Vwẹ uvwre ri 1990 vẹ 2015, ihwo re fan orọnvwe vwẹ United States rehẹ ẹgbukpe 50, re je vrẹ ọtiọyen vwẹ ọhwọhwọ ivẹ vwo kpenu, ọ da ra vwẹ ọhwọhwọ erha vwo kpenu vwọ kẹ ihwo re vrẹ ẹgbukpe 65. Die yen so “orọnvwe ẹfan rẹ ọke rẹ ọghwo” na? Die yen wo se ru o vwo jẹ orọnvwe wẹn edjobọte?

Vwẹ uyovwinrota nana

•  Die yen so orọnvwe ẹfan rẹ ọke rẹ ọghwo na?

•  Obo wo se ru

•  Oborẹ ovwan ta ota kpahen

•    Ọke buebun na, ihwo fan orọnvwe vwẹ ọke rẹ ọghwo rayen kidie omamọ rẹ oyerinkugbe rahẹ uvwre rayeen. Vwọ kẹ eya gbe eshare evo, ọ dia obo ri je ọvo yen che je ohwo rivẹẹ, ọke vwọ yanran na, kọ cha họhọ nẹ oborẹ ayen ihwo ivẹ na rhọnvwa phiyọ rhe tumukuu. Yẹrẹ vwẹ ọke emọ na de nẹ uwevwin na nu, ayen sa rhe mrẹvughe nẹ ayen muomaphiyọ iruo rẹ ọsẹ vẹ oni gan nọ tẹdia ayen ra karophiyọ oborẹ ayen sa vwọ dia omamọ rẹ ọshare vẹ ayee.

•    Vwẹ ikpe evo rhire na, ihwo ri se oma rayen ewena vuẹ ihwo re rọvwọnre nẹ ayen tẹnrovi ọdavwẹ romobọ rayen je nọ oma rayen enọ nana: ‘Oma vwerhen ovwẹ vwẹ orọnvwe na?’ ‘Ọ nẹrhẹ mi ruẹ yovwẹnphiyọ?’ ‘Ọrivẹ orọnvwe mẹ ruẹ oborẹ oma vwọ vwerhen ovwẹ?’ Oborẹ ihwo me roro enẹna siẹrẹ ẹkpahọnphiyọ na da dia ẹjo yen, ru obo ri me yovwin kẹ oma wẹn​—fan orọnvwe na wọ rhoma ton akpeyeren wẹn phiyọ.

•   Ihwo rhe nẹ orọnvwe efan phiyọ obo re chọree. Ọgberianriẹn ọvo re se Eric Klinenberg de si: “O krinọọ na, siẹrẹ ohwo rẹ oma rẹ ọrivẹ orọnvwe rọyen vwerhaan da guọnọ fan orọnvwe na, ọ cha vwẹ iroro re sorọ re je ghwotọ vwọphia kpahen orhienbro yena. Jẹ enẹna, ọ dia ọtiọyeen: Siẹrẹ oma rẹ ọrivẹ orọnvwe wẹn rha vwerhen owẹẹ, jẹ wọ je guọnọ dia orọnvwe na ghene, wọ cha vwẹ iroro re sorọ re je ghwotọ vwọphia kpahen oboresorọ wo vwo brorhiẹn yena. Ihwo buebun vwo imuẹro nẹ obo re ma ghanre kparobọ yen a vwọ tẹnrovi ọdavwẹ romobọ.” a

 Vwọrẹ uyota, siẹrẹ ohwo de brorhiẹn rọ vwọ fan orọnvwe, jọ reyọ ebẹnbẹn ọvo vwo wene ọfa. Kerẹ udje, ehiahiẹ ọvo djerephia nẹ “orọnvwe efan rẹ ọke rẹ ọghwo so ebẹnbẹn rẹ igho, marho vwọ kẹ eya.”

