Ёшуа 22:1–34
22 Сўнг Ёшуа Рубен ва Гад қабилаларини ҳамда Манаше қабиласининг ярмини йиғиб,
2 уларга шундай деди: «Яҳованинг хизматчиси Мусо нимаики амр этган бўлса, ҳаммасини бажардингиз+. Мен ҳам нимаики буюрган бўлсам, барига қулоқ солдингиз+.
3 Сизлар бугунгача, шунча вақт мобайнида биродарларингизни тарк этмай+, Тангрингиз Яҳованинг амрига бўйсуниб келдингиз+.
4 Мана, Худойингиз Яҳова ваъда қилганидай, биродарларингизга осойишталик ато этди+. Аллоҳингиз Яҳованинг хизматчиси Мусо, эгалик қилишингиз учун Иорданнинг нариги томонида* берган юртда жойлашган чодирларингизга қайтинглар+.
5 Асосийси, Яҳованинг хизматчиси Мусо сизларга берган амрларга ва Тавротга астойдил амал қилинглар+. Худойингиз Яҳовани севинглар+, Унинг барча йўлларидан юринглар+ ва амрларига риоя қилинглар+. Унга содиқ бўлиб+, бутун қалбингиз ва бутун жонингиз* билан+ Унга хизмат қилинглар+».
6 Кейин Ёшуа уларни дуо қилиб, жўнатиб юборди ва улар ўз чодирларига қайтишди.
7 Манаше қабиласининг ярмига Мусо Башанда мерос берган эди+. Қабиланинг иккинчи ярмига Ёшуа Иорданнинг ғарбида биродарлари қатори ер берди+. Бундан ташқари, Ёшуа уларни чодирларига жўнатаётиб, дуо қилди
8 ва қуйидагиларни айтди: «Чодирларингизга кўп бойлик, талайгина чорва, кумушу олтин, мис ва темир ҳамда ниҳоятда кўп кийим-кечак билан қайтинглар+. Ғанимлардан тушган ўлжадан олиб, биродарларингиз билан бўлишинглар+».
9 Сўнгра Рубен билан Гад қабилалари ҳамда Манаше қабиласининг ярми қолган исроилликларни тарк этиб, Канъон юртидаги Шилўдан Гилад юртига+, Яҳованинг Мусо орқали берган буйруғига биноан, ўзлари ўрнашган юртга қайтиб кетишди+.
10 Рубен билан Гад қабилалари ҳамда Манаше қабиласининг ярми Канъон юртидаги Иордан вилоятига етиб келишганида, Иордан бўйида жуда катта қурбонгоҳ бунёд этишди.
11 Бир мунча вақтдан кейин, қолган исроилликларга: «Қаранглар, Рубен билан Гад қабилалари ҳамда Манаше қабиласининг ярми Канъон юртининг чегарасида, Иордан вилоятининг исроилликларга қарашли томонида қурбонгоҳ қуришибди»,— деган хабар келди+.
12 Бу хабарни эшитгач, исроилликларнинг бутун жамоаси уларга қарши жанг қилиш учун Шилўда+ йиғилди.
13 Сўнг исроилликлар Гилад юртидаги Рубен билан Гад қабилалари ҳамда Манаше қабиласининг ярми олдига Элазарнинг ўғли руҳоний Финхазни+ юборишди.
14 У билан бирга ўнта йўлбошчи, Исроил қабилаларининг ҳар бир хонадонидан* биттадан йўлбошчи ҳам борди. Уларнинг ҳар бири минглаб исроилликлар орасида хонадон бошлиқлари эди+.
15 Улар Гилад юртидаги Рубен билан Гад қабилалари ҳамда Манаше қабиласининг ярми олдига келиб шундай дейишди:
16 «Яҳованинг жамоаси бундай деди: “Исроилнинг Тангрисига нисбатан бевафолик қилганингиз нимаси?+ Нега Яҳовага бўйсунмай, ўзингиз учун қурбонгоҳ қуриб, Яҳовага қарши чиқдингиз?+
17 Наҳотки Пиёрда қилган гуноҳимиз бизга камлик қилган бўлса?! Яҳованинг жамоаси бошига фалокат тушганига қарамай, шу кунгача ўзимизни бундан поклаганимиз йўқ+.
18 Сизлар эса яна Яҳовага бўйсунмадингиз! Агар бугун Яҳовага қарши исён кўтарган бўлсангиз, эртага У бутун Исроил жамоасидан ғазабланади+.
19 Борди-ю, мулк қилиб олган юртингиз нопок бўлса, Яҳова эгалик қилган юртга+, Яҳованинг муқаддас чодири ўрнатилган жойга+, бизнинг орамизга келиб ўрнашинглар. Аммо Яҳовага қарши бош кўтарманглар, Аллоҳимиз Яҳованинг қурбонгоҳидан ташқари бошқа қурбонгоҳни бунёд этиб, бизни ҳам исёнкор қилиб қўйманглар+.
