Левилар 13:1–59
13 Яҳова Мусо билан Ҳорунга гапиришда давом этиб, деди:
2 «Агар одамнинг баданида шиш, тошма, доғ пайдо бўлиб, бу мохов касаллигига*+ ўхшаса, уни руҳоний Ҳоруннинг ёки руҳоний бўлиб хизмат қилаётган ўғилларидан бирининг олдига олиб бориш даркор+.
3 Руҳоний унинг касалланган жойини текшириб кўрсин. Агар касалланган жойдаги туклар оқарган ва касаллик тери остига ўтган бўлса, бу мохов касаллигидир. Руҳоний уни текшириб кўрсин ва уни нопок деб эълон қилсин.
4 Бироқ унинг баданидаги доғ оқарган, аммо тери остига ўтмаган ва устидаги туклари оқармаган бўлса, руҳоний касалланган кишини етти кунга бошқалардан ажратиб қўйсин+.
5 Еттинчи куни руҳоний уни қайта текширсин. Агар касаллик тўхтаб, баданига тарқалмаганини кўрса, руҳоний уни яна етти кунга бошқалардан ажратиб қўйсин.
6 Еттинчи куни руҳоний уни яна бир бор текшириб чиқсин. Борди-ю, касалланган жойи қуриган ва баданига тарқалмаган бўлса, руҳоний уни пок деб эълон қилсин+. Бу, шунчаки зарарсиз ярадир. Ўша киши кийимларини ювсин ва у пок бўлади.
7 Бироқ руҳоний унинг поклигини тасдиқлаганидан сўнг, касаллик унинг баданига тарқалиб кетса, у яна руҳонийга кўринсин.
8 Руҳоний уни текшириб чиқсин. Агар касаллик баданига тарқалиб кетган бўлса, руҳоний уни нопок деб эълон қилсин. Бу — мохов хасталиги+.
9 Борди-ю, кишида мохов касаллиги пайдо бўлса, уни руҳонийнинг ҳузурига келтириш керак.
10 Руҳоний уни текшириб кўрсин+. Агар унинг баданида оқ шиш пайдо бўлиб, устидаги туклари оқарган ва очиқ яраси бўлса+,
11 бу, терида пайдо бўлган сурункали мохов касаллигидир. Руҳоний уни нопок деб эълон қилсин. Бу кишини бошқалардан ажратиб қўйишга ҳожат йўқ+, чунки у нопокдир.
12 Агар мохов касаллиги унинг бутун баданини, руҳоний кўра оладиган ерларини, бошидан тортиб оёғигача қоплаган бўлса,
13 руҳоний уни текширсин-да, мохов унинг бутун баданини қоплаб олганини кўрса, касалланган кишини пок деб эълон қилсин. Бутун бадани оқариб кетгани боис, у покдир.
14 Лекин баданида очиқ яра пайдо бўлса, у нопокдир.
15 Руҳоний очиқ ярани кўздан кечириб, ўша кишини нопок деб эълон қилсин+. Очиқ яра нопок ҳисобланади. Бу — мохов касаллиги+.
16 Борди-ю, очиқ яраси битиб, оқариб қолса, у руҳонийнинг олдига борсин.
17 Руҳоний уни текшириб кўрсин+. Агар касалланган жойи оқарган бўлса, руҳоний касалланган кишини пок деб эълон қилсин. У пок ҳисобланади.
18 Мабодо кишининг баданига чипқон чиқса-ю, кейин битиб кетса,
19 аммо чипқоннинг ўрнида оқ шиш ёки қизғиш-оқ доғ пайдо бўлса, у ўзини руҳонийга кўрсатсин.
20 Руҳоний уни текшириб кўрсин+. Агар касаллик тери остига ўтиб, устидаги туклари оқарган бўлса, руҳоний уни нопок деб эълон қилсин. Бу, чипқоннинг ўрнида чиққан мохов касаллигидир.
21 Текшираётиб, руҳоний доғнинг устидаги туклар оқармаганини ва у тери остига ўтмаганини ҳамда қуриганини кўрса, ўша кишини етти кунга бошқалардан ажратиб қўйсин+.
