“Kẹdẹ kẹdẹ yen eya gbẹ eshare vwọ mrẹ obo re davwan odirin rayen nẹ. Ọke rẹ ohwo dahẹ ẹdia ri kpogono, o se no nẹ odirin fiemu-u, ẹkẹvuọvo odirin pha ghanghanre vwẹ orọnvwe.”—John.

•  Diesorọ o vwo fo nẹ wo vwo odirin?

•  Mavọ wo se vwo djephia nẹ wo vwo odirin?

•  “Odirin pha ghanghanre”

•   Orọnvwe sa nẹrhẹ wọ fobọ mrẹ echobọ rẹ aye yẹrẹ ọshare wẹn.

   “Ọ pha lọlọhọ wọ vwọ mrẹ echobọ rẹ aye yẹrẹ ọshare wẹn siẹrẹ orọnvwe na de kri emerha re. Iroro ọchọchọ tiọyena da ro ohwo oma, ọ me rhe dia bẹnbẹn re vwo vwo odirin.”—Jessena.

•   Jẹ odirin e vwo sa nẹrhẹ a ta eta re roro te-e.

   “Me fobọ ta ẹwẹn mẹ phia, ọkiọvo me sa ta obo ro fori ne me ta-a. Me da dia ohwo ro vwo odirin, ke me sa vwẹ ẹro abavo vwo ni ẹdia na, me me ghwa kpairoro vrẹ.”—Carmen.

   Baibol na da ta: “Ẹguọnọ vwo odiri kugbe aruẹdọ.” (1 Kọrẹnt 13:4) Ẹguọnọ sa ghene nẹrhẹ ihwo ivẹ vwẹ odirin nene ohwohwo yerin. Jẹ, ọ cha sa dia ọtiọyen ọkieje-e. John re djunute jovwo re da ta: “Kerẹ iwan iyoyovwin efa, ọ pha lọlọhọ rẹ ohwo vwo muophu, vrẹ ọ ro vwo vwo odirin. Ọ guọnọ ẹgbaẹdavwọn e ki se vwo odirin ọkieje.”

•   Ọke rẹ obo re rhẹro rọye-en da nẹrhẹ ọ bẹn wo vwo vwo odirin.

   Kerẹ udje: Aye yẹrẹ ọshare wẹn ta ota ọbrabra kẹ wẹ. Emu rẹsosuọ rọ cha ro owẹ ẹwẹn ọyen wọ vwọ ta ota ro ji che miovwo ivun.

   Odjekẹ ri Baibol: “Wọ fobọ mu ophu-u kidie udu rẹ ẹkpa ọye ophu dia.”—Aghwoghwo 7:9.

   Obo re se vwo djephia nẹ e vwo odirin: Fọ. Tavwen wọ ke kpahen kẹ, mrẹvughe nẹ ọ diẹ ọ vwẹ arogba ta ota na rere ọ vwọ da wẹ-ẹ. Ọbe ọvo re se Fighting for Your Marriage da ta: “Oborẹ avwanre rorori nẹ ota rẹ aye yẹrẹ ọshare avwanre tare mudiaphiyọ yen buebun rẹ avwanre muẹ ẹwẹn kpahan, ukperẹ obo rọ tare dẹn.”

   Ọ da tobọ dianẹ aye yẹrẹ ọshare wẹn guọnọ kpare owẹ ophu, wọ sa nẹrhẹ ẹwẹn rọyen kpotọ siẹrẹ wọ da fọ ji chirakon rọyen. Baibol na da ta: “Irhe da tonre erhanre ko fuẹn”—Isẹ 26:20.

   “Wo de nẹ aye wẹn kerẹ ovweghrẹn, gba fọ wo roro kpahen oboresorọ wo vwo vwo ẹguọnọ rọyen, wo mi brokpakpa ru orọnvwọn ro che je.”—Ethan.

   Roro:

  •  Mavọ yen wọ kpahan kẹ aye yẹrẹ ọshare wẹn siẹrẹ ọ da ta ota yẹrẹ ru obo ri miovwo uwe ivun?

  •  Mavọ yen wo se vwo vwo odirin vrẹ ọtiọna ọke ọfa rẹ aye yẹrẹ ọshare wẹn da kpara owẹ ophu?

•   Ọke rẹ aye yẹrẹ ọshare wẹn de ruẹ obo re nẹrhẹ ophu mu we kọke kọke.

   Kerẹ udje: Kọke kọke yen aye yẹrẹ ọshare wẹn vwo kruko, ọnana me nẹrhẹ ophu mu we mamọ.

   Odjekẹ ri Baibol: “Ohwohwo chirako kẹ ohwohwo, fobọ si ophu nẹ evun.”—Kọlose 3:13.

   Obo re se vwo djephia nẹ e vwo odirin: Davwẹngba vwo phi ọdavwẹ rẹ aye yẹrẹ ọshare wẹn phiyọ ẹdia rẹsosuọ. Nọ oma wẹn, ‘Mi de nene aye yẹrẹ ọshare mẹ kunu fikirẹ orọnvwọn nana, o rhe phi ohra phiyọ oyerinkugbe rẹ avwanre?’ Wọ me je karophiyọ nẹ “avwanre sheri vwẹ oma rẹ emu buebu.” (Jems 3:2) Kọyen o vwo erọnvwọn evo rẹ wẹ komobọ je cha wian kpahen.

   “Ọkiọvo ọ lọhọ mi vwo chirakon rẹ echobọ rẹ ugbeyan vwọ vrẹ e rẹ ọshare mẹ. Ọ sa dianẹ me fobọ mrẹ echobọ rẹ ọshare mẹ kidie nẹ mẹ vẹ ọyen yen ma ghwọrọ ọke kuẹgbe. Ẹkẹvuọvo, odirin ọyen ẹbẹre ọvo rẹ ẹguọnọ vẹ ọghọ. Ọtiọyena, ọ pha ghanghanre mamọ vwẹ orọnvwe mẹ.”—Nia.

   Roro:

  •  Wo se chirakon rẹ echobọ rẹ aye yẹrẹ ọshare wẹn?

  •  Mavọ yen wo se vwo vwo odirin vrẹ ọtiọna vwẹ ọke rọ cha obaro na?