Ибтидо 5:1–32
5 Одамнинг тарихи ҳақидаги баёнот қуйидагича: Тангри Одамни яратган куни, уни Ўзига монанд қилиб вужудга келтирди+.
2 Уларни эркак ва аёл қилиб яратди+. Улар яратилган куни+, Аллоҳ уларни қутлаб, уларни «инсон»*, дея атади.
3 Одам 130 ёшга кирганида, ўзига ўхшаш бўлган, ўзига монанд бир ўғил кўрди ва исмини Шис+ қўйди.
4 Шис туғилгандан кейин, Одам яна 800 йил яшади. Бу орада у кўпгина ўғил-қизларнинг отаси бўлди.
5 Одам ҳаммаси бўлиб 930 йил умр кўрди ва ҳаётдан кўз юмди+.
6 Шис 105 ёшга кирганида, ўғли Энўш+ дунёга келди.
7 Энўш туғилганидан сўнг Шис яна 807 йил яшади. Бу вақт давомида у кўпгина ўғил-қизларнинг отаси бўлди.
8 Шис жами 912 йил умр кўриб, вафот этди.
9 Энўш 90 ёшга тўлганида ўғли Хенан туғилди.
10 Хенан дунёга келганидан кейин, Энўш яна 815 йил умр кўрди. Бу вақт мобайнида у кўпгина ўғил-қизларнинг отаси бўлди.
11 Энўш ҳаммаси бўлиб 905 йил яшаб, ҳаётдан кўз юмди.
12 Хенан 70 ёшда бўлганида ўғли Махалиёл+ дунёга келди.
13 Махалиёл туғилганидан сўнг, Хенан яна 840 йил яшади. Бу орада у кўпгина ўғил-қизларнинг отаси бўлди.
14 Хенан жами 910 йил умр кечириб, вафот этди.
15 Махалиёл 65 ёшга кирганида, ўғли Ёред+ туғилди.
16 Ёред дунёга келганидан кейин, Махалиёл яна 830 йил умр кўрди. Бу вақт давомида у кўпгина ўғил-қизларнинг отаси бўлди.
17 Махалиёл ҳаммаси бўлиб 895 йил яшаб, ҳаётдан кўз юмди.
18 Ёред 162 ёшда бўлганида, ўғли Ханўх+ дунёга келди.
19 Ханўх туғилганидан сўнг, Ёред яна 800 йил яшади. Бу вақт мобайнида у кўпгина ўғил-қизларнинг отаси бўлди.
20 Ёред жами 962 йил умр кўриб, вафот этди.
21 Ханўх 65 йил яшагач, ўғли Матушалоҳ+ туғилди.
22 Матушалоҳ дунёга келганидан кейин, Ханўх 300 йил ҳақ Худога* ҳамроҳ бўлиб яшади. Бу орада, у кўпгина ўғил-қизларнинг отаси бўлди.
23 Ханўх ҳаммаси бўлиб 365 йил умр кўрди.
24 Ханўх ҳақ Худога ҳамроҳ бўлиб яшашни канда қилмади+. Кейин Аллоҳ уни олиб кетгани боис, уни ҳеч ким кўрмади+.
25 Матушалоҳ 187 йил умр кўргач, ўғли Ламех+ дунёга келди.
26 Ламех туғилгандан сўнг, Матушалоҳ яна 782 йил яшади ва кўпгина ўғил-қизларнинг отаси бўлди.
27 Матушалоҳ жами 969 йил яшаб, ҳаётдан кўз юмди.
28 Ламех 182 йил яшагандан кейин, ўғилли бўлди.
29 У: «Яҳова лаънатлаган ерга ишлов берганимизда, меҳнатимизга ва заҳмат чеккан бизларга у енгиллик* беради»+,— дея, ўғлининг исмини Нуҳ*+ қўйди.
30 Нуҳ дунёга келгандан сўнг, Ламех яна 595 йил умр кўрди. Бу вақт давомида у кўпгина ўғил-қизларнинг отаси бўлди.
31 Ламех ҳаммаси бўлиб 777 йил яшагач, вафот этди.
32 Нуҳ 500 ёшга киргандан кейин, Сом+, Хом+ ва Ёфас+ исмли уч нафар ўғил кўрди.
