1, 2. Қай йўсин барчамиз адолатсизликка дуч келишимиз мумкин?

 ИСО шогирдларига қозидан унга адолат кўрсатишини ёлвориб сўраган бева аёл тўғрисида масал келтирган. Бу аёл ҳақидаги ҳикояни Исонинг шогирдлари яхши тушунган, чунки ўша пайтда кўплар адолатсизликнинг қурбони бўлган. (Луқо 18:1–5) Ўша ҳикоя бизнинг кунда ҳам аҳамиятли, ахир барчамиз вақти-вақти билан адолатсизликка дуч келамиз.

² Ҳозир юзхотирчилик ва тенгсизлик, жабр-зулм кенг тарқалган. Шунинг учун бизга адолатсизлик қилишганида, ҳайрон қолмаймиз. (Воиз 5:8) Аммо имондошимиз бизга ноҳақлик қилса, ярага туз сепгандай бўлиши мумкин. Албатта, биродару опа-сингилларимиз ҳақиқат душманлари эмас, улар шунчаки номукаммал. Исо ёвуз одамлар томонидан адолатсизликка дуч келганида қандай йўл тутганидан кўп нарсани ўрганишимиз мумкин. Бизга адолатсизлик қиладиган душманларимизга сабр-тоқат қила олар эканмиз, имондошларимизга нисбатан бундан-да ортиғини қилишимиз керак, шундай эмасми? Яҳовага хизмат қиладиган ёки қилмайдиганлар томонидан адолатсизликка дуч келганимизда У нималарни ҳис қилади? Бошдан ўтказаётганларимиз Худони қизиқтирадими?

3. Адолатсизликдан азоб чекаётганимизга Яҳова бефарқми? Нима учун?

³ Тангри бошқалар бизга қандай муомала қилаётганига бефарқ эмас. Зеро «Яҳова адолатни севади». (Заб. 37:28) Исо бизни Яҳова ўз вақтида «адолатни тезда» ўрнатишига ишонтирмоқда. (Луқо 18:7, 8) Яқинда у барча азоб-уқубатларни  бартараф қилади ва ҳар турли адолатсизликка чек қўяди. (Заб. 72:1, 2)

4. Бугунги кунда Яҳова бизга қай йўсин ёрдам беряпти?

⁴ Адолат ўрнатиладиган пайтни кутар эканмиз, Яҳова ноҳақликка дош беришимизга ёрдам беряпти. (2 Бутр. 3:13) У адолатсизликка дуч келганимизда ўйламай иш қилиб қўйишдан қочишни ўргатяпти. Масалан, Худо адолатсизлик билан кураша олишимиз учун Ўғлининг мукаммал ўрнагини тақдим этган. Шунингдек, Яҳова вазиятимизга қўл келадиган маслаҳатларни ҳам берган.

АДОЛАТСИЗЛИККА ҚАНДАЙ МУНОСАБАТ БИЛДИРАЁТГАНИНГИЗГА ЭЪТИБОРЛИ БЎЛИНГ

5. Адолатсизликка қандай муносабат билдираётганимизга нега эътиборли бўлишимиз лозим?

⁵ Адолатсизликка дуч келганимизда, қаттиқ ранжишимиз ва тушкунликка тушишимиз мумкин. (Воиз 7:7) Аюб, Ҳабаққуқ каби садоқатли хизматчилар худди шундай туйғуларни ҳис этган. (Аюб 6:2, 3; Хаб. 1:1–3) Гарчи бундай ҳис-туйғулар табиий бўлса-да, бирон ножўя иш қилиб қўймаслигимиз учун адолатсизликка қандай муносабат билдираётганимизга эътиборли бўлишимиз керак.

6. Абсаломнинг мисолидан нимани ўрганяпмиз? (Расмга ҳам қаранг.)