22 Агар доғ унинг бадани бўйлаб тарқалиб кетса, руҳоний уни нопок деб эълон қилсин. У моховдир.
23 Лекин доғ тарқалмай, фақат бир жойда бўлса, бу шунчаки чипқоннинг яллиғланиши ҳисобланади. Руҳоний бу кишини пок деб эълон қилсин+.
24 Борди-ю, кимдир бирон жойини куйдириб олса ва куйган жойида қизғиш-оқ ёки оқ доғ пайдо бўлса,
25 руҳоний уни текшириб чиқсин. Агар доғнинг устидаги тук оқарган ва у тери остига ўтгани маълум бўлса, бу куйган жойга чиққан мохов касаллигидир. Руҳоний уни нопок деб эълон қилсин. Бу — мохов хасталиги.
26 Текшираётиб, руҳоний доғнинг устидаги туклар оқармаганини ва у тери остига ўтмаганини ҳамда қуриганини кўрса, ўша кишини етти кунга бошқалардан ажратиб қўйсин+.
27 Еттинчи куни руҳоний уни текшириб чиқсин. Касаллик унинг бадани бўйлаб тарқалгани аниқланса, руҳоний уни нопок деб эълон қилсин. Бу — мохов касаллиги.
28 Бироқ доғ бадани бўйлаб тарқалмасдан бир жойда бўлса ва у қуриса, бу шунчаки куйган жойдан чиққан шиш ҳисобланади. Руҳоний уни пок деб эълон қилсин, чунки бу, куйган жойнинг яллиғланиши.
29 Агар эркак ёки аёлнинг боши ёки иягига яра чиқса,
30 руҳоний ярани кўздан кечирсин+. Яра тери остига ўтган бўлса ва устидаги туклари сарғайиб сийраклашса, руҳоний бу кишини нопок деб эълон қилсин. Бу — соч ва соқол касаллиги. Бу, бош ва иякда пайдо бўлган мохов касаллигидир.
31 Бироқ руҳоний ярани кўздан кечирганда, у тери остига ўтмагани ва устида қора туклари йўқлигини кўрса, касалланган кишини етти кунга бошқалардан ажратиб қўйсин+.
32 Еттинчи куни руҳоний ярани текшириб кўрсин. Агар яра тарқалмаган ва устидаги туклар сарғаймаган бўлса, шунингдек, тери остига ўтмагани кўринса,
33 ўша киши соч-соқолини қирсин, лекин касалланган жойига тегмасин. Руҳоний касалланган кишини етти кунга бошқалардан ажратиб қўйсин.
34 Еттинчи куни руҳоний касалланган жойни қайта кўздан кечирсин. Боши ва иягидаги яра баданига тарқалмаган ҳамда тери остига ўтмаган бўлса, руҳоний уни пок деб эълон қилсин. Ўша киши кийимларини ювсин ва у пок бўлади.
35 Бироқ руҳоний уни пок деб эълон қилганидан кейин, яра баданига тарқалиб кетса,
36 руҳоний уни кўздан кечирсин, борди-ю, яра баданига тарқалиб кетган бўлса, устидаги туклари сарғайган-сарғаймаганини текширишга ҳожат йўқ. Бу киши нопокдир.
37 Текширув пайтида яра тарқалмагани ва устида қора туклар ўсиб чиққани маълум бўлса, бу яра тузалганидан далолат беради. У киши покдир. Руҳоний уни пок деб эълон қилсин+.
38 Агар эркак ёки аёлнинг баданида доғлар пайдо бўлиб, улар оқ бўлса,
39 руҳоний доғларни кўздан кечирсин+. Борди-ю, баданидаги доғлар оқиш тусда бўлса, бу баданга тошган зарарсиз тошмадир. Бу киши покдир.
40 Мабодо кишининг бошидаги сочлари тўкилиб, кал бўлиб қолса, у покдир.
41 Бошининг олд томонидаги сочлари тўкилиб, ўша ери кал бўлиб қолса, у покдир.
