Еремиё 7:1–34
7 Яҳова Еремиёга шундай сўзлар билан мурожаат қилди:
2 «Яҳованинг уйи дарвозаси олдида туриб, қуйидаги хабарни эълон қил: “Эй, Яҳовага сажда қилиш учун бу дарвозалардан кирадиган Яҳудо халқи, барчангиз Яҳованинг сўзларини тингланг.
3 Исроил Худоси, Қўшинлар Сарвари Яҳова демоқда: “Йўлларингизни ўзгартириб, ишларингизни тузатинглар. Шунда бу ерда яшашингизга рухсат бераман+.
4 Ёлғон сўзларга ишониб: “Бу* Яҳованинг маъбади! Яҳованинг маъбади! Яҳованинг маъбади!” — деб айтманглар+.
5 Агар йўлларингизни ўзгартириб, ишларингизни тузатсангиз, даъволашаётган кишилар ўртасида адолат ўрнатсангиз+,
6 мусофирлар, етимлар ва беваларни эзмасангиз+, бу ерда бегуноҳ кишининг қонини тўкмасангиз ҳамда ўзингизга зарар келтириб бошқа худолар орқасидан эргашмасангиз+,
7 бу ерда — ота-боболарингиз доим яшаши учун Мен берган юртда истиқомат қилишингизга рухсат бераман”».
8 «Аммо сизлар ёлғон сўзларга ишоняпсизлар+. Бунинг умуман фойдаси йўқ.
9 Сизлар ўғрилик+, қотиллик ва зино қиласизлар, ёлғон қасам ичасизлар+, Баалга қурбонликлар келтириб+, ўзингиз билмаган худоларга эргашасизлар.
10 Шунча жирканч ишлар қила туриб, Менинг исмим билан аталган уй олдига келиб: “Биз қутқариламиз”,— дейсизларми?
11 Менинг номим билан аталган бу уй сизлар учун қароқчилар уяси бўлиб қолдими?+ Нималар қилаётганингизни кўриб турибман»,— демоқда Яҳова.
12 «“Энди Шилўдаги муқаддас масканимга+, исмим учун танлаган биринчи жойга бориб+, халқим Исроилнинг қилган ёмонликлари учун у ерни қандай аҳволга солганимни кўриб қўйинглар+.
13 Аммо сизлар бу барча ёвуз ишларни қилишдан тўхтамадингиз,— демоқда Яҳова. — Ҳатто қайта-қайта сизларга гапирган бўлсам-да, қулоқ солмадингиз+. Мен сизларни чақиравердим, аммо жавоб бермадингиз+.
14 Шунинг учун, Шилўни не кўйга солган бўлсам+, сизлар умид боғлаган+ ва Менинг исмим билан аталган уйни+, Мен сизларга ва ота-боболарингизга берган жойни ҳам шу кўйга соламан.
15 Мен барча биродарларингизни, Эфрайимнинг ҳамма авлодларини ҳайдаганимдай, сизларни ҳам кўз олдимдан ҳайдайман”+.
16 Сен эса, бу халқ учун ибодат қилма. Улар учун фарёд кўтарма, ялиниб-ёлворма+. Мен сени эшитмайман+.
17 Яҳудо шаҳарларида ва Қуддус кўчаларида улар нималар қилаётганини кўрмаяпсанми?
18 Уларнинг ўғиллари ўтин йиғишади, оталари олов ёқишади, хотинлари эса Само Қироличасига* атаб қурбонлик кулчаларини пишириш учун хамир қоришади+. Улар бошқа худоларга ичимлик назрини қуйиб, Мени ранжитишади+.
19 “Улар Менга зарар етказишяптими? Ўзларига зарар етказишяпти-ку! Ўзларини шарманда қилишяпти-ку!” — демоқда Яҳова+.
20 Олий Ҳукмдор Яҳова шундай демоқда: “Мен қаҳр-ғазабимни бу жойга+, одамлару ҳайвонларга, даладаги дарахтларга ва ернинг ҳосилига сочаман. Қаҳрим олов каби ёнади, у сўнмайди”+.