⁶ Адолатсизликка дуч келганимизда, қасос олиш истаги пайдо бўлиши мумкин. Агар шундай йўл тутсак, бу вазиятни ёмонлаштириши ҳеч гап эмас. Шоҳ Довуднинг ўғли Абсаломнинг мисолини кўриб чиқайлик. Укаси Омнўн синглиси Тамаранинг номусига текканида, у ғазаб отига минган. Мусонинг Қонунига кўра, Омнўн қилмиши учун ўлимга лойиқ эди. (Лев. 20:17) Абсаломнинг ғазаби асосли эди, лекин бу унга масалани ўзи ҳал қилиш ҳуқуқини бермасди. (2 Шоҳ. 13:20–23, 28, 29)

7. Сано бастакорининг адолатсизликка нисбатан илк муносабати қандай бўлган?

⁷ «Адолатсизлик қиладиганлар жазо олмаётгандай туюлганида, тўғри иш қилиш арзийдими?» деган савол туғилиши мумкин. Яҳованинг бир хизматчисига яхши одамларга адолатсизлик қилаётган ёвузлар ҳаётдан завқ олиб яшаётгандай кўринган. У: «Ёвузлар ана шундай, ҳамма ишлари ўнгидан келади»,— деб айтган. (Заб. 73:1) Бунинг устига, у гувоҳи бўлаётган адолатсизлик дастидан қаттиқ тушкунликка тушиб, Яҳовага хизмат қилиш фойда келтиришига деярли ишонмай қўйган. Ўша сано бастакори:  «Буларни тушунишга уриндим, аммо бу мен учун оғир кечди»,— деб куйлаган. (Заб. 73:14, 16) Шунингдек, у: «Менга келсак, йўлдан озишимга сал қолди, оёқларим тойиб кетаёзди»,— деган. (Заб. 73:2) Шунга ўхшаш вазият Альберто биродаримиз билан юз берган.

8. Адолатсизлик битта биродарга қандай таъсир қилган?

⁸ Альберто жамоат ғазнасидан пул ўғирлаганликда ноҳақ айбланган. Натижада у шарафли вазифаларини йўқотган ва жамоатда бу ҳақда билганлар уни ҳурмат қилмай қўйган. «Аччиқландим, жаҳлим чиқди ва ҳафсалам пир бўлди»,— деб бўлишди у. Альберто ҳиссий оғриғи маънавийлигига таъсир қилишига йўл қўйди ва ҳаттоки беш йил давомида фаолиятсиз бўлиб юрди. Бу воқеа адолатсизликка дуч келганимизда ғазабимизни назорат қилмасак, нима бўлиши мумкинлигини кўрсатяпти.

ИСО ҚАЙ ЙЎСИН АДОЛАТСИЗЛИККА ДОШ БЕРГАНИГА ТАҚЛИД ҚИЛИНГ

9. Исо қандай адолатсизликларга дуч келган? (Расмга ҳам қаранг.)

⁹ Адолатсизликка дош бериш борасида Исо мукаммал ўрнак кўрсатган. У ҳам оила аъзолари, ҳам бошқалар томонидан адолатсиз муносабатга дуч келган. Қариндошлари уни ақлдан озган, дин раҳбарлари эса жинлардан  куч олади, деб айтган. Рим аскарлари бўлса, Исони масхара қилиб, унга азоб берган ва охир-оқибат уни ўлдирган. (Марк 3:21, 22; 14:55; 15:16–20, 35–37) Лекин Исо бу барча адолатсизликларга чидар экан, бирон марта салбий муносабат билдирмаган. Хўш, ундан қандай ўрнак олсак бўлади?

10. Исо адолатсизлик билан қандай курашган? (1 Бутрус 2:21–23)

¹⁰ 1 Бутрус 2:21–23 ни ўқинг a. Адолатсизликка дуч келганимизда қандай йўл тутиш борасида Исо мукаммал ўрнак қолдирган. У қачон жим туришни, қачон гапиришни билган. (Мат. 26:62–64) Бундан ташқари, Исо у ҳақда айтилган ҳамма ёлғон гапларга ҳам жавоб қайтаравермаган. (Мат. 11:19) Гапирганида эса уни таъқиб қилувчиларни ҳақоратламаган ёки уларга дўқ-пўписа қилмаган. У «ўзини одил Ҳакамнинг қўлига» топширгани учун ўзини тута билиш фазилатини намоён эта олган. Исо Яҳова бу вазиятга қандай қараётгани энг муҳими эканини билган ва адолатсизлик қилганларга вақтида жавоб қайтаришига ишонган.