 O ji vwo orọnvwọn ọfa ro fori nẹ e roro kpahen. Ọbe na Don’t Divorce tare nẹ, “Wo sa davwẹngba vwọ rhoma ton akpeyeren phiyọ, jẹ ọyena che wene ohwo rẹ wọ hephaa. Die yen wo rure vwo wene ona rẹ otaẹtakuẹgbe wẹn rẹ ọrivẹ wẹn vwo omavwerhovwẹn kpahen naa? Die yen wo rure vwo wene uruemu wo djephia ọke ẹghwọ da vwomaphia?” b

•   Rhiabọreyọ ewene. O vwo oyerinkugbe vuọvo ro jẹ ewenee. Ọ sa dianẹ oyerinkugbe rọhẹ uvwre wẹn vẹ ọrivẹ orọnvwe wẹn weneri kidie nẹ emọ na nẹ uwevwin na re yẹrẹ kidie nẹ ovwan ihwo ivẹ na rhi vwo ọdavwẹ re fẹnẹ ohwohwo re. Ukperẹ wo vwo mu ẹwẹn kpahen oborẹ erọnvwọn hepha vwẹ obuko, roro kpahen oborẹ wo se vwo ru erọnvwọn yovwinphiyọ enẹna.

   Odjekẹ ri Baibol: “Wọ tanẹ, Die ọke rẹ awanre vwo yovwi nọ ọke nana? kidie ọ dia nẹ aghwanre wo vwori wọ vwọ nọ enanọ nana-a.”​—Aghwoghwo 7:10.

•   Rhe siẹkẹrẹ ọrivẹ rẹ orọnvwe wẹn. Wo se dje ọdavwaro phia kpahen orọnvwọn kpokpọ ọvo ro je ọrivẹ orọnvwe wẹn, gbanẹ wọ sa vwẹ ukẹcha kẹ vwo vwo ẹguọnọ rẹ orọnvwọn ọvo ro je we enẹna? Ovwan se ru yẹrẹ yono orọnvwọn kpokpọ ọvo rẹ ovwan ihwo ivẹ na vwo omavwerhovwẹn kpahen? Ovwan ghwọrọ ọke kugbe, rere wẹ vẹ ọrivẹ orọnvwe wẹn sa vwọ dia kerẹ ihwo re rọvwọnre ukperẹ ihwo re de dia kuẹgbe.

   Odjekẹ ri Baibol: “E jẹ ohwo ọvuọvo rha guọnọ erhuvwu rẹ ohwo ọfa, ọ dia ọromobọ rọye-en.”​—1 Kọrẹnt 10:24.

•   Rhe dje omamọ uruemu kẹ ọrivẹ rẹ orọnvwe wẹn. Wo dje uruemu ri jẹ ọghọ evwo phia kidie nẹ ovwan dia kugbe ọke grongron ree. Ta ota vẹ ọghọ kẹ ọrivẹ rẹ orọnvwe wẹn. Tanẹ “biko” kugbe “wẹkobiruo.” Vwẹ ọkieje vwo dje ẹguọnọ phia, wo ji dje ọdavwaro phia vwọ kpahen erọnvwọn ọrivẹ orọnvwe wẹn ruẹ kẹ wẹ.

   Odjekẹ ri Baibol: “Dje uruemu esiri kẹ ohwohwo, we gbe arodọnvwẹ kẹ ohwohwo.”​—Ẹfesọs 4:32.

•   Karophiyọ ẹdẹ rẹ iyoyovwin na. Ovwan nẹ ifoto rẹ orọnvwe rẹ ovwan kugbe, yẹrẹ ifoto efa rẹ ovwan reyọ kugbe. Ọnana sa vwẹ ukẹcha kẹ ovwan vwọ sẹro yẹrẹ rhoma dje ẹguọnọ vẹ ọghọ kẹ ohwohwo vwevunrẹ orọnvwe na.

   Odjekẹ ri Baibol: “E jẹ ovwan ohwo ọvuọvo vwo ẹguọnọ rẹ aye rọyen kirobo ro vwo ẹguọnọ rẹ oma rọyen, ọtiọyen aye ji muọghọ okokodo vwọ kẹ ọshare rọyen.”​—Ẹfesọs 5:33.