Ikpe na vwọ yanran na, ihwo evo re rọvwọn re rhe dje ẹguọnọ kẹ ohwohwo kirobo ri jovwoo. Ọnana da dia obo re phia vwẹ orọnvwe wẹn, ofori nẹ o kpokpo uwe ẹwẹn?

•  Oborẹ ofori nẹ wọ riẹn

•  Obo wo se ru

 Re vwo dje ẹguọnọ phia ọyen orọnvwọn ọghanghanre rọ nẹrhẹ orọnvwe gan. Kirobo rẹ emu vẹ ame nẹrhẹ oma rẹ ohwo gan ye, ọtiọyen ẹguọnọ re djephia ọkieje je nẹrhẹ orọnvwe gan. Eya gbe eshare guọnọ odjephia rẹ ẹguọnọ vwo mie ohwohwo ọkieje, ọ da tobọ dianẹ ayen rọvwọn re vwẹ ikpe buebun.

 Uvi ẹguọnọ guọnọ erhuvwu rẹ oma rọyen ọvoo. Erhuvwu rẹ ohwo ochekọ na yen ọ guọnọ. Ọtiọyena, ukperẹ o vwo dje ẹguọnọ kẹ ọrivẹ orọnvwe rọyen vwẹ ọke ro wenre, o che vwo oniso oborẹ ọrivẹ orọnvwe rọyen ghene guọnọ je davwẹngba vwo ruo.

 Eya guọnọ odjephia rẹ ẹguọnọ vrẹ eshare. Ọshare se vwo ẹguọnọ okokodo kpahen aya rọyen. Ẹkẹvuọvo, ọ da dianẹ ọtonphiyọ yẹrẹ oba rẹ ẹdẹ na ọvo yẹrẹ tavwẹn ayen ki bru ehware ọvo yen o vwo dje ẹguọnọ tiọyena phia, aye na se vwo ẹwẹn ivivẹ sẹ ọshare rọyen ghini vwo ọdavwẹ rọyen. Obo ri me yovwin yen e vwo dje ẹguọnọ phia ọkieje.

 Dje ẹguọnọ phia womarẹ eta wẹn. Eta kerẹ “Mi vwo ẹguọnọ wẹn” yẹrẹ “Wọ ghanre kẹ vwẹ mamọ” sa nẹrhẹ ọrivẹ wẹn riẹn nẹ wo vwo ọdavwẹ rọyen.

 Odjekẹ ri Baibol: “Obo re vọn evunrẹ ubiudu na yen unu na ta.”​​—Matiu 12:34.

 Iroroẹjẹ: Ọ ghwa dia ota ẹta ọvo yen ofori nẹ wo vwo dje ẹguọnọ phiaa. Sio phiyọ ọbe, imeli, yẹrẹ womarẹ ovuẹ rẹ ifonu.

 Dje ẹguọnọ phia womarẹ uruemu. Wo se ghene djephia nẹ o muwẹro siẹrẹ wọ da vuẹ ọrivẹ orọnvwe wẹn nẹ “Mi vwo ẹguọnọ wẹn” womarẹ wọ vwọ gbanọ, fiọnfiọn, je yọnrọn obọ rọyen. Idjerhe ọfa yen wo vwo djobọte, no vwẹ idjerhe rẹ ẹguọnọ je vwẹ ọkievo vwo ruẹse kẹ. Wọ je sa cha aye wẹn uko vwo ruẹ erọnvwọn kerẹ​​—e vwo nene muẹ ekpu, rhie ẹchẹ, hworẹ imize, fọnrọn emwa, yẹrẹ chere emu. Vwọ kẹ ihwo buebun, erọnvwọn nana vrẹ ukẹcha diodi​​—eyẹn ẹguọnọ re djephia womarẹ uruemu!

 Odjekẹ ri Baibol: “E jẹ ẹguọnọ rẹ avwanre dia ọ rẹ ota yẹrẹ [unu ọvoo] . . . , ẹkẹvuọvo ọ rẹ uruemu.”​​—1 Jọn 3:18.

 Iroroẹjẹ: Dje ẹguọnọ kẹ ọrivẹ orọnvwe wẹn kirobo rẹ wo ruru ọke rẹ ovwan vwọ kọnphiyọ ohwohwo.

 Ovwan ghwọrọ ọke kugbe. Ovwan ihwo ivẹ na da ghwọrọ ọke kugbe, ọ cha bọn orọnvwe rẹ ovwan gan, ọ je cha nẹrhẹ ọrivẹ orọnvwe wẹn mrẹvughe nẹ oma vwerhen owẹ siẹrẹ wẹ vẹ ọyen da herọ. Vwọrẹ uyota, ọ sa bẹn a vwọ rhuẹrẹ ọke phiyọ siẹrẹ wo de vwo emọ re yẹrẹ vwo ewian buebun vwẹ obọ. Ovwan sa rhuẹrẹ ọke phiyọ rẹ ovwan vwo ru omorọnvwọn kerẹ ovwan vwọ yankuẹgbe ọkieje​​—ovwan ihwo ivẹ ọvo.

 Odjekẹ ri Baibol: “Vwo imuẹro rẹ erọnvwọn re ma ghanre.”​​—Filipae 1:10.

 Iroroẹjẹ: Ihwo evo re rọvwọn re ri vwo uphẹẹn rhuẹrẹ ọke phiyọ vwọ kẹ akpọẹriọ vwẹ otafe vwẹ ovwọnvwọn yẹrẹ vwẹ oba rẹ udughwrẹn na.

 Riẹn oborẹ ọrivẹ wẹn guọnọre. Dohwo vẹ obo rọ guọnọre nẹ e dje ẹguọnọ kẹ ọyen wan. Ovwan ta ota kpahen oborẹ ovwan ohwo ọvuọvo guọnọre nẹ e dje ẹguọnọ kẹ ọyen wan, vẹ obo re se vwo ruo yovwinphiyọ. Wọ me davwẹngba vwo ru oborẹ ọrivẹ wẹn guọnọre vwọ kẹ. Re vwo dje ẹguọnọ phia ọyen orọnvwọn ọghanghanre rọ nẹrhẹ orọnvwe gan.

 Odjekẹ ri Baibol: “Ẹguọnọ . . . guọnọ erhuvwu romobọ rọyen ọvo-o.”​​—1 Kọrẹnt 13:​4, 5.

 Iroroẹjẹ: Ukperẹ wọ vwọ nokpẹn rẹ ẹguọnọ mie ọrivẹ orọnvwe wẹn, nọ oma wẹn, ‘Die mi se ru, ọrivẹ orọnvwe mẹ vwo vwo ẹguọnọ mẹ ganphiyọ?’