Закариё 1:1–21
1 Доро* ҳукмронлигининг иккинчи йили+, саккизинчи ойида, Иддонинг невараси Бархиё ўғли Закариё* пайғамбарга+ Яҳова қуйидаги сўзларни аён қилди:
2 «Яҳова ота-боболарингиздан қаттиқ ғазабланган эди+.
3 Уларга айт: “Қўшинлар Сарвари Яҳова демоқда: “Менга қайтинглар,— деб айтмоқда Қўшинлар Сарвари Яҳова, — шунда Мен ҳам сизларга қайтаман”+,— деб айтмоқда Қўшинлар Сарвари Яҳова”.
4 Ота-боболарингиз сингари бўлманглар. Ўтмишда пайғамбарлар: “Қўшинлар Сарвари Яҳова демоқда: “Илтимос, ёмон йўлларингиздан қайтиб, ёвуз ишларингизни ташланглар”,— деб уларга эълон қилишган+.
“Аммо улар Менга қулоқ ҳам солмадилар, эътибор ҳам бермадилар”+,— демоқда Яҳова.
5 “Ҳозир ота-боболарингиз қаерда?! Пайғамбарлар абадий яшаганми?!
6 Хизматкорларим бўлмиш пайғамбарлар орқали айтган сўзларим ва фармонларим амалга ошганини ота-боболарингиз кўрмадими?!+ Шунда улар Менга қайтиб: “Қўшинлар Сарвари Яҳова юрган йўлларимиз ва қилган ишларимизга яраша қандай йўл тутишини айтган бўлса, шундай қилди”+,— деб тан олишди».
7 Доро ҳукмронлигининг иккинчи йили+, 11- ойи, яъни шебат* ойининг 24- кунида Иддонинг невараси Бархиё ўғли Закариё пайғамбарга Яҳованинг сўзлари аён бўлди:
8 «Мен кечаси ваҳий кўрдим. Ваҳийда қизил отга минган киши дарадаги мирта дарахтлари орасида турган экан. Унинг орқасида қизил, қизғиш-жигарранг ва оқ отлар бор эди.
9 Шунда мен: “Тақсирим, булар ким?” — деб сўрадим.
Мен билан гаплашаётган фаришта жавобан деди: “Улар кимлигини сенга кўрсатаман”.
10 Сўнг мирта дарахтлари орасида турган киши деди: “Яҳова бу одамларни ер юзини айланиб чиқишга юборган эди”.
11 Шунда улар мирта дарахтлари орасида турган Яҳованинг фариштасига: “Биз ерни айланиб чиқдик. Бутун ер юзида тинчлик ва осойишталик ҳукм сурмоқда”+,— дейишди.
12 Яҳованинг фариштаси шундай деди: “Эй, Қўшинлар Сарвари Яҳова, қачонгача Қуддус ва Яҳудо шаҳарларидан раҳм-шафқатингни дариғ тутасан?+ Мана 70 йилдирки, Сен улардан ғазабланяпсан!+”
13 Яҳова мен билан гаплашаётган фариштага меҳр ва тасалли берувчи сўзлар ила жавоб қайтарди.
14 Кейин мен билан гаплашаётган фаришта менга деди: “Эълон қил: “Қўшинлар Сарвари Яҳова демоқда: “Қуддус ва Сионни қаттиқ севиб, улар учун қайғуряпман+.
15 Бепарво халқлардан қаттиқ ғазабланяпман+. Мен халқимни озгина жазоламоқчи эдим+, улар эса халқимни кўп қийнашди+”.
16 Шу сабабли Яҳова айтмоқда: “Мен Қуддусга раҳм-шафқат кўрсатиш учун қайтаман+ ва уйим ўша ерда қайта қурилади+,— демоқда Қўшинлар Сарвари Яҳова, — ўлчов ипи Қуддус устидан тортилади”+.
17 Яна бундай деб эълон қил: “Қўшинлар Сарвари Яҳова демоқда: “Менинг шаҳарларим яна яхшилик билан тўлиб-тошади. Яҳова Сионни яна юпатиб+, Қуддусни яна танлайди”+».
18 Сўнг юқорига қарадим ва тўртта шохни+ кўрдим.
19 Кейин мен билан гаплашаётган фариштадан сўрадим: «Бу шохлар нимани билдиради?» Фаришта эса: «Бу — Яҳудо+, Исроил+ ва Қуддусни+ тўзғитиб юборган шохлар»,— деб жавоб қайтарди.
20 Сўнг Яҳова менга тўртта устани кўрсатди.
21 Мен эса: «Улар нима қилиш учун келишяпти?» — деб сўрадим.
У: «Шохлар Яҳудони шу даражада тўзғитиб юборган эдики, ҳеч ким бошини кўтара олмади. Бу усталар Яҳудони тўзғитиб юбориш учун шохларини кўтарган халқларни қўрқитгани ва улоқтириб ташлагани келишяпти»,— деб жавоб қайтарди.