Ер юзида содир бўлаётган ёвузликлар, Жаннат яқинлигидан далолат бермоқда. Муқаддас Китоб, Жаннат келишидан аввал, машаққатли кунлар бўлиши ҳақда башорат қилган. Биз айнан шу вақтда яшаяпмиз! Ўша башоратлардан айримлари қуйидагилардир:

Жаҳон урушлари. «Халқ халққа қарши, подшоҳлик подшоҳликка қарши кўтарилади» (Матто 24:7). Бу башорат бажарилди. 1914 йилдан буён иккита жаҳон уруши ва кичик миқёсдаги кўпдан-кўп бошқа урушлар бўлди. Бу урушларда миллионлаб одамлар ҳалок бўлди.

Касалликларнинг тарқалиши. «Айрим жойларда... ўлатлар бўлади»,— деб башорат қилинган эди (Луқо 21:11). Бу сўзлар бажо бўлдими? Ҳа. Саратон, юрак касалликлари, сил касаллиги, безгак, ОИТС ва бошқа хасталиклар миллионлаб одамларнинг ёстиғини қурутди.

Озиқ-овқатнинг етишмаслиги. Бутун дунёда овқатга зор бўлган одамлар бор. Ҳар йили миллионлаб одамлар очликдан ўлиб кетишяпти. Бу, Жаннат яқинлигининг яна бир белгисидир. Инжилда озиқ-овқат етишмаслиги айтилган (Марк 13:8).

 Зилзилалар. «Айрим жойларда... зилзилалар бўлади» (Матто 24:7). Бу ҳам бизнинг давримизда юз берди. 1914 йилдан буён миллиондан ортиқ одамлар зилзилаларда ҳалок бўлишди.

Ёвуз одамлар. Одамлар «нафс бандаси, пулпараст» бўлишади. Улар «Худодан кўра айш-ишратни кўпроқ севадилар». Болалар «ота-онага итоатсиз» бўладилар (2 Тимўтийга 3:1-5). Ҳозир кўп одамлар худди шунақа эканлигига қўшиласизми? Улар Аллоҳни ҳурмат қилишмайди, Худо ҳақида билмоқчи бўлганларга эса тўсқинлик қилишади.

Жиноятчилик. Шунингдек, «ёвузлик авжга чиқади» (Матто 24:12). Бугунги кунда, олдингидан кўра жиноятчилик кўпайиб кетганининг гувоҳи бўлаётгандирсиз. Инсонлар ҳар ёқда ўғрилик, ёлғон ва бошқа ёвузликларнинг қурбони бўлишяпти.

Буларнинг барчаси Худонинг Шоҳлиги яқинлигидан далолат беряпти. Инжилда: «Бояги ишларнинг содир бўлаётганини кўрганингизда билингки, Худонинг Шоҳлиги жуда яқиндир»,— деб айтилган (Луқо 21:31). Худонинг Шоҳлиги ўзи нима? Бу, Худонинг осмондаги ҳукумати бўлиб, ер юзида Жаннат ўрнатади. Худонинг Шоҳлиги, инсоний ҳукуматларнинг ўрнини босади (Дониёр 2:44).