Vwẹ uyovwinrota nana

•  Ọrhọ yẹn owian ro te ọsẹ?

•  Diesorọ owian rẹ ọsẹ vwọ dia ọ rẹ oghẹresan?

•  Esẹ vẹ emetẹ rayen

•  Uchebro vwọ kẹ esẹ

•   Tavwen e ki vwiẹ ọmọ wẹn. Oka rẹ ọshare ru wọ hepha enẹna djẹ oka rẹ ọsẹ wọ cha dia obaro na. Ọbe na Do Fathers Matter? da ta:

   “Ọsẹ rọ vwẹ ukẹcha kẹ aye rọyen rọ mrẹvun vwọ dẹ erọnvwọn, ro ji muo brẹ idọktọ ra ra fuẹrẹn ẹdia rẹ omakpokpọ rẹ ọmọ na, che vwẹ ẹguọnọ rẹ aye rọyen na kugbe ọmọ na vwẹ ọke re de vwiẹ nu, vwọ vrẹ ọsẹ ro ru ọnana-a.”

   “Kidie nẹ me guọnọre nẹ aye mẹ roro nẹ ọyen ọvo yen muẹ oghwa rẹ evun na-a, me da vwẹ ukẹcha kẹ vwẹ kidjerhe kidjerhe. Avwanre tobọ rhuẹrẹ uvun rẹ ọmọ na kugbe. Ọnana ọke rẹ oghẹresan vwọ kẹ avwanre rẹ avwanre vwo muegbe rẹ ẹcha rẹ ọmọ na .”​—James.

   Odjekẹ ri Baibol: “Ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.”​—Filipae 2:4.

•   Ọke rẹ de vwiẹ ọmọ na nu. Ẹguọnọ rọhẹ uvwre wẹn vẹ ọmọ wẹn se kodophiyọ siẹrẹ wo de nene heha ji muo. Vwẹ ukẹcha kẹ aye wẹn vwọ vwẹrote ọmọ na. Oborẹ wo ruẹ kerẹ ọsẹ yen che toroba ẹyan obaro rẹ ọmọ na rọ vwọ rhua ye. Oyerinkugbe rọhẹ uvwre wẹn vẹ ọmọ wẹn ru wo ruẹ yovwẹnphiyọ na djerephia nẹ wọ vwẹ ẹro ọghanghanre vwo no.

   “Vwomakpotọ nene ọmọ wẹn heha. Muegbe wọ vwọ hwẹ vwọ kẹ. Karophiyọ nẹ ẹguọnọ yẹn emu rẹsosuọ rẹ ọmọ na che yono mie we.”​—Richard.

   Odjekẹ ri Baibol: “Emọ na vwenẹ ughwẹ rẹ Ọrovwohwo ghare avwanre emamọ rẹ evun na ọye osa rọ hwa kẹ avwanre.”​—Une rẹ Ejiro 127:3.

•   Ọmọ wẹn vwọ rhua na. Ehiahiẹ djerephia nẹ emọ ri vwo uvi rẹ oyerinkugbe vẹ esẹ rayen ruẹ yovwẹn vwẹ isikuru, obo re so omaemuophiyọ kẹ ayẹn ghwe bu-un, ayen ji fobọ reyọ ihuvwun rẹ egangan yẹrẹ vwobọ vwẹ urhi ẹchọ-ọ. Rhuẹrẹ ọke wẹ vẹ ọmọ wẹn vwo vwo uvi rẹ oyerinkugbe.

   “Ọmọshare mẹ vuẹ vwẹ nẹ obo ri che mẹ siurhuru ọke rọ de kpọ ọromobọ rọyen yen otaẹtakuẹgbe rẹ avwanre vwo ọke avwanre da djẹ ugbo oshesheri yẹrẹ ọke rẹ avwanre da riemu. Evo usun rẹ eta rẹ eghanghanre rẹ avwanre tare vwomaphia vwẹ ọke mi rhẹro rọye-en. Avwanre sa ta eta nana kidie avwanre ghwọrọ ọke buebun kugbe.”​—Dennis.