21 Исроил Тангриси, Қўшинлар Сарвари Яҳова шундай демоқда: “Боринглар, бошқа қурбонликларингизга бутунлай куйдириладиган қурбонликларингизни қўшиб гўштини ҳам ўзларингиз еяверинглар+.
22 Зеро, Мен ота-боболарингизни Миср юртидан олиб чиққан куним, уларга бутунлай куйдириладиган қурбонликлар ва бошқа қурбонликлар ҳақида ҳеч нарса айтмагандим, ҳеч қандай буйруқ бермагандим+.
23 Аксинча, Мен уларга шундай деб буйруқ бергандим: “Менга қулоқ солинглар, шунда Мен сизларнинг Худойингиз, сизлар эса Менинг халқим бўласизлар+. Ўзингизга яхши бўлиши учун, Мен амр этган йўллардан юришингиз керак”+.
24 Аммо улар Менга қулоқ солмадилар, Мени тинглаш учун қулоқ тутмадилар+. Аксинча, ўзлари билганча йўл тутдилар, ўжарлик билан ёвуз юракларига эргашдилар+. Улар олға юриш ўрнига, ортга кетдилар.
25 Ота-боболарингиз Миср юртидан чиққан кундан то бугунгача аҳвол ўзгаргани йўқ+. Мен хизматчиларим бўлмиш пайғамбарларни ҳар куни, қайта-қайта олдингизга юбориб турдим+.
26 Лекин бу халқ Менга қулоқ солишдан бош тортди, Менга қулоқ тутмади+. Улар ўжарлик қилиб, ота-боболаридан ҳам ўтиб тушдилар!
27 Сен бу барча сўзларни уларга айтсанг ҳам+, улар сенга қулоқ солишмайди. Уларни чақирсанг ҳам, улар сенга жавоб беришмайди.
28 Сен уларга шундай деб айт: “Бу халқ ўз Худоси Яҳовага қулоқ солмади ва Унинг тарбиясини олишни истамади. Садоқат деган нарса қолмади, уларнинг орасида ҳатто тилга олинмайдиган бўлди”+.
29 Узун сочларингни қирқиб ташла*. Яланг тепаликларда марсия айт. Зеро, Яҳова бу авлодни рад этди. Унинг ғазабини келтиргани учун, уларни тарк этади.
30 “Чунки Яҳудо халқи Менинг назаримда ёмон ишлар қилди,— демоқда Яҳова. — Улар Менинг исмим билан аталган уйни булғаш учун у ерга жирканч бутларини ўрнатишди+.
31 Улар ўғилу қизларини оловда куйдириш учун+ Ҳинном ўғлининг водийсидаги*+ Тофатда тепаликлар барпо этишди. Улар Мен буюрмаган, ҳатто ҳеч қачон хаёлимга ҳам келмаган ишни қилишди”+.
32 “Мана, шундай кунлар келяптики,— демоқда Яҳова, — бу жой ортиқ Тофат ёки Ҳинном ўғлининг водийси деб эмас, Қирғин водийси деб аталади. Улар Тофат тўлмагунча у ерда ўликларни кўмишади+.
33 Бу одамларнинг жасадлари осмондаги қушларга ва ер юзидаги ҳайвонларга ем бўлади. Уларни ҳайдайдиган ҳеч ким бўлмайди+.
34 Мен Яҳудо шаҳарларида ва Қуддус кўчаларида шодиёна ва хурсандчилик ҳайқириқларига чек қўяман, у ерда келин-куёвнинг овози эшитилмайди+. Чунки бу юрт харобага айланади”»+.
Изоҳлар
^ Сўзма-сўз «Буларнинг бари». Бу оятда маъбад биноларининг мажмуи назарда тутилган.
^ Муртад исроилликлар сиғинган маъбуданинг номи. Эҳтимол, ҳосилдорлик маъбудаси бўлган.
^ Сион ёки Қуддусга қарата айтилган.