42 Бошининг кал бўлиб қолган тепа қисмида ёки пешонасида қизғиш-оқ яра пайдо бўлса, бу, боши ёки пешонасига чиққан мохов касаллигидир.
43 Руҳоний уни текшириб кўрсин. Бошининг кал бўлиб қолган тепа қисмида ёки пешонасида қизғиш-оқ тусли тошма пайдо бўлса ва бу баданга чиққан мохов касаллигига ўхшаса,
44 демак, у мохов. Ўша киши нопок бўлади, руҳоний уни нопок деб эълон қилсин, чунки бу, унинг бошига чиққан касалликдир.
45 Мохов кишининг кийимлари йиртилган, сочлари эса тўзиган бўлсин. У оғзини* бекитиб: “Нопокман, нопокман!” — дея бақирсин.
46 Тузалмагунча, у нопок ҳисобланади. Нопок бўлгани учун, у бошқалардан алоҳида, қароргоҳнинг ташқарисида яшасин+.
47 Борди-ю, кийимда, у жундан ёки зиғир матосидан бўладими, касаллик қўзғатувчи бирор нарса* пайдо бўлса,
48 шунингдек, зиғир ёки жун матонинг танда ва арқоқ ипларида, терида ёки теридан тайёрланган бирор нарсада пайдо бўлса ва
49 кийимда, терида, танда ва арқоқ ипларида ҳамда теридан тайёрланган нарсада сарғиш-яшил ёки қизғиш доғ пайдо бўлса, бу мохов билан зарарланганликдан даракдир. Уни руҳонийга кўрсатиш керак.
50 Руҳоний касаллик пайдо бўлган нарсани кўздан кечирсин ва уни етти кун алоҳида жойда сақласин+.
51 У еттинчи куни нарсани кўздан кечириб, касаллик кийимга, танда ва арқоқ ипларига, ёки терига (бу тери қайси мақсадда қўлланилмасин) тарқалганини кўрса, бу юқумли мохов касаллигидир ва бу нарса нопок ҳисобланади+.
52 Руҳоний касаллик пайдо бўлган нарсани, у кийим бўладими, зиғир ёки жун матонинг танда ва арқоқ иплари ёки теридан тайёрланган бирор буюм бўладими, ёқиб юборсин. Чунки бу, юқумли мохов касаллигидир. Бу нарса оловда ёқиб юборилсин.
53 Лекин руҳоний уларни кўздан кечириб, касаллик кийимга, танда ва арқоқ ипларига ёки теридан тайёрланган бирор буюмга тарқалмаганини аниқласа,
54 зарарланган нарсаларни ювишни буюрсин ва бу нарсаларни яна етти кун алоҳида жойда сақласин.
55 Зарарланган нарсалар яхшилаб ювилганидан кейин руҳоний уларни яна кўздан кечирсин. Агар уларнинг кўриниши аввалгидек бўлиб, касаллик тарқалмаган бўлса ҳам, бу нарса нопокдир. Касаллик унинг ички ёки ташқи томонини босиб кетгани учун, у оловда ёқиб юборилсин.
56 Руҳоний уни кўздан кечириб, яхшилаб ювилганидан кейин зарарланган жойи оч тусга кирганини кўрса, у кийим ёки терининг ёхуд тўқилган матонинг ўша ерини йиртиб олсин.
57 Бироқ кийим, танда ва арқоқ иплари ёки теридан тайёрланган бирор буюмнинг бошқа жойларида яна пайдо бўлса, демак у тарқаляпти, зарарланган ҳар қандай нарса оловда ёқиб юборилсин+.
58 Борди-ю, кийим ёки мато ёхуд тери ювилганидан сўнг касаллик белгиси йўқолса, уни иккинчи марта ювиш керак ва у пок бўлади.
59 Зиғир ёки жун матодан қилинган кийимда, танда ва арқоқ ипларида ёки теридан тайёрланган бирор буюмда мохов касаллиги пайдо бўлганда, уни пок ёки нопок деб эълон қилишга оид қонун шудир».
Изоҳлар
^ Ёки «мўйловини».
