Аюб 20:1–29
20 Намахлик Зўфар+ жавоб бериб деди:
2 «Безовта қилаётган фикрларим мени жавоб қайтаришга ундади,Боиси, ҳис-туйғуларим жунбишга келди.
3 Айтган таъналаринг мени ранжитди,Шунда онгим жавоб қайтаришга рағбатлантирди.
4 Сенга айтмоқчи бўлган нарсаларни наҳотки билмасанг?Ахир одам* яратилганидан бери+,
5 Ёвузларнинг қувонч садоси қисқа,Худосизнинг* севинчи эса бир лаҳзалик-ку+.
6 Гарчи унинг улуғворлиги осмонгача юксалиб,Боши булутларга етса-да,
7 У ўз нажасидай қуриб, тоабад йўқ бўлиб кетади,Уни кўриб юрганлар: “Қани у?” — деб сўрашади.
8 Туш каби учиб кетади, уни топа олишмайди,Тунги рўё сингари йўқолиб кетади.
9 Уни кўрган кўз ҳам,Яшаган жойи ҳам уни бошқа кўрмайди+.
10 Болалари камбағаллардан марҳамат излайди,Йиққан бойлигини ўз қўллари билан эгаларига қайтариб беради+.
11 Суяклари ёшлик куч-қувватига тўла бўлса-да,У куч-қуввати билан бирга тупроққа ётади.
12 Агар ёмонлик оғзида мазали туюлиб,Уни тилининг тагига солса,
13 Ташлагиси келмай лаззатланса,Уни оғзидан чиқармаса,
14 Еган овқати ичида бижғиб,Ошқозонида кобранинг заҳрига* айланади.
15 У бойликни ютиб юборган эди, аммо энди қайт қилади,Худо бойликни унинг қорнидан ташқарига чиқаради.
16 У кобранинг заҳрини сўради,Қора илон уни чақиб ўлдиради.
17 У ҳеч қачон дарё сувини,Асал билан сариёғнинг оқиб келишини кўрмайди.
18 Мол-мулкини ютмай туриб қайтариб беради,Савдо-сотиқ қилиб топган бойлигидан баҳраманд бўлмайди+.
19 У камбағалларни эзиб, уларни ташлаб кетган эди,Ўзи қурмаган уйни тортиб олган эди.
20 Аммо ичида тинчлик-хотиржамлик бўлмайди,Бойлиги уни қутқармайди.
21 Ютиб юборадиган ҳеч вақоси қолмади,Шу боис, унинг фаровонлиги узоққа чўзилмайди.
22 Фаровонлиги авж нуқтасига етганда, ғам-ташвиш уни енгади,Балою офатлар бошига тушади.
23 У қорнини тўйдириб турган бир пайтда,Аллоҳ оташин ғазабини унга сочади,Бахтсизликларни ёмғир каби устига ёғдиради.
24 У темир қуроллардан қочиб қутулса ҳам,Мис ёйнинг ўқлари унга санчилади.
25 У ўқни белидан тортиб олади,Ялтироқ камон ўқини ўт пуфагидан чиқаради,Уни ваҳима босади+.
26 Хазиналари тим қоронғиликка улоқтирилади,Ҳеч ким ёқмаган олов уни ютиб юборади,Чодирида қолган ҳар қандай одам фалокатга учрайди.
27 Осмон унинг хатосини фош этади,Ер унга қарши кўтарилади.
28 Худонинг қаҳр-ғазаб кунида уйини сел оқизиб кетади,Тошқин сувлар ювиб кетади.
29 Ёвузнинг Аллоҳдан оладиган улуши,Худо унга тайин этган мероси шудир».
