Забур 74:1–23
Маскил*. Осиф саноси+.
74 Эй Худойим, нега бизни бутунлай рад этдинг?+
Нега яйловингдаги Ўз сурувингга ғазабинг аланга олди?+
2 Қадимда Ўзинг танлаган халқни+,Мулк сифатида қутқариб олган халқни ёдга ол+.
Ўзинг яшаган Сион тоғини эсла+.
3 Азалий харобалар томон қадам бос+.
Муқаддас маскандаги бор нарсани душман хароб қилди+.
4 Сенга топинадиган ерда ёвларинг ҳайқириғи янграяпти+.
У ерга улар ўз рамзларини ўрнатиб қўйди.
5 Улар қалин ўрмонни кесишга болта кўтарган одамга ўхшайди.
6 Улар маъбаднинг* ўймакор безакларини+ болтаю темир асбоблар билан бузди.
7 Улар муқаддас масканингга ўт қўйиб юборди+.
Исминг билан аталган муқаддас чодирни яксон қилиб, булғади.
8 Улар ҳам, зурриёти ҳам ўз кўнглида:
«Худога топинадиган жойларнинг барига ўт қўямиз»,— деди.
9 Биз кўрадиган белгилар қолмади,Бирорта пайғамбар ҳам қолмади.Орамиздан ҳеч ким бу қанча давом этишини билмайди.
10 Эй Худо, қачонгача душманлар Сени масхара қилади?+
Ёв исмингни тоабад оёғости қиладими?+
11 Нега қўлингни, ўнг қўлингни ишга солмаяпсан?+
Қўлингни қўлтиғингдан чиқариб, уларни йўқ қил.
12 Аммо ер юзида буюк нажот ишларини қилувчи Худо,Менинг азалий Подшоҳимдир+.
13 Сен қудратинг ила денгизни тўлқинлантирдинг+,Денгиз махлуқларининг бошларини сувда эзиб ташладинг.
14 Тимсоҳнинг* бошини янчиб,Чўлда яшовчиларга емиш қилиб бердинг.
15 Сен булоқлару сойларнинг кўзини очиб юбординг+,Оқар дарёларни эса қуритдинг+.
16 Кун билан тунни яратган Сенсан,
Ёруғлик* билан қуёшни ҳам Сен бунёд этгансан+.
17 Ернинг чегараларини Сен ўрнатгансан+,Ёз ва қиш мавсумларини ҳам белгилаган Сенсан+.
18 Эй Яҳова, ғаним Сени мазах қилганини,Нодонлар исмингни оёғости қилганини эсла+.
19 Ғурракнинг жонини йиртқич ҳайвонларга берма.
Мазлум халқингни тоабад унутма.
20 Биз билан қилган аҳдингни эсла,Зеро, ернинг қоронғи жойлари зўравонлик маконига айланди.
21 Жабрдийданинг кўнгли чўкмасин+,Бечора ва камбағал одам исмингни шарафласин+.
22 Қўзғал, эй Тангрим, адолат ўрнат,
Нодон кун бўйи исмингни мазах қилганини эсла+.
23 Ёвларинг айтган гапларини унутма.
Ахир Сенга қарши чиқаётганлар ғала-ғовури кучайиб боряпти.