20 Зераҳ ўғли Охун+ йўқ қилинадиган* нарсаларни олиб бевафолик қилганида, Худонинг бутун Исроил жамоасига қаҳри келмаганмиди?!+ Ўшанда қилган гуноҳи учун нафақат ўзи, балки бошқа одамлар ҳам ўлган эди-ку”+».
21 Шунда Рубен билан Гад қабилалари ҳамда Манаше қабиласининг ярми, минглаб исроилликларнинг бошлиқларига+ жавобан қуйидагиларни айтишди:
22 «Худолар Худоси Яҳовадир!* Худолар Худоси Яҳовадир!+ Унинг Ўзи ҳам, Исроил халқи ҳам буни билади. Агар биз бош кўтариб, Яҳовага хиёнат қилган бўлсак, бугун У бизни аяб ўтирмасин.
23 Борди-ю, биз Яҳовага бўйсунмай, куйдириладиган қурбонликлар, дон назрлари ва тинчлик қурбонликларини келтирамиз дея, ўзимиз учун қурбонгоҳ қурган бўлсак, Яҳова бизни жазоласин+.
24 Биз битта нарсадан хавотирланиб қурбонгоҳ қурдик. Келажакда ўғилларингиз бизнинг ўғилларимизга: “Исроилнинг Тангриси Яҳовада нима ишингиз бор?
25 Яҳова сизлар — Рубен билан Гад қабилалари ва бизнинг ўртамизда Иорданни чегара қилиб қўйди. Яҳовага тегишли ҳеч бир нарсага аралаша олмайсизлар”,— дейиши мумкин. Шунда ўғилларингиз бизнинг ўғилларимизга Яҳовага топинишга тўсқинлик қилишади.
26 Шу боис: “Келинглар, қурбонгоҳ қурайлик. Бу қурбонгоҳда куйдириладиган қурбонликлар ёки бошқа қурбонликлар келтирилмайди.
27 Келажакда сизлар билан бизнинг ўртамизда гувоҳ бўлиши+, биз ҳам Яҳовага куйдириладиган қурбонликлар, тинчлик қурбонликлари ва бошқа қурбонликларни келтириб+, Унга хизмат қилишимиз, шунингдек, сизларнинг авлодларингиз бизнинг авлодларимизга: “Яҳовага тегишли ҳеч бир нарсага аралаша олмайсизлар”,— деб айтмаслиги учун қурбонгоҳ қурайлик”,— дедик.
28 Ўшанда: “Агар улар келажакда бизга ва авлодларимизга шундай дейдиган бўлишса, биз: “Ота-боболаримиз Яҳованинг қурбонгоҳига ўхшатиб қурган қурбонгоҳга қаранглар. Бу қурбонгоҳ куйдириладиган қурбонликлар ёки бошқа қурбонликлар келтириш учун эмас, балки сизлар ва бизнинг ўртамизда гувоҳ бўлиши учун қурилган”,— деб айтамиз”,— дедик.
29 Тангримиз Яҳованинг муқаддас чодири олдида турган қурбонгоҳдан+ бўлак бошқа қурбонгоҳни қуриб, куйдириладиган қурбонликлар, дон назрлари ва бошқа қурбонликларни келтириб, Яҳовага қарши исён кўтаришни, Яҳовага бўйсунмасликни хаёлимизга ҳам келтирмаганмиз!+»
30 Руҳоний Финхаз ва у билан бирга бўлган жамоа йўлбошчилари ва минглаб исроилликларнинг бошлиқлари Рубен, Гад ҳамда Манаше авлодлари айтган сўзларни эшитиб, мамнун бўлишди+.
31 Сўнг руҳоний Элазарнинг ўғли Финхаз Рубен, Гад ҳамда Манаше авлодларига қуйидагиларни айтди: «Бугун Яҳова бизнинг орамизда эканини билиб олдик. Чунки сизлар Яҳовага нисбатан бевафолик қилмадингиз. Энди Яҳова бизни жазоламайди».
32 Кейин руҳоний Элазарнинг ўғли Финхаз ва йўлбошчилар Рубен билан Гад қабилалари яшаган Гилад юртидан Канъон юртига қайтиб келиб, ҳаммасини исроилликларга айтиб беришди.
33 Исроилликлар бу хабардан мамнун бўлиб, Худони улуғлашди. Рубен билан Гад қабилаларига қарши уруш очиш, улар яшаган юртни хароб қилиш ҳақида эса бошқа оғиз очишмади.
34 Рубен билан Гад қабилалари қурбонгоҳга ном беришди*, чунки: «Қурбонгоҳ ҳаммамиз учун Яҳованинг ҳақ Худо эканига гувоҳдир»,— дейишди.
Изоҳлар
^ Яъни шарқ томонида.
^ Сўзма-сўз «ота хонадонидан», яъни ота томондаги оила назарда тутилган.
^ Сўзма-сўз «йўқ қилишга бағишланган». Ибронийча ушбу ибора номуносиб тарзда фойдаланишдан сақлаш ва кўпинча тамомила йўқ қилиш учун ажратиб қўйиш деган маънога эга.
^ Ёки «Илоҳий Зот, Тангри Яҳова».
^ Эҳтимол, унга «Гувоҳ» деб ном беришган.