   Odjekẹ ri Baibol: “Ovwan nabọ nomaso kpahen oborẹ ovwan yan, ọ dia kerẹ ẹkpa-a, ẹkẹvuọvo kerẹ evwaghwanre, ovwan rha vwẹ ọke rẹ ovwan vwo ruiruo vwẹ idjerhe ro me yovwin.”​—Ẹfesọs 5:​15, 16.

 Ihwo buebun rhẹro rọyen nẹ esẹ yen cha vwẹ oborẹ orua na guọnọre vwọ kẹ ayen je sẹro rayen, ẹkẹvuọvo vwọ kẹ ini, e rhẹro rọyen nẹ ayen yin che djẹ ẹguọnọ vẹ erorokẹ vwọ kẹ orua na. (Urhi Rivẹ 1:31; Aizaya 49:15) Vwẹ erua evo, oni mu oghwa rẹ ọsẹ, ọsẹ mi rhe mu oghwa rẹ oni. O vwo obo rọ wanre-e, ihwo ri ruẹ ehiahiẹ tare nẹ ọsẹ vẹ oni siobọnẹ emu rẹ oghẹresan ro che toroba erhuvwu rẹ orua na. a

 Judith Wallerstein ro ruẹ ehiahiẹ kpahen akpeyeren rẹ orua ta ota kpahen obo ro rhiẹromrẹ. O de si: “Ọke rẹ imoto vwọ djẹ ro ọmọtẹ mẹ rọ vwọ hẹ ẹgbukpe ihwivẹ, ọ guọnọre nẹ ọsẹ rọyen nene ọyen ro imoto re che vwo muo kpo họsipito kidie ọ vwẹroso ọsẹ na vwẹ ẹdia yena. Re vwo te họspito na nu, ọ da guọnọ nẹ mi chidia kẹrẹ ọkieje rere me sa vwọ nẹrhẹ.” b

 “Ọsẹ sa vwẹ ukẹcha kẹ orua na vwọ nẹrhẹ ẹwẹn rayen totọ vwẹ idjerhe oni na da sa mrẹ bẹnbẹn ro vwọ ru ọtiọyen komobọ. Vwẹ ọke vuọvo na, oni sa nẹrhẹ uwevwin na vọn vẹ ẹguọnọ kidie ọ kerhọ vẹ erorokẹ. Ọtiọyena, o che yovwin siẹrẹ ayen ihwo ivi na da wian kugbe kerẹ ẹko.”​—Daniel.

 Odjekẹ ri Baibol: “Ọmọ mẹ, nyo uyono rẹ Ọsẹ wẹn, wọ jẹ uyono rẹ oni wẹn kuẹfia-a.”​—Isẹ 1:8.

 Kerẹ ọsẹ, yono ọmọtẹ wẹn obo ro fori nẹ eshare nene yerin wan. O che yono ọnana vwẹ idjerhe ivẹ:

•   Ro vwo nẹ oborẹ wẹ vẹ oni rọyen yerẹn wan. Wo de vwo ẹguọnọ ji muọghọ kẹ aye wẹn, ọmọtẹ wẹn cha mrẹ iwan re pha ghanghanre ro fori nẹ o niso vwẹ ọke rọ da cha guọnọ ohwo rọ cha rọvwọn vwẹ obaro obọ.​—1 Pita 3:7.

•   Ro vwo nẹ oborẹ wẹ vẹ ọyen yerẹn wan. Wo de muọghọ kẹ ọmọtẹ wẹn, jẹ wo yono oborẹ o se vwo muọghọ kẹ oma rọyen. Kọ je nẹrhẹ ọ rhẹro rẹ oka rẹ ọghọemuo tiọyena mie eshare efa.

   Vwọ fẹnẹ ọyena, ọsẹ da hanrha ọmọtẹ rọyen ekan ọkieje, ọ sa nẹrhẹ o nẹ oma rọyen kueku ji guọnọ eshare ri che rhiabọreyọ​—eshare ri vwo ọdavwẹ rọye-en.

   “Ọ cha bẹn rẹ ọmọtẹ ro rhiẹromrẹ obicha vẹ ẹguọnọ rẹ ọsẹ rọyen vwo vwo ẹguọnọ rẹ ohwo ro vwo iruemu re vwo vughe omamọ ọshare-e.”​—Wayne.