11. Гап-сўзларимизни назорат қилишнинг айрим йўллари қандай? (Расмларга ҳам қаранг.)

¹¹ Адолатсизликка дуч келганимизда, гап-сўзларимизни назорат қилиб, Исога тақлид қилишимиз мумкин. Баъзи адолатсизликлар кичик бўлади ва уларга унча эътибор бермаймиз ёки кейинчалик вазият чигаллашиб кетмаслиги учун ҳеч нарса айтмаслигимиз мумкин. (Воиз 3:7; Ёқб. 1:19, 20) Бошқа вазиятларда эса адолатсиз муносабатга дуч келаётган кишининг тарафини олишимизга ёки эътиқодимизни ҳимоялаш учун ҳақиқатни гапиришимизга тўғри келар.  (Ҳавор. 6:1, 2) Агар гапиришни истасак, буни хотиржамлик ва ҳурмат ила қилиш учун жон куйдиришимиз лозим b. (1 Бутр. 3:15)

12. Қай йўсин ўзимизни «одил Ҳакамнинг қўлига» топшира оламиз?

¹² Ўзимизни «одил Ҳакамнинг қўлига ишониб» топшириш орқали Исога тақлид қилсак бўлади. Бошқалар бизни нотўғри ҳукм қилса ёки бизга нисбатан адолатсизлик қилса, Яҳова ҳақиқатни билишига ишонамиз. Бу ишонч ноҳақликка дош беришимизга ёрдам беради. Чунки биламизки, Яҳова барчасини тўғрилайди. Вазиятни Яҳованинг қўлларига топшириб, қаҳр-ғазаб ёки хафагарчилик қалбимизда ин қуришининг олдини оламиз. Ахир бундай ҳис-туйғулар стрессга тушишимизга, қувончни йўқотишимизга ҳамда Яҳова билан муносабатларимизга путур етишига сабаб бўлади. (Заб. 37:8)

13. Адолатсизликка чидашимизга нима ёрдам бера олади?

¹³ Албатта, Исонинг ўрнагига ҳеч қачон мукаммал тарзда тақлид қила олмаймиз. Гоҳида кейинчалик афсусланишимиз мумкин бўлган нимадир дейишимиз ёки қилишимиз мумкин. (Ёқб. 3:2) Баъзи адолатсизликлар бизга ҳиссий ва жисмоний оғриқ келтириши ва буни бошдан кечириш қийин бўлиши мумкин. Бу сизга таниш бўлса, Яҳова нималарни бошдан кечираётганингизни билишига ишончингиз комил бўлсин. Адолатсизликдан азият чеккан Исо ҳам сизнинг ҳис-туйғуларингизни тушуна олади. (Иброн. 4:15, 16) Яҳова нафақат Исонинг мукаммал ўрнагини қолдирган, балки адолатсизликни енгишимизга кўмаклашадиган амалий маслаҳатларни ҳам берган. Келинг, Римликларга йўлланган мактубдаги иккита оятга диққат қаратайлик. Улар бизга ёрдам бериши мумкин.

«ҚАҲРИГА ЙЎЛ ҚЎЙИБ БЕРИНГЛАР»

14. «Аллоҳнинг қаҳрига йўл қўйиб» бериш нимани англатади? (Римликларга 12:19)

¹⁴ Римликларга 12:19 ни ўқинг. Ҳаворий Павлус масиҳийларни: «Қаҳрига йўл қўйиб беринглар»,— деб ундаганида, кимнинг қаҳрига ишора қилган? Матн таркибига кўра, бу ерда Яҳованинг қаҳри ҳақида гап кетяпти. Худо Ўзи истаган пайтда ва тарзда адолатни ўрнатишига ишонсак, Унинг қаҳрига йўл қўйиб берган бўламиз. Жон исмли биродар ноҳақликка дуч келганидан кейин шундай деди: «Адолатни ўзим истагандай ўрнатиш васвасасига қарши курашишимга тўғри келди. Римликларга 12:19 Яҳовани кутишимга ёрдам берди».

