẹ me guọnọ emọ kakaka-a, gbanẹ me de guọnọ nyoma emerha?’
‘Udu bru vwe nẹ me cha sa dia omamọ rẹ ọsẹ yẹrẹ oni-i?’
‘Oshọ mu vwe nẹ ọshare yẹrẹ aye mẹ che chukoku vwe?’
Ọ rọ guọnọ vwiẹ na sa nọ oma rọyen enọ kerẹ:
‘Avwanre muegbe re vwo mu oghwa rẹ orua?’
‘Avwanre vwo igho ra vwọ vwẹrote ọmọ?’
Odjekẹ ri Baibol: “Aghwanre ro nẹ obenu rhe [pha] . . . dẹndẹn.”—Jems 3:17.
Vwo oniso rẹ erhuvwu ro se nẹ iroro rẹ ọshare yẹrẹ aye wẹn rhe. Ihwo ivẹ se nughe ọvuọvo, ayen mi vwo iroro re fẹnẹre. Eriyin ihwo ivẹ re rọvwọnre ji se vwo iroro re fẹnẹre kpahen obo ra ghwọrọ igho wan kugbe eta efa. Ovwan da cha ta ota kpahen orọnvwọn rẹ ovwan vwo iroro re fẹnẹre kpahen, ovwan me tuọnphiyọ vwo nẹ asan rẹ ovwan da rhọnvwephiyọ ohwohwo.
Die yen ovwan ihwo ive na rhọnvwephiyọ?
Erhuvwu vọ yen se nẹ iroro sansan rẹ ovwan vwori na rhe?
Ohwo ọvo yẹrẹ ovwan ihwo ivẹ na sa nuẹ rere orọnvwe rẹ ovwan vwo jẹ hra?
Odjekẹ ri Baibol: “E jẹ ohwo ọvuọvo guọnọ erhuvwu rẹ oma rọye-e, ẹkẹvuọvo erhuvwu rẹ ọrivẹ rọye.”—1 Kọrẹnt 10:24.
a Ofori nẹ ihwo ivẹ re cha rọvwọn brorhiẹn eghanghanre tavwen ayen ke rọvwọn. Dedena, obo re rhẹro rọye-en sa phia kpregede, yẹrẹ ẹwẹn rẹ ọvo usun rayen se wene ọke vwọ yanran na.—Aghwoghwo 9:11.