Сохта дўст

Бу «дўстни» ёшлигингизда учратгансиз. У билан ўзингизни катталардай ҳис қилгансиз ва у тенгдошларингиз билан тезда тил топишиб кетишингизга кўмаклашгандай туюлган. Сиқилганингизда бу дўстингиз ўзингизни енгилроқ ҳис қилишингизга ёрдам берган. Кўпгина вазиятларда унга таянишга ўрганиб қолгансиз.

Лекин вақт ўтиб, бу дўстингиз сиз ўйлагандай яхши эмаслигини тушундингиз. Баъзан бу дўстингизни деб сизни хуш кўришмаса-да, у сиз доимо уни ўзингиз билан олиб юришингизни талаб қилади. Эҳтимол, у ўзингизни катталардай ҳис қилишингизга кўмаклашгандир, аммо уни деб сиз соғлигингизга зарар келтирдингиз. Боз устига, у пулларингизни ўғирлаяпти.

Муайян вақтдан бери у билан алоқани узишга ҳаракат қиляпсиз, лекин у сизни ўз исканжасида ушлаб турибди. Қайсидир маънода у сизнинг хўжайинингизга айланган ва сиз у билан дўстлашганингиздан афсусланяпсиз.

БУНДАЙ дўстлик сизга сигарет ва уни истеъмол қиладиган кишилар ўртасидаги муносабатни эслатаётгандир. 50 йил тамаки маҳсулотини истеъмол қилган Эрлейн исмли бир аёл ўтмишга қараб шундай деди: «Сигаретим бўлса менга бошқа ҳеч ким керак эмасди. У шунчаки қадрдон дўстим эмас, баъзида ҳатто ягона дўстим эди». Эрлейн сигарет нафақат сохта, балки хавфли дўст эканини тушуниб етди. Юқоридаги кириш сўзлари Эрлейнга ҳам тўғри келади, лекин битта фарқли жиҳати бор. Чекиш Худо берган танани заҳарлагани учун Худонинг назарида ёмон эканини билгач, Эрлейн чекиш одатини ташлади. (2 Коринфликларга 7:1)

Франк исмли киши ҳам Худони хурсанд қилиш учун чекишни ташлашга қарор қилди. Лекин охирги сигаретни чекканидан бир-икки кун ўтгач, у уйидаги айвоннинг тагига тушган эски сигарет қолдиқларини эмаклаб излай бошлади. «Ўша дамда ўзимга келдим. Ифлос жойда эмаклаб, эски қолдиқларни қидираётганим учун ўзимдан жирканиб кетдим ва ўшандан бери чекмадим»,— деб бўлишди Франк.

Нега чекишни ташлаш шунчалик қийин? Тадқиқотчилар бунинг бир нечта сабабини топишди: 1) ноқонуний наркотиклар сингари тамаки маҳсулотлари ҳам қарамликни келтириб чиқариши мумкин; 2) нафас йўллари орқали кирган никотин бор-йўғи 7 сония ичида мияга етиб бора олади; 3) чекиш одатда инсон ҳаётининг ажралмас қисмига айланади, чунки у ейиш, ичиш, суҳбатлашиш, стрессдан холи бўлиш ва шу кабилар билан боғлиқ.

Шундай бўлса-да, Эрлейн ва Франкнинг мисолларидан кўрганимиздек, ушбу зарарли одатдан қутулишнинг имкони бор. Агар чекишни ташламоқчи бўлсангиз, навбатдаги мақолалар сизга бундай қилишга ва ҳаётингизни янгитдан бошлашга ёрдам бериши мумкин.