15. Нега Яҳова муаммони ҳал қилишини кутиш энг тўғри йўл?

¹⁵ Қийин муаммони ўзимиз ҳал қилишга интилганимизда, кўпгина стресс ва тушкунликка тушишимиз ҳеч гап эмас. Яҳова вазиятни ўнглашини кутсак, бундан қочган бўламиз. Яҳова ёрдам беришни таклиф қиляпти. У гўёки: «Адолатсизликни менга қўйиб бер, уни Ўзим ҳал қиламан»,— дегандай бўляпти. Яҳованинг: «Жазосини мен бераман»,— деган ваъдасини қабул қилсак, муаммони ўзимиз ҳал қилмаймиз, аксинча, Яҳова буни энг аъло йўл орқали қилишига ишонамиз. Бу юқорида тилга олинган Жонга ёрдам берган. У шундай деди: «Агар Яҳовани кута олсам, У муаммони мендан яхшироқ ҳал қилади».

«ЁМОНЛИКНИ ЯХШИЛИК БИЛАН ЕНГИНГ»

16, 17. Қандай қилиб ибодат ёрдамида «ёмонликни ҳамиша яхшилик билан мағлуб» қила оламиз? (Римликларга 12:21)

¹⁶ Римликларга 12:21 ни ўқинг. Ҳаворий Павлус масиҳийларни «ёмонликни яхшилик билан» енгишга ундаган. Исо Тоғдаги ваъзида: «Душманларингизни севинглар ҳамда сизларни таъқиб қилаётганлар учун ибодат  қилинглар»,— деб айтган. (Мат. 5:44) Унинг ўзи ҳам айнан шундай йўл тутган. Эҳтимол, хаёлимизга римлик аскарлар Исони устунга михлаганида, у қанчалик азоб чеккани келар. Исога шафқатсиз муносабатда бўлишгани ва у қаттиқ оғриққа чидаган. У қанчалик азоб чекканини биз охиригача тушуна олмаймиз.

¹⁷ Исо бошдан кечирган адолатсизлик Уни мағлуб қилишига йўл қўймаган. У аскарларни қарғаши мумкин эди. Лекин у шундай ибодат қилган: «Отажон, буларни кечир, чунки улар нима қилишаётганини билишмайди». (Луқо 23:34) Бизга ёмон муомала қилган инсонлар учун ибодат қилганимизда, хафагарчилик ва жаҳл каби туйғулар енгиллашиши ва ҳатто бизни ранжитган инсонларга нисбатан фикримиз ўзгариши мумкин.

18. Қай йўсин Альберто ва Жон ибодат ёрдамида адолатсизлик билан кураша олди?

¹⁸ Мақоланинг бошида келтирилган иккита биродар ибодат ёрдамида адолатсизликка дош бера олган. Альберто шундай деди: «Менга ноҳақлик қилган биродарлар учун ибодат қилдим. Бир неча марта Яҳовадан мен билан бўлиб ўтганларни унутишимга ёрдам беришини сўрадим. Яхшиямки, ҳозир Альберто яна Яҳовага садоқат ила хизмат қиляпти». Жон эса қуйидагича бўлишди: «Кўп марта мени ранжитган биродар учун ибодат қилганман. Бу каби ибодатлар ёрдамида уни кечира олдим, жаҳлимдан тушдим ва ҳукм қилишни бас қилдим. Ўша ибодатлар қалбимга хотиржамлик берди».

19. Ушбу замонанинг охири келгунча нима қилишимиз керак? (1 Бутрус 3:8, 9)

¹⁹ Ушбу замонанинг охирига қадар олдинда бизни қандай адолатсизликлар кутаётганини билмаймиз. Нима бўлишидан қатъи назар, Яҳовага ёрдам сўраб ибодат қилишдан ҳеч қачон тўхтамайлик. Қолаверса, адолатсизликка дуч келганимизда, Исо каби йўл тутайлик. Муқаддас Китоб принципларига амал қилишда давом этайлик. Шунда Яҳовадан барака олишимиз шубҳасиз. (1 Бутрус 3:8, 9 ни ўқинг